Bahagyang tumaas ang naitalang bagong kaso ng COVID-19 sa bansa kahapon.
Ayon sa Department of Health (DOH), lumobo sa 2,619 ang daily new cases, pinakamataas sa nakalipas na anim na araw.
Sumipa rin ang active cases na nasa 26,363 na kahapon, mula sa 24,843 noong Huwebes.
Sumampa naman sa 3,827,320 ang kabuuang gumaling sa bansa sa COVID-19, habang 62,479 ang mga nasawi.
Ang nationwide COVID-19 tally na sa Pilipinas ay 3,916,162.
Kasado na ngayong araw ang isasagawang plebesito sa Maguindanao.
Ayon kay Commission on Elections (COMELEC) commissioner Aimee Ferolino, pagtitibayin sa plebesito ang batas na maghahati sa Maguindanao sa dalawang probinsya, ang Maguindanao del Norte at Maguindanao del Sur.
Batay sa datos ng Comelec, kabuuang 818,790 registered voters ang nakatakdang bumoto sa Maguindanao Plebiscite na gaganapin sa 5, 390 polling precints sa 501 voting centers.
Magmumula ang mga botante sa 545 Barangay sa 36 Municipalities sa naturang probinsya.
Magiging manual ang botohan at bilangan imbes na gumamit ng Automated Election Eystem (AES).
Positibo naman ang Komisyon na magiging mataas ang voter turnout sa plebisito.
Maaaring bumoto ang mga residente hanggang alas-3 na hapon habang ang resulta ay posibleng ilabas hanggang alas-10 ng gabi.
Inaprubahan na ng Land Transportation Franchising and Regulatory Board (LTFRB) ang dagdag-pasahe sa mga jeepney, bus, taxi at transport network vehicle service o TNVS.
Inilabas ng board ang naturang desisyon kasunod ng mga petisyong inihain ng mga transport group nitong taon.
Nabatid na kasama sa mga inaprubahan ang dagdag na piso sa pasahe sa mga jeepney para sa unang 4 km at 30 hanggang 40 centavos naman per succeeding kilometer.
Inaprubahan naman ang P 2.00 dagdag pasahe para sa city at provincial buses sa unang 5 km at 35 hanggang 50 centavos na dagdag per succeeding kilometer depende sa uri ng bus.
Samantala, sa ordinaryong provincial bus naman ay magiging P 11.00 na ang pasahe habang itinaas naman ang flagdown rate ng mga taxi at TNVS sa P5.00.
Nakapagtala ang Department of Health (DOH) ng karagdagang 171 na bagong kaso ng Delta Variant at OMICRON subvariant cases sa bansa.
Mababatid na nauna nang idinagdag ang Ba.4 at Ba.5 sa listahan ng pagsubaybay ng World Health Organization noong Marso at itinalaga bilang mga variant ng alalahanin ng European Center for Disease Prevention and Control.
Nitong Huwebes ang Pilipinas ay nakapagtala ng 2,141 na bagong kaso ng naturang virus, na itinaas ang nationwide tally sa 3,913,000,536.
Samantala, ang kabuuang recoveries ay umakyat na sa 3, 826,000,246 habang ang death toll ay sumampa na sa 62,447 kabilang na ang 31 bagong nasawi.
Ipinag-utos ni Pangulong Ferdinand Marcos Jr. Ang pagbabalik ng Technical Education and Skills Development Authority (TESDA) sa ilalim ng Department of Labor and Employment (DOLE) mula sa Department of Trade and Industry (DTI).
Sa inilabas na executive order no.5, ipinag-utos ni PBBM ang paglilipat ng attachment ng TESDA sa ilalim ng DOLE para sa “Policy at Program Coordination.”
Nakasaad sa Seksyon ng 2 ng nasabing EO na ang Secretary of Labor and Employment ang dapat na chairperson ng TESDA board alinsunod sa seksyon 7 ng Republic Act no. 77-96 o ang Technical Education and Skills Development Authority Act of 1994.
Mababatid na ang TESDA ay ang orihinal na attached agency ng DOLE, subalit dahil sa naging kautusan ni Dating Pangulong Rodrigo Duterte noong October 2018, kung kaya’t inilipat ang TESDA sa DTI.
Tinapos na ng House Committee on Appropriations ang deliberasyon ng P5.268-T na national budget para sa 2023.
Nabatid na huling sumalang sa pagtalakay ay ang budget ng Department of Public Works and Highways at National Commission on Indigenous Peoples.
Inaasahan naman na ihahain ng liderato ng Kamara De Representantes ang General Appropriations Bill (GAB) sa lunes bilang paghahanda sa budget deliberation sa plenaryo na nakaplanong simulan sa Martes, Setyembre 20.
Samantala, batay sa plano ng kamara, aaprubahan nito sa ikatlo at huling pagbasa ang GAB bago mag-adjourn ang sesyon sa September 30.
Pumasok na sa Philippine Area of Responsibility (PAR) ang Typhoon Nanmadol na tatawagin nang Bagyong Josie.
Ayon sa Philippine Atmospheric, Geophysical, And Astronomical Services Administration (PAGASA), alas-5:40 ng hapon kanina ng pumasok ang ika-10 tropical cyclone ngayong taon.
Nilinaw naman ng weather bureau na hindi direktang makakaapekto sa panahon sa bansa si Josie, at maaaring lumabas na rin ito ng PAR ngayong gabi o bukas ng madaling-araw.
Sa kabila na walang direktang epekto sa Pilipinas ang Bagyong Josie, inaasahan pa rin na palalakasin nito ang southwest monsoon o hanging habagat.
Naitala ngayong araw ang pinakamahinang value piso.
Nagsara ang palitan ng piso kontra dolyar sa P 57.43 kada isang dolyar.
Mababatid na ito na ngayon ang pang-6 na pagbagsak ng piso sa loob ng 11 araw.
Good news para sa mga motorista!
Asahan ang dagdag-bawas sa presyo ng produktong petroleum sa susunod na linggo.
Ayon sa Department of Energy-Oil Industry Management Bureau (DOE-OIMB), inaasahan na bababa ang presyo ng diesel mula P2.80 hanggang P3.10 kada litro.
Inaasahang bababa rin ng tatlong piso ang kada litro ng kerosene, habang nagbabadya namang tumaas ang presyo ng gasolina mula 30 hanggang 60 centavos kada litro.
Samantala, malaking epekto ang pagbaba ng piso sa dolyar sa pagbabago ng presyo ng produktong petroleum.
Target ng Land Transportation Office (LTO) na gawing mas mabilis ang proseso ng online registration ng mga motorsiklo.
Mababatid na sa kasalukuyan ay kailangan pang magtungo ng mga motorcycle owner sa tanggapan ng LTO upang magsusumite ng mga registration requirement, pagbabayad at matapos ay saka matatanggap ang kanilang registration sticker o license plate.
Ayon naman kay LTO legal special assistant to the assistant secretary Atty. Alex Abaton, tinitignan na ng ahensiya ang mga feature ng online renewal ng driver’s license pati na rin online registration ng mga motor vehicles.