NATIONAL NEWS

Pursigido ang Climate Change Commission (CCC) na solusyunan ang matinding pagbaha sa bayan ng Masantol sa Pampanga.

Kasunod na rin ito nang pagtungo ng mga opisyal ng CCC sa Masantol na nadiskubre nilang may baha pa rin kahit walang ulan.

Ang pagbaha sa nasabing bayan, ayon sa CCC ay dahil sa climate change gayundin sa high tide at paglalabas ng tubig mula sa isang dam.

Tiniyak ng CCC ang pagkakasa ng mga programa sa susunod na administrasyon at ang paghahanap ng solusyon  sa pagbaha sa masantol ang isa sa mga priority nila.

Nagkasa na ng pag aaral ang DENR para malaman kung may panganib sa kalusugan ang marble toys o holen.

Kasunod na rin ito ng pahayag ng ban toxics na nakakalasan ang holen dahil sa taglay nitong cadmium base na rin sa kanilang sariling pag aaral.

Ayon kay Ban Toxics Campaigner Thony Dizon, dapat mabatid ng publiko ang peligrong dulot ng mga holen na nabibili lang sa mga palengke at maaaring magdulot ng cancer kapag nagkaruon ng exposure rito.

Una nang inihayag ng ban toxics na ang mga holen na sinuri nila ay walang required labeling information na kinakailangan batay na rin sa Republic Act 10620 o Toy and Game Safety Labeling Act of 2013.

Aminado ang pamahalaan na nananatiling hamon ang pagtuturok ng booster shot kontra COVID-19 sa bansa.

Sa Talk to the People kagabi ni Pangulong Rodrigo Duterte, sinabi ni National Task Force Against COVID-19 Deputy Chief Implementer Vince Dizon na dapat na mabakunahan ang mga kabataan at maturukan ng karagdagang proteksyon ang mga nakatanggap ng dalawang dose.

Tinutulungan na rin aniya ng pamahalaan ang mga lugar na hindi pa umaabot sa 70% ng target population.

Sinabi pa ni Dizon na naabot na ng National Capital Region, Cebu City at Davao City ang kanilang target population.

Batay sa datos ng National Vaccination Operations Center (NVOC) hanggang nitong Mayo 23, 69,037,072 o 76.70% ng target population ang fully vaccinated na.

Inihayag ng Department of Health (DOH) na nasa ”minimal risk” classification sa COVID-19 transmission ang karamihan sa rehiyon sa bansa.

Sa Talk To the People ni Pangulong Rodrigo Duterte kagabi, sinabi ni Health Undersecretary Abdullah Dumama na anim na rehiyon ang kasalukuyang nasa ”low risk” category.

Kabilang aniya rito ang Central Luzon, Bicol, Eastern Visayas, SOCCSKSARGEN, CARAGA, at Bangsamoro Autonomous Region in Muslim Mindanao (BARMM).

Dulot aniya ito ng positive growth rate sa nakalipas na dalawang linggo.

Sinabi pa ni Dumama na binabantayan ngayon ang ilang lugar na nakapagtala ng positive rates.

Hinimok naman ni Dumama ang publiko na magpabakuna na kontra COVID-19 at magpa-booster shot.