Naglabas ng anunsyo ang Philippine National Railways kaugnay sa pansamantalang pagsuspinde sa ilang biyahe ng tren ngayong araw.
Kasunod ito ng naranasang magnitude 4.4 na lindol na naitala sa Real, Quezon kagabi.
Suspendido ang byahe ng Tutuban – Alabang, Alabang – Tutuban, Tutuban – Gov. Pascual, at Gov. Pascual – Tutuban.
Gayundin ang biyahe ng tren mula Gov. Pascual – Bicutan, Bicutan – Gov. Pascual, Lucena – San Pablo, at San Pablo – Lucena.
Arestado ang dalawang hinihinalang karnaper habang nakumpiska naman isang nakaw na sasakyan sa Meycauayan City, Bulacan.
Sa report na nakarating sa Camp Crame, kinilala ang mga suspek na sina Renrhod Butchayo at Marco Tiangco del Sol.
Nakatanggap ng sumbong ang Bulacan PNP ukol sa binebentang sasakyan sa Meycauayan kaya’t nag-deploy ito ng mga operatiba na siyang sumita sa dalawa habang lulan ng sasakyan na walang plaka.
Nang i-verify naman sa Highway Patrol Group Vehicle Information Management System (VIMS), lumitaw na ninakaw ang nasabing sasakyan sa Antipolo City noon pang Feb. 10, 2020.
Pinuri naman ni PNP Chief Gen. Rodolfo Azurin Jr. ang matagumpay na operasyon na aniya’y resulta ng mahusay na koordinasyon ng iba’t ibang ahensya ng gobyerno.
Maaaring mag-apply ng panibagong fare matrix ang mga driver at operator ng mga Public Utility Vehicles bilang requirement sa dagdag-pasahe simula Oktubre a –3.
Nilinaw ni LTFRB board member, Atty. Mercy Jane Paras-Leynes na kailangang nakapaskil ang fare matrix ng sa mga PUV bago maningil ng mas mahal na pasahe.
Hinimok naman ng LTFRB official ang mga mananakay na isumbong ang mga tsuper na magpapatupad agad ng fare increase bago mag-Oktubre a –3.
Maaari anyang tumawag sa LTFRB 24/7 hotline 1342 o magpadala ng mensahe sa LTFRB official facebook page o bumisita sa official website ng ahensya.
Aminado naman si Leynes na napakahirap i-balanse ang interes ng mga operator o driver at commuter pero pinipilit ng ahensya na magkaroon ng rasonableng pasahe na patas para sa lahat.
Sa desisyon ng LTFRB, magiging P12 na ang minimum fare sa traditional jeep mula sa kasalukuyang onse habang P14 sa modern jeepney.
Muling nakapagtala ng mahigit 900 bagong kaso ng Omicron subvariants ang Department of Health (DOH).
Batay sa sequencing results ng DOH, aabot sa 912 ang naitalang Omicron lineages at other lineages mula September 16 hanggang 19 kabilang na dito ang 688 na BA.5 subvariant kung saan, 11 ay mga Returning Overseas Filipinos.
Bukod pa dito, mayroon ding 16 na bagong BA.4 subvariant cases; habang 110 naman ang na-categorize bilang other sublineages.
Ayon sa ahensya, pinakamaraming naitala ay mula sa Metro Manila na mayroong 126 na mga bagong kaso; sinundan ng Region 6 na mayroong 104; at Region 2 na may 75 new cases.
Naniniwala si University of the Philippines-Philippine General Hospital UP-PGH Emergency Medicine chairperson at dating adviser ng National Task Force against COVID-19 Dr. Ted Herbosa na posibleng makapasok ng Pilipinas ang iba pang variants ng COVID-19 sakaling ipatupad ang mas maluwag na border restrictions.
Kasunod ito ng pahayag ni Department of Health officer-in-charge at Undersecretary Maria Rosario Vergeire na kanilang pinag-aaralan ang suhestiyon kasama ang Inter-Agency Task Force (IATF) hinggil sa naturang usapin.
