Aabot sa anim naraang kilo ng mga bawang mula sa Batanes ang naideliver na sa Metro Manila sa tulong ng Department of Agriculture (DA).
Ayon sa DA, idineliver mula Itbayat, Batanes patungo sa DA Kadiwa Center sa Quezon City ang mga nabanggit na bawang upang hindi umano mabulok sa pagkakaimbak nito.
Layunin nitong matulungan ang mga magsasaka na masolusyonan ang sobrang ani ng mga bawang sa pamamagitan narin ng agribiz program ng ahensya.
Ibinagsak presyo na ng mga magsasaka ang presyo ng kanilang inaning luya sa Cutar, Aritao, Nueva Vizcaya.
Nabatid na nasa P100 kada 5 kilo nalang o maglalaro sa P20 ang presyo sa kada kilo ng luya para lamang maubos at hindi mabulok.
Ayon sa mga magsasaka sa nabanggit na lugar, mas pipiliin nalang nilang ibagsak-presyo ang kanilang inaning luya kaysa masayang at tuluyang hindi mapakinabangan ang kanilang pinagpaguran.
Sinabi pa ng mga magsasaka na ang isa pa sa mga dahilan kung bakit nila ibinagsak presyo ang halaga ng mga luya ay dahil nagkasabay-sabay ang pag-aani ng mga kapwa nila magsasaka sa bayan ng kasibu kaya’t dumami ang produksiyon nito.
Dahil dito, maraming netizen ang naawa at nanawagan na suportahan ang mga magsasaka at bilhin nalang umano ng mga mall at supermarkets ang sobrang ani na luya ng mga magsasaka sa nasabing lugar.
Samantala, umaasa naman ang mga magsasaka na matutulungan sila ng Department of Agriculture (DA) na masolusyonan ang sobrang ani ng mga luya sa kanilang lugar.
Ikinatuwa ng mga tsuper ng jeep at taxi drivers ang patuloy na pagbaba ng presyo ng langis sa international market.
Nabatid na epektibo na bukas ang panibagong serye ng oil price rollback na malaking tulong para sa mga driver.
Sa pag-iikot ng DWIZ sa Cubao Quezon City, inihayag ng ilang tsuper, na ito na ang sagot sa kanilang problema sa boundary, at panggastos sa kanilang pang-araw-araw na pagkain.
Dahil dito, mas nabuhayan ang mga driver ng jeep at taxi dahil mataas na ang kanilang tiyansa na kumita ng mas malaki matapos ang sunod-sunod na taas-presyo ng langis.
Umaasa naman ang mga driver na magpapatuloy pa ang pagbaba sa presyo ng produktong petrolyo, sa mga susunod pa na linggo.
Asahan na bukas ang panibagong tapyas-presyo sa kada litro ng diesel at kerosene ng ilang kumpaniya ng langis.
Maglalaro sa P4 hanggang P4.30 ang magiging tapyas-singil sa kada litro ng diesel; papalo naman sa P4.40 centavos hanggang P4.60 centavos ang magiging bawas-singil sa kada litro ng kerosene.
Samantala, posible namang tumaas sa 30 centavos hanggang 60 centavos ang presyo sa kada litro ng gasolina.
Ayon sa Department of Energy (DOE), malaking epekto ang pagbaba ng piso kontra dolyar sa pagbabago ng presyo ng produktong petrolyo.
Nagbabala naman ang ilang eksperto na posibleng tumaas din ang presyo ng diesel pagpasok ng taglamig sa Europe at America dahil ito umano ang ginagamit bilang heating fuel na pamalit sa natural gas.
Aarangkada na ngayong araw ang limang-araw na online career fair na ilulunsad ng Civil Service Commission (CSC) at Jobstreet para sa mga pilipino.
Aabot sa 3,314 na trabaho sa gobyerno ang naghihintay para sa mga pinoy na nais magkaroon ng hanapbuhay.
Ang naturang programa ay bilang selebrasyon ng ika-isandaang at dalawampu’t dalawang anibersaryo ng Philippine Civil Service na tatagal hanggang Biyernes, September 23 na lalahukan ng isangdaan at tatlumpu’t isang ahensiya ng gobyerno.
Ayon kay CSC Commssioner Aileen Lizada, kabilang sa mga bakanteng posisyon ay ang revenue officer, admin officer, guidance counselor, admin aide, admin assistant, project development officer, engineer, nurse, medical specialist, medical officer, accountant, at planning officer.
May mga posisyon ding hindi na nagre-require ng civil service eligibility at entitled sa mga benepisyo ang lahat ng mag-aapply, pero kapag nasa plantilla position, ay regular na agad.
