NATIONAL NEWS

Inaprubahan ng Regional Tripartite Wages and Productivity Board ang hirit na pagtataas ng sweldo ng mga manggagawa sa Northern Mindanao.

 Bunsod nito ay makakaranas ng 25 pesos na dagdag-sahod ang mga manggagawa sa kanilang daily minimum wage.

 Sa ilalim ng bagong sahod, ay magiging 405 pesos na ang sahod para sa non-agriculture na sektor habang 393 pesos naman sa mga manggagawa ng agriculture sector na nagtatrabaho sa mga siyudad ng Cagayan De Oro, Iligan, Malaybalay, Valencia, Gingoog, El Salvador, at Ozamis, pati na rin ang mga bayan ng Tagoloan, Villanueva, Jasaan, Opol, Maramag, Quezon, Manolo Fortich, at Lugai.

 Inaasahan naman ng Department of Labor and Employment (DOLE) na aabot sa 152,924 na manggagawa at 54,851 domestic workers ang makikinabang sa bagong sahod.

 Inanunsiyo ng Department of Health (DOH) na walong araw nang walang naitatalang bagong namatay sa bunsod ng COVID-19.

 Mababatid na dahil dito ay nananatili ang total COVID-19 deaths sa 60, 455.

 Bagama’t nakapagtala kahapon ang DOH ng 200 bagong kaso ng COVID-19 ay nasa sa 2,434 na lamang ang bilang ng mga aktibong kaso, habang 3,627,365 naman ang kabuuang bilang ng mga gumaling sa sakit.

 Samantala, nangunguna pa rin ang Metro Manila na may pinakamaraming kasong naitala sa nakalipas na linggo na sinundan ng Calabarzon at Central Luzon.

Naglatag ang Department of Energy (DOE) ng mga programa nito ukol sa kuryente at gasolina na maaaring ipatupad ng susunod na administrasyon.

 Ayon kay Energy Undersecretary Benito Ranque, ang mga planong ito ay makatutulong upang mapababa ang singil sa kuryente at presyo ng produktong petrolyo.

 Mababatid na dodoblehin ang existing lifeline rate sa Metro Manila upang makatulong sa marginalized consumers, habang ang lifeline subsidy ay ibinibigay naman sa mga low income users na gumagamit nang hindi bababa sa 100 kilowatts kada buwan.

 Kasama rin dito ang pag-renegotiate ng mga kontrata ng DOE sa mga independent power producers at pagbibigay direktiba sa mga electric cooperative na Agus-Pulangi Hydropower Complex para mapababa ang presyo ng kuryente sa Mindanao.

 Dagdag pa rito ay plano rin ng ahensiya na suspendihin ang Biofuels Act of 2006 na nagpapataw ng dagdag na gastos sa mga konsumer dahil sa biofuel component nito.

 Samantala, kung maipatupad ito ay posibleng bumaba sa 3 pesos at 26 centavos kada litro ng gasolina at 1 peso at 40 centavos naman kada litro ng diesel.

Muling isinusuong ng Ibon Foundation ang pagpapatupad ng “billionaire tax” sa bansa.

 Layon ng ipinapanukalang bagong buwis ng Department of Finance (DOF) na mabayaran ang utang ng Pilipinas na lumobo na sa 12.68 trillion pesos nitong marso sa pamamagitan ng pagbubuwis sa mayayaman.

 Mababatid na ang wealth tax ay matagal na ring ipinapatupad sa ibang mga bansa gaya ng France, Switzerland, Germany, Latin Amerika at sa 30 ibang mga bansa sa buong mundo.

Samantala, sa ilalim ng billionaire tax na una nang inihain sa kongreso noong September 2021 bilang House Bill no. 10253 o “Super Rich Tax Act of 2021” bubuwisan ng 1% ang mga indibidwal na may yamang higit 1 billion pesos; 2% kung 2 billion pesos at 3% naman kung 3 billion pesos pataas.

Opisyal nang isinara ng Commission on Elections (COMELEC) ang kanilang Automated Election System (AES) Servers at Network Infrastructure ngayong araw.

 Kinumpirma ng komisyon na alas-nuwebe kaninang umaga ng patayin ang system dahil naiproklama naman na ang mga kandidato sa nakalipas na 2022 elections.

 Ayon kay COMELEC Commissioner George Garcia, inimbitahan nila ang mga political party at mga citizens’ arm groups para masaksihan ang gagawing pag-shutdown sa mga system.

 Samantala, binigyang-diin ng COMELEC na hindi nila buburahin ang mga data na nakalagay sa kanilang mga server.

Kinumpirma na ng Commission on Appointments (CA) ang promotion ng 17 opisyal ng Armed Forces of the Philippines (AFP).

Kabilang sa mga kumpirmado na ang appointments sina Adonis Arial Orio sa ranggong Brigadier General, Wilbur Mamawag sa ranggong Major General, Alberto Cartlos bilang Vice Admiral, William Gonzales bilang Liuetenant General, Rommel Anthony Reyes bilang Vice Admiral, Glenn Jun Calambuhay bilang Brigadier General, Fermin Carangan bilang Brigadier General at Araus Robert Musico,  Ignatius Patrimonio at Charlton Sean Gaerlan Pawang sa ranggong Major General.

