NATIONAL NEWS

Nakasalalay na sa administrasyon ni President-elect Ferdinand ‘Bongbong’ Marcos Jr. kung magpapatuloy pa ang umiiral na libreng-sakay sa MRT-3.

Ayon kay Michael Capati, general manager ng MRT-3, maging sila ay nakaabang kung palalawigin pa ang libreng-sakay sa tren.

Nabatid na hanggang Hunyo 30 na lang ang libreng-sakay sa MRT-3 pero wala pang abiso kung palalawigin ito.

Nanawagan na si Agrarian Reform Acting Secretary at Undersecretary Bernie Cruz sa 236 na Co-owners ng Collective Certificates of Land Ownership Award na matiyagang hintayin ang validated report na isinagawa noong May 23 hanggang 25.

Ito ang magpapakita ng opisyal na listahan ng mga kwalipikadong Agrarian Reform Beneficiaries na itatalaga sa 200 ektaryang Hacienda Tinang sa Barangay Tinang, Concepcion, Tarlac.

Layunin nitong maresolba ang Agrarian Dispute ng mga magsasaka sa naturang hacienda.

Ayon kay Cruz, dapat ding tulungan ang mga magsasaka na paunlarin ang kanilang pagsasaka para sa food security ng bansa.

Ang naturang Task Force ay nilikha ni Cruz noong March 11, sa pamamagitan ng Special Order 91, series of 2022 upang suriin ang mga record at pagtibayin ang agrarian reform beneficiaries, magsasaka at nakatira sa isang landholding.

Una nang inaresto ng PNP ang 93 magsasaka sa hacienda Tinang-Tarlac kabilang ang mga volunteer nito kaugnay ng isang aktibidad na may kaugnayan sa agrarian dispute sa nabanggit na lugar.

Palalakasin pa ng pamahalaan ngayong Hunyo ang pagbibigay ng COVID-19 booster dose.

Ayon kay Epimaco Densing III, Undersecretary ng Department of the Interior and Local Government (DILG), isa ito sa mga agendang tinalakay sa pulong ng National Vaccination Operation Center (NVOC).

Sa pamamagitan ng plano, mapalalakas ang kampanya ng mga LGU na bakunahan at hikayatin ang kanilang mga constituent na magpaturok ng booster.

Mayroong hanggang katapusan ng Hunyo ang pamahalaan para maabot ang target na 70 milyong fully vaccinated na indibidwal na matuturukan ng booster dose.

Kailangan na ring maging bahagi ng buhay ng mga Pilipino ang pagsusuot ng face mask sa matatao at enclosed na lugar ngayong dapat na ring mamuhay kasama ang COVID-19.

Ito ang inihayag ni Senator Imee Marcos sa harap ng panawagan na huwag ng gawing mandatory ang pagsusuot ng face mask.

Ayon kay Marcos, natuto na ang maraming bansa noong panahon ng SARS at iba pang nakakahawang sakit na mahalaga ang pagsusuot ng facemask.

Isa anya itong maliit na sakripisyo para sa kapakanan at kaligtasan ng buong pamilya.

Samantala, tumanggi munang mag-komento ang senador sa posibleng pagsasailalim muli sa Metro Manila sa Alert level 2 dulot ng tumataas na kaso ng COVID-19.

Aminado ang mambabatas na wala siyang datos kaya’t mahirap magbigay ng opinyon.  —ulat mula kay Cely Ortega Bueno (Patrol 19)

Umapela ang iba’t ibang grupo ng mga eksperto at mamamayan kay Pangulong Rodrigo Duterte na kanselahin na ang Quarrying Agreements sa Upper Marikina River Basin Protected Landscape at Masungi Geopark Project bago siya bumaba sa puwesto.

Ito’y matapos ang kabiguan ni Acting Environment Secretary Jim Sampulna na kanselahin at sa halip ay sinuspinde lamang ang mga Mineral Production Sharing Agreement (MPSA) ng tatlong quarry companies.

Kabilang naman sa mga nananawagan ang mga miyembro ng Katutubong Dumagat-Remontado na naninirahan sa mga Bayan ng Baras, Tanay, San Mateo, Rodriguez at Antipolo City na nasa bahagi ng Sierra Madre sa lalawigan ng Rizal.

Partikular na tinukoy ang mga Sister Quarry Companies na Rapid City Realty and Development Corporation at Quarry Rock Group, maging ng Quimson Limestone.

Ang tatlong kumpanya ay mayroong mga MPSA na sumasaklaw sa higit sa 1,300 ektarya ng mga protektadong lugar at wildlife sanctuaries.

Nangangamba ang mga grupo na maaaring tanggalin ang mga suspensyon anumang oras kaya’t kanilang iginiit ang tamang aksyon na kanselahin ang mga MPSA.

Alinsunod sa Section 18 ng R.A. 11038 o Extended National Integrated Protected Areas System Act of 2018, ipinagbabawal ang Mineral Exploration o Extraction sa mga protected area.

Ipinaliwanag naman ng mga eksperto na pinoprotektahan ng watershed ang Metro Manila at ang Lalawigan ng Rizal mula sa mapaminsalang pagbaha lalo kapag may bagyo.