Para makapag-apply, kailangan munang may account sa jobstreet.com.
Inaasahan namang maraming pilipino ang mahihikayat na mag-apply lalo na’t nasa gitna parin ng pandemic ang bansa at mataas parin ang presyo ng mga pangunahing bilihin sa merkado.
Pansamantalang pinaiiwas ng embahada ng Pilipinas sa Israel ang mga pilipino roon na magtungo sa West Bank at iba pang lugar hanggang Setyembre a-27.
Sa gitna ito ng lumalalang tensyon sa pagitan ng Israelis at Palestinians na nagsimula pa noong nakaraang linggo.
Kabilang sa mga lugar na dapat iwasan ng mga pinoy sa Israel ay ang Bethlehem, Jericho at Hebron sa West Bank; Temple Mount, Damascus Gate, Herod’S Gate, Al Wad Road, Musrara Road, bahagi ng silangang Jerusalem, Golan Heights; at mga lugar na malapit sa border ng Lebanon at Gaza.
Bukod pa dito, pinaiiwas din ang mga pinoy sa Israel na sumakay sa public tranportation at huwag lapitan ang mga israeli security forces na naka-deploy sa ilang sensitive areas.
Welcome sa ilang grupo ng mga jeepney operators ang pag-apruba ng LTFRB, sa petisyong taas-pasahe sa mga pampublikong sasakyan.
Ito ay matapos itaas ng LTFRB sa P12 ang minimum fare sa mga traditional na dyip, P14 sa modern jeepneys; 13 pesos sa mga ordinary city bus; P15 sa mga air-conditioned city bus; P45 sa mga taxi at sedan-type na tnvs o transportation network vehicle service; at P55 naman sa mga auv/suv-type na tnvs.
Ayon kay Pasang Masda President Obet Martin, malaking tulong ang naturang desisyon sa gitna ng pagtaas ng presyo ng produktong petrolyo.
Agad namang nagpaalala si Martin sa kanilang mga miyembro na hindi pa maaaring ipatupad ang fare hike, dahil hinihintay pa ang opisyal na fare matrix mula sa LTFRB.
Samantala, maliban sa Pasang Masda, nakukulangan naman ang Liga ng Transportasyon at operators sa Pilipinas (LTOP) sa inaprubahang taas-pasahe.
Sa panayam ng DWIZ, iginiit ni Orlando Marquez, presidente ng LTOP, na imbes na itaas sa dose pesos ang minimum fare na pasahe sa mga dyip, dapat ay itaas ito sa disi-sais.
Sisimulan na bukas ng Commission on Elections (COMELEC) ang pag-iimprinta ng opisyal na balota para sa 2022 Barangay at Sangguniang Kabataan Elections (BSKE) sa Disyembre.
Ayon kay COMELEC chairperson George Garcia, nakatakdang matapos ang isang buwang pag-iimprinta sa Oktubre 20, habang hinihintay ang desisyon sa panukalang ipagpaliban ang nasabing eleksyon.
Unti-unti na rin aniyang iginagawad ng ahensya sa mga supplier nito ang ibang election materials na nakatakdang bayaran matapos ma-ideliber.
Tiniyak naman ni acting spokesperson John Rex Laudiangco na hindi masasayang ang mga naturang suplay sakaling maantala ang halalan.
Nagpahayag ng suporta ang isang infectious disease expert sa panukala ng Department of Health (DOH) na ang pagtukoy sa terminong “fully vaccinated” laban sa COVID-19.
Ayon kay Dr. Rontgene Solante, hindi gagana ang herd immunity na target ng bansa kung ibabase lamang sa dalawang dose ng COVID-19 vaccine na kahulugan din ng fully vaccinated, dahil sa mga lumalabas na iba’t ibang variant at sub-variant ng virus.
Una nang ipinayo ni Pangulong Ferdinand Marcos Jr. na huwag baguhin ang naturang kahulugan kung sino ang maaaring ituring na ganap na nabakunahan laban sa COVID-19 dahil magdudulot ito ng kalituhan sa publiko.
Inihayag ng National Citizens’ Movement for Free Elections (NAMFREL) na maayos at mapayapa ang isinagawang plebisito sa Maguindanao.
Ayon kay NAMFREL chairman Lito Averia, wala silang naitalang incident report o mga hindi kanais-nais na insidente.
Samantala, sinabi rin ni Comelec chairperson George Garcia na hindi lamang naging generally smooth at peaceful ang naturang plebisito kundi ito rin ay may mataas na voter turnout.