Muling magkakaroon ng dagdag-bawas sa produktong petrolyo sa susunod na linggo.
Batay sa pagtataya ng mga oil companies, P1.00 hanggang P1.20 ang dagdag sa presyo ng kada litro ng diesel.
Habang mababawasan naman ng P1.50 hanggang P1.60 ang presyo ng kada litro ng gasolina.
Inaasahang epektibo ang nasabing paggalaw sa presyo ng produktong petrolyo simula May 31 hanggang June 6.
Hinimok ng lokal na pamahalaan ng Manila ang mga residente nito na samantalahin ang drive-thru COVID vaccination and testing program bago matapos sa Hunyo 7.
Ayon sa Manila Public Information Office (MPIO), umabot sa 85,000 indibidwal ang nabakunahan nang magsimula ang programa noong Enero 13.
Pinaalalahanan naman ng naturang lungsod ang mga residente nito na nais magpabakuna at mga motorista na maaari silang magtungo sa kartilya ng katipunan shrine malapit sa Manila City hall gayundin ang may mga sasakyan na magpunta sa Quirino Grandstand.
Bahagyang tumaas ang hospitalization admissions dahil sa COVID-19.
Ito ang inihayag ni Private Hospitals Association of the Philippines (PHAPI) president Dr. Jose De Grano dahil sa mga naitatalang bagong kaso ng sakit.
Pero, manageable aniya ito ay hindi sila gaanong nababahala dahil karamihan sa mga naa-admit ay asymptomatic at hindi malala.
Kahapon, nakapagtala ang Department of Health (DOH) ng 209 new COVID-19 cases.
Naniniwala ang World Health Organization (WHO) na posibleng ito pa lamang ang simula ng pagkalat ng monkeypox virus.
Ayon kay WHO Epidemic and Pandemic Preparedness and Prevention Chief Sylvie Briand, ito ay matapos na makapagtala ng mahigit 200 kaso sa iba’t ibang bahagi ng mundo.
Aniya, hindi normal ang nagaganap na pagkalat ng naturang virus na nadetect sa ibang bansa tulad ng US, Australia, United Arab Emirates at ilang bansa sa Europa.
Ginagawan naman ng WHO ang kanilang makakaya para mabantayan ang pagkalat ng monkeypox virus.
Nanawagan din ito na huwag magpanic ang publiko.
Wala pang inaaprubahang bakuna ang Food and Drug Administration (FDA) laban sa monkeypox virus.
Ayon kay Health Secretary Francisco Duque III, wala pa rin kasing Emergency Use Authorization (EUA) ang mga lumalabas na bakuna na siyang batayan para makapagpasok ng antivirals laban sa nasabing sakit.
Pero, pinag-uusapan na raw ng DOH at World Health Organization (WHO) kung saang bansa maaaring bumili ng monkeypox antivirals sakaling magkaroon ng outbreak sa bansa.
Aniya, posibleng gamitin ng bansa ang MVAMUNE o IMVANEX vaccine mula sa United States para mapigilan ang pagkalat ng monkeypox or smallpox.
Sa kabila nito, iginiit ng kalihim na bukod sa bakuna, marami pang paraan para maiwasan ang nasabing virus gaya ng strict border control, mas mahigpit na symptoms screening at pagsunod sa minimum public health standards.
Matatandaang una nang sinabi ni Duque na sa ngayon ay wala pang pangangailangan sa pagsasara ng borders ng bansa.
Tiwala ang pamahalaan na babalik agad sa normal ang presyo ng asukal.
Ayon sa Sugar Regulatory Administration (SRA), mangyayari ito sa oras na umangkat pa ng asukal ang pamahalaan mula sa ibang bansa.
Maliban dito, inaasahang darating na rin ang 200 metric tons o 4M bags ng asukal na mula sa mga bansang China at Vietnam sa susunod na buwan.
Matatandaang pumalo kasi sa halos P3,000 ang presyo ng kada sako ng puting asukal mula sa dating P1,700 at P2,700 sa kada sako ng pulang asukal na mula sa dating P2,000.