Bukod pa ito kina Renato David bilang Rear Admiral, Jonas Lumawag bilang Major General, Francisco Tagamolia Jr. bilang Commodore, Marvin Licudine bilang Brigadier General, Camilo Ligayo bilang Major General, Consolito Yecla bilang Brigadier General at Romulo Manuel, Jr. bilang Major General.

Matapos ang pag apruba sa promotion ng mga nasabing AFP officials inamiyendahan ng mga mambabatas ang isang section ng CA rules at ipinakilala ang probisyong nagsasabing lahat ng appointments sa Department of Migrant Workers ay ie-endorso sa Committee on Labor, Employment and Social Welfare. –  sa ulat ni Cely Ortega-Bueno (Patrol 19)

 Mas mahaba pa ang nagiging termino ng mga barangay officials kaysa sa pangulo ng bansa.

Binigyang-diin ito ni Senate President Vicente Tito Sotto III makaraang igiit na dapat nang tuldukan ang paulit-ulit na pagpapaliban ng barangay election subalit mabuti ring tanungin si President elect Ferdinand Bongbong Marcos, Jr. hinggil dito.

Sinabi naman ni Senador Imee Marcos na dahil may bago nang pangulo ng bansa na mas makabubuting ituloy na ang barangay election sa Disyembre para may bago ding hatol sa mga nasa baba at magkaroon ng suporta ang bagong administrasyon sa mga bagong barangay officials.

Mayroon naman na aniyang budget para sa Barangay at Sangguniang Kabataan (SK) elections. –  sa ulat ni Cely Ortega-Bueno (Patrol 19)

Nilinaw ng Department of Agriculture (DA) na mayroon talagang kakulangan sa suplay ng pagkain.

Sa panayam ng DWIZ, ipinaliwanag ni DA Spokesperson Assistant Secretary Noel Reyes na ito ay dahil sa seasonal fluctuation ng suplay ng pagkain.

Pero sinabi ni Reyes na hindi solusyon ang pag-import ng pagkain sa mga pagkakataon na may food crisis ang bansa kundi ito ay para lamang sa kakulangan.

Imumungkahi ng Department of Agriculture (DA) ang 270 billion pesos na budget para sa taong 2023 sa ilalim ng papasok na administrasyong Marcos Jr.

Ayon kay DA Secretary William Dar, “mas marami pa” ang maaaring gawin sa sektor ng agrikultura kung mabibigyan ito ng angkop na pondo at suporta, na kung saan ay “napabayaan” aniya ng mahigit 30 taon.

Paliwag niya na ang nasabing halaga ay nasa level of budget na kanilang kailangan.

Una nang hiniling ng DA ang 8 billion pesos hanggang 10 billion pesos na dagdag sa 91 billion pesos na proposed budget para sa taong 2022.

Nabatid rin na orihinal na iminungkahi ng kagawaran ang 231 billion pesos na pondo pero inirekomenda lamang ng Department of Budget and Management (DBM) ang 91 billion pesos na pondo sa kongreso.

Naniniwala si Senador Sherwin Gatchalian na mataas ang magiging kumpiyansa ng business sector sa economic team ng susunod na administrasyon.

Ito’y ayon kay Gatchalian ay dahil kilala na ng business sector ang magiging miembro ng economic team ni president elect Ferdinand “Bongbong” Marcos Jr. at pamilyar ang kanilang direksyon para sa ekonomiya at pananalapi bilang mga naging bahagi na ng mga dating administrasyon.

Una nang sinabi ni BBM na kaniyang napili si Bangko Sentral Governor Benjamin Diokno bilang kalihim ng Department of Finance (DOF) kung saan unang naging Budget Secretary si Diokno ng Duterte at Estrada administrations.

Itatalaga naman si Secretary Arsenio Balisacan sa National Economic and Development Authority (NEDA) at ito rin ang puwesto ng opisyal nuong Aquino administration samantalang in-appoint naman bilang Bangko Sentral Governor si dating Secretary Felipe Medalla na naging kalihim ng NEDA nung Estrada administration.

Magiging kalihim naman ng DPWH si San Miguel Tollways Corporation  Chief Executive Manuel Bonoan na DPWH official na sa Ramos, Estrada at Arroyo administrations.

Binigyang-diin ni Gatchalian na kailangan ng certainty at continuity sa mga polisiya sa ekonomiya ngayong nahaharap ang bansa sa pandemya, krisis sa Ukraine, mataas na presyo ng petrolyo at mga bilihin.

Tiyak naman ni Gatchalian na madaling makakalusot sa Commission on Appointments (CA) ang mga itatalaga sa Marcos administration na mayruong mahusay na track record. - sa ulat ni Cely Ortega-Bueno (Patrol 19)