NATIONAL NEWS

Umaasa ang Commission on Elections ng mataas na voter turnout para sa gaganaping plebisito sa Maguindanao bukas, Setyembre 17.

Ayon kay Comelec Commissioner Aimee Ferolino, dalawang plebisito na ang matagumpay nilang naisagawa kung saan pinakahuli ang Calaca, Batangas na may 56% voter turnout.

Batay sa datos ng COMELEC, kabuuang  818,790 registered voters ang nakatakdang bumoto sa Maguindanao plebiscite na gaganapin sa       5,390 polling precints sa 501 voting centers.

Magmumula naman ang mga botante sa 545 barangay sa 36 municipalities sa naturang probinsya.

Ang Maguindanao plebiscite ang tutukoy kung mahahati ang lalawigan sa dalawa na tatawaging Maguindanao Del Norte at Maguindanao Del Sur.

Kinumpirma ng Department of Migrant Workers (DMW) na daan-daang filipino workers ang stranded sa isang island sa Indian Ocean dahil sa problema sa kanilang employer na Kellogg Brown and Root (KBR), isang american contractor.

Ayon kay DMW Secretary Susan “Toots” Ople, 800 pinoy workers sa Diego Garcia Island ang stranded o hindi makapagbakasyon sa Pilipinas dahil natatakot silang hindi na makabalik o payagan ng Philippine Overseas Employment Administration (POEA).

Paliwanag niya, may banta kasi ang KBR sa mga nasabing manggagawa na mag-resign na lamang kung magbabakasyon ang mga ito.

Samantala, sinabi ni Ople na nakikipag-ugnayan sila sa naturang employer para ayusin ang vacation leaves, bilang bahagi ng karapatan ng mga pinoy workers sa nasabing lugar.

Ipinatuturo ng National Telecommunications Commission (NTC) sa mobile phone manufacturers, distributors at dealers kung paano maiiwasan ng mobile phone users ang text scams.

Batay sa , Memorandum Order no. 14 na nilagdaan ni NTC Commissioner Gamaliel Cordoba, dapat ipatupad ang sumusunod na mga hakbang:

• Pagtuturo sa mga mobile phone users kung paano i-block ang mga text na mula sa mobile numbers na wala sa kanilang contact lists.

• Dapat maglagay ang mga mobile phone manufacturers, distributors at dealers ng poster sa kanilang physical store na nagsasaad ng impormasyon sa paggamit o pag-activate ng text blocking, spam folder at iba pa.

• Kailangan ring maglagay ng leaflets sa package ng mga bagong mobile phones na naglalaman ng impormasyon hinggil sa nasabing text blocking.

Samantala, ipinag-utos ng ntc ang agarang pagpapatupad ng memorandum order sa loob ng 15 araw.

Hindi masasayang ang mga suplay na gagamitin para sa Barangay at Sangguniang Kabataan (BSKE) Election sakaling ipagpaliban ang halalan.

Ito ang sinabi ni Commission on Election (COMELEC) Spokesperson Rex Laudiangco na maaari nilang itago ang mga suplay at gamitin ito sakaling matuloy ang BSKE election sa bagong schedule.

Aniya, ito ang ginawa ng ahensya nang ma-postponed ang naturang halalan noong 2017 hanggang 2018.

Nabatid na sinabi ni Laudiangco na kinikilala ng COMELEC ang kapangyarihan ng kongreso na magpasa ng batas na ipagpaliban ang barangay at SK Election.

Inirerekomenda ng Department of Tourism (DOT) na maibalik na ang mga dating flights na natigil dahil sa COVID-19 pandemic bilang bahagi ng pagpapaigting sa industriya ng turismo.

Ayon kay Tourism Secretary Christina Frasco, iminungkahi nito sa flag carrier na Philippine Airlines (PAL) na ibalik na ang dating flights at magbukas ng mga bagong destinasyon.

Ibinahagi rin ni Frasco sa PAL ang mahahalagang natutunan sa 11th Asia Pacific Economic Cooperation Tourism Ministerial Meeting, kabilang dito ang tumataas na demand mula sa mga bansang tulad ng thailand upang bisitahin ang tourism spot sa Pilipinas gaya ng Cebu.

Binigyang-diin naman ng kalihim na maituturing na mahalagang sangkap ng tourist lifecycle sa bansa ang mga Airline company.