NATIONAL NEWS

Magtutulungan ang Philippine Embassy sa Pretoria at South African Maritime Safety Authority (SAMSA) upang matiyak ang mga pinoy seafarers sa Territorial Waters and International Seaports na sakop ng nasabing bansa.

Ito ang resulta ng pakikipagpulong ni Philippine Ambassador To South Africa Noralyn Jubaira Baja sa mga opisyal ng SAMSA.

Ang SAMSA ang pangunahing South African Government Agency na inatasang panatilihin ang kaligtasan ng buhay at ari-arian sa karagatan. Ito rin ang nangangasiwa sa lahat ng Major South African Ports.

Ayon kay Baja, mahalaga ang matibay na ugnayan ng embahada at SAMSA para masuportahan ang pinoy seafarers sa South Africa kapag sila ay naglalayag doon.

Posibleng abutin ng dalawa hanggang tatlong taon ang pagpapatupad ng bagong curriculum ng K to 12 program.

Sinabi ni Vice President at Education Secretary Sara Duterte – Carpio, ang inisyal na resulta ng pag-aaral hanggang sa curriculum ng Grade 10 ay naiprisenta na sa management at executive committee bago ilahad sa national government at pribadong sektor.

Ayon kay Duterte, ganito rin ang prosesong dadaanan ng pagrepaso sa curriculum ng Grade 11 at 12.

Diin ni Duterte, ang pagrepaso sa curriculum ay ibabahagi sa iba’t ibang sektor para makuha ang kanilang panig at mga rekomendasyon para mapagbuti ang K-12 curriculum

Bumaba na sa P100 ang kada kilo ng asukal sa ilang palengke sa Metro Manila.

Ito’y batay sa monitoring ng bantay presyo ng Department of Agriculture (DA), kabilang dito ang Commonwealth Market at Muñoz Market sa Quezon City at Malabon Market.

Sa ngayon ay naglalaro na sa P90 ang kada kilo ng puting asukal, nasa P70 kada kilo naman ang wash sugar, habang P68 kada kilo naman ang brown sugar.

Samantala, maraming palengke pa rin sa Metro Manila na hanggang sa ngayon ay nagbebenta pa rin ng nasa P100 na asukal.

Sang-ayon ang Department of the Interior and Local Government (DILG) na palawigin pa ang state of calamity para sa COVID-19 pandemic hanggang sa katapusan ng taon.

Ito’y matapos pirmahan ni Pangulong Ferdinand Bongbong Marcos Jr. Ang Proclamation no. 57 na nagpapalawig sa panahon ng state of calamity sa buong bansa, hanggang sa Disyembre 31, 2022, base na rin sa rekomendasyon ng National Disaster Risk Reduction and Management Council (NDRRMC.)

Sinabi ni Abalos na ang pagpapalawig ng state of calamity ng panibagong tatlong buwan ay magbibigay ng dagdag na panahon sa national at local governments para magpatupad ng economic, social, at health interventions.

Samantala, hinikayat din niya ang mga lokal na pamahalaan na gamitin ang angkop na pondo, kabilang ang quick response fund, upang tugunan ang agarang pangangailangan ng kanilang mga nasasakupan

Palalakasin ng Land Transportation Office (LTO) ang pagsasanay sa mga traffic at law enforcement personnel nito upang mapahusay pa ang kanilang pagganap ng tungkuling ipatupad ang mga regulasyon at batas-trapiko.

Sinabi ni LTO Chief Assistant Secretary Teofilo Guadiz III, ang regular na pagsasanay sa mga enforcer ay isa lamang sa mga programa sa ilalim ng pamumuno nito na layong tiyaking maipatutupad ng tama ang mga batas para sa kapakanan ng publiko.

Sa ngayon, sumasailalim sa once a year, live-in seminar ang lahat ng traffic enforcers ng ahensya na layong maging pamilyar ang mga ito sa batas na maaaring magkaroon ng pagbabago at maobserbahan din ang kanilang pag-uugali at kilos sa lansangan.

Planong gawing “mandatory” ang taunang pagsasanay na kahalintulad din sa ibang larangan upang masigurong hindi makalilimutan ng kanilang mga tauhan ang mga regulasyon at batas-trapiko sa bansa.