Paliwanag ng mga nasa industriya, nasira kasi ng nagdaang bagyong Odette ang isa sa pinakamalaking sugar refinery sa Negros.
Umaasa si outgoing Department of Education Secretary na si Leonor Briones na maipagpapatuloy ng susunod na administrasyon ang mga programang sinimulan na ng ahensya.
Ayon kay Briones, karapatan ni Vice President-elect incoming DepEd Secretary Sara Duterte-Carpio na magtalaga ng miyembro ng kaniyang official family.
Pero, umaasa si Briones na magtutuloy-tuloy ang mga programa ng ahensya gaya ng Alternative Learning System and Last Mile Schools Program na suportado rin naman ng kaniyang ama na si outgoing President Rodrigo Duterte.
Inihayag din ng kalihim na dalawang beses nang nagpaabot ng kagustuhan si Duterte para pag-usapan ang tungkol sa gagawing transition pero natatapat ito sa petsang may mahalagang dadaluhan pulong si Briones.
Pero posibleng umusad ang transition sakaling matapos na ang oath taking ni Duterte.
Nilinaw rin ni Briones na handa na siyang bumaba sa kaniyang pwesto pero hindi pa ito ang panahon ng pagre-retiro dahil lagi siyang handa na ibahagi ang kaniyang karanasan sa government service sakaling may magtanong tungkol dito.
Ipinagdiriwang ngayong araw ang ika-124 National Flag Day o ang unang araw ng pagsasapubliko ng bandila ng bansa sa Imus, Cavite.
Pinangunahan ng Philippine Navy ang flag-raising ceremony sa bantayog ng pambansang bayani na si Dr. Jose Rizal sa Luneta Park.
Mayroon ding naka-display na mga bandila ng bansa sa kahabaan ng Roxas Boulevard sa simula Lungsod ng Parañaque, Pasay hanggang sa Maynila.
Maliban dito, nagsagawa rin ng simultaneous flag ceremony sa pangunguna ng National Historical Commission of the Philippines at Imus, Cavite LGU sa Dambana ng Pambansang Watawat ng Pilipinas at Imus Heritage Park.
Matatandaang May 28, 1898 nang ipinakita ang Philippine flag sa bayan ng Imus ng pwersa ng Philippine Revolutionary Army matapos nilang talunin ang mga Espanyol sa Battle of Alapan.
Dahil dito, idineklara na bilang National Flag Day ang May 28 batay na rin sa Proclamation No. 374 na inilabas noong March 6, 1965.
Samantala, may temang “Pagtuon sa Hamon ng Panibagong Bukas” ang selebrasyon ng National Flag Day ngayong araw.
Pansamantala munang isinara sa mga pasyente ang labor at delivery room ng the Pasig City General Hospital (PCGH) ngayong weekend.
Ayon sa pamunuan ng PCGH, simula kasi ngayong araw Mayo- a 28 ay magsasagawa sila ng fumigation at disinfection hanggang bukas Mayo a-29.
Paliwanag nila, nagsimula pa noong 2020 ang regular na fumigation at disinfection sa ospital para tiyaking ligtas ang mga buntis, bagong panganak at sanggol mula sa iba’t ibang uri ng nakakahawang sakit.
Kasabay nito, nilinaw ng Pasig Public Information Office (PIO) na tatanggap pa rin ng extreme cases of emergency ang ospital gayundin ang mga buntis na nakatakdang manganak sa nasabing ospital.
Naniniwala ang isang financial analyst na magiging maayos ang pamamalakad ng administrasyon ni President-elect Ferdinand ‘Bongbong’ Marcos Jr.
Sa panayam ng DWIZ, sinabi ni Astro Del Castillo, Managing Director ng First Grade Finance Inc. na tiwala siyang kayang solusyunan ni Marcos ang napakalaking utang ng Pilipinas sa tulong ng itinalagang Economic Managers.
Malaki naman ang tulong ng pagkakaroon ng malakas na pundasyon mula sa administrasyon ni Pangulong Rodrigo Duterte upang maipagpatuloy ang kasalukuyang reporma.