Isinasapinal na ang posibleng pulong ni Pangulong Ferdinand Bongbong Marcos Jr.  kay US President Joe Biden.

Kinokonsulta pa ng Department of Foreign Affairs (DFA) ang white house at US national security agency.

Sinabi ni Press Secretary Trixie Cruz Angeles na ang magiging talumpati ng punong ehekutibo ay may kaugnayan sa kung paano nagrerekober ang Pilipinas mula sa pandemya at maaring maisama ang mga prayoridad ng pamahalaan gaya ng climaye change, rule of law at food security.

Magugunitang, nakatakdang bumiyahe Si PBBM sa Estados Unidos sa Setyembre 18 kung saan magtatalumpati siya sa harap ng 77th United Nations General Assembly (UNGA) na nakasentro sa efforts ng bansa na makarekober mula sa COVID-19 pandemic.

Isiniwalat ng Department of Social Welfare and Development (DSWD) na paubos na ang pondo ng ahensiya para sa ayuda ngayong taon.

Ayon kay DSWD Secretary Erwin Tulfo na ang pondo para sa medical, burial at transportation ay mababa na sa P 1-B.

Dagdag ni Tulfo maging ang pondo ng mga lokal na pamahalaan ay kapos na rin sa distribusyon ng ayuda sa kanilang mga lugar.

Samantala, magtutungo si Tulfo sa kongreso sa susunod na linggo para sa plenary deliberations tungkol sa budget proposal ng DSWD at upang depensahan ang P 182-B pondo ng tanggapan sa 2023 National budget.

Patay ang isang 20-anyos na babae matapos pagtatagain ng kanyang kinakasama nang magbanta na iiwan siya nito at ang kanilang anak sa Purok 5, Barangay Dumlan, Maco Davao De Oro.

Sa report na nakarating sa kampo krame, kinilala ng Maco Municipal Police station ang biktima na si Jelly Joy Coscos habang kusang-loob na sumuko ang suspek na si Jimmy Genobiagon, 28- taong gulang.

Batay sa inisyal na imbestigasyon, napag-alaman na nagdiwang pa ng kaarawan ang anak ng mag-live-in partner nang magkaroon ng pagtatalo ang dalawa.

Nagbanta umano si Coscos na iiwan niya si Genobiagon at ang kanilang anak na ikinagalit nito.

Dito na kumuha ng itak si Genobiagon at walang awang pinagtataga sa iba’t ibang bahagi ng katawan ang biktima.

Samantala, agad namang sumuko sa barangay ang suspek matapos ang krimen na ngayo’y nahaharap sa kaukulang reklamo.

Nakatakdang makatanggap ng karagdagang 720,000 pediatric Pfizer Vaccine ang Department of Health (DOH) mula sa Australian Government.

Ito ay sa ilalim ng suporta ng United Nations International Children’s Emergency Fund (UNICEF) sa COVID-19 recovery ng Pilipinas.

Ayon sa DOH, dadating ang nasabing bilang ng bakuna ngayong linggo para makumpleto ang 3-M pediactric Pfizer Vaccine doses.

Sa ngayon, mayroon 2,280,000 ng naturang bakuna ang DOH.

Nakikita na rin ng Department of Health (DOH) na matatapos na ang COVID-19 Pandemic sa bansa.

Nabatid na sinabi ng World Health Organization (WHO) na nakikita nila ang end of pandemic sa ilang bansa sa buong mundo dahil sa patuloy na pagbaba ng bilang ng mga kaso.

Muli namang sinabi ni DOH Officer-in-Charge Maria Rosario Vergeire na kailangan pa ring maghanda ng bansa sakaling matapos ang pandemya dahil hindi naman mawawala ang naturang virus.

Aniya, kailangang mapalakas ang sistema at ang immunity ng populasyon at i-ready ang mga pasilidad sakaling dumating sa punto na handa na ang publiko ay wala nang dapat ipangamba.

Samantala, sinabi ni Vergeire na dapat ipagpatuloy ng bansa ang COVID-19 testing, pag-abot sa vaccination target at pagpapatupad ng continous risk communication sa publiko.