Ayon kay Dr. Herbosa, masiyado pang ‘risky’ kung magluluwag ng mga restriksyon sa mga entry at exit points sa bansa.
Kumpiyansa si Herbosa na mas mataas ang tiyansa na ma-infect ang isang indibidwal lalo na kung hindi pa ito nahahawaan ng variant ng COVID-19.
Target ng National Printing Office (NPO) na makapag-imprenta ng aabot sa 3 milyong mga balota kada-araw para sa Barangay at Sangguniang Kabataan (BSK) elections.
Ayon kay Commission on Elections (COMELEC) chairman George Garcia, mahigit 91 million na mga balota ang kakailanganin para sa eleksiyon kung saan, aabutin ng limang araw ang verification process nito.
Tiwala si Garcia, na masisimulan na ng Comelec ang pagpapadala sa mga balota at election paraphernalias sa ikalawang linggo ng Nobyembre.
Siniguro naman ng poll body, na handa ang kanilang ahensya para sa local elections habang wala pang batas na mag-uutos para sa pagpapaliban nito.
Kinuwestiyon ng kampo ng modelong si Denice Cornejo ang pagkaka-kustodiya ng aktor at komediyanteng si Vhong Navarro sa detention facility ng National Bureau of Investigation (NBI).
Kasunod ito ng inilabas na ikalawang Warrant of Arrest ng Taguig Regional Trial Court (RTC) Branch 69 laban kay Navarro para sa Rape charges na non-bailable o walang inirekomendang piyansa.
Ayon sa Abogado ni Cornejo na si Atty. Ferdinand Topacio, si Navarro ay dapat nakadetine sa Taguig City Jail alinsunod umano sa batas.
Iginiit ni Topacio na ang mga nasa kostudiya lamang ng NBI ay ang mga naarestong caught in the act o ang kasong isinasailalim sa imbestigasyon ng naturang ahensya.
Handa ang Land Transportation Franchising and Regulatory Board (LTFRB) na tugunan ang iba pang pangangailangan ng mga Public Utility Vehicle (PUV) drivers at operators sa bansa.
Kasunod ito ng pag-apruba ng ahensya sa hiling ng grupo ng transportasyon kaugnay sa dagdag-singil sa pamasahe ng mga pasahero.
Ayon kay LTFRB Board Member atty. Mercy Jane Paras-Leynes, pinag-aaralan na ng kanilang ahensya ang pagda-dagdag ng taon o validity ng kanilang prangkisa bilang tugon sa halos dalawang taong tigil-pasada ng ilang mga tsuper.
Iginiit din ni Leynes na hindi band-aid solution ang ipinatupad na fare hike sa public transportation dahil ito ay permanente at pangmatagalan.
Binabalangkas na ng Department of Health (DOH) ang rekomendasyong mas luwagan ang border restrictions sa bansa.
Ayon kay Health officer-in-charge Undersecretary Maria Rosario Vergeire, malaking tulong at mas mabilis aangat ang eknomiya ng bansa kung magluluwag ng restriction sa mga dayuhang biyahero na nais magpunta sa Pilipinas.
Iginiit ni Vergeire na may mga bansa narin ang nagluwag at nag-alis ng restrictions kahit nahaharap pa rin sa banta ng COVID-19 pandemic ang buong mundo.
Sinabi pa ni Vergeire na kanilang pag-uusapan sa linggo kasama ng Inter-Agency Task Force (IATF) kung dapat nabang alisin ang border restriction dahil kailangang makabawi ang bumagsak na ekonomiya ng bansa.
Nagkaroon ng tensiyon sa pagitan ng dalawang senador sa gitna ng usapin ng kakulangan sa suplay ng asukal sa bansa.
Kasunod ito ng paglutang ng mga bagong dokumento na sumusuporta umano sa alegasyon ng nasabing isyu.
Sa naging pagdinig ng Senate Blue Ribbon Committee, kinuwestiyon ni Senator Risa Hontiveros ang report sa kakulangan ng suplay ng asukal batay narin sa datos ng Sugar Regulatory Administration (SRA) na ikinabahala naman ng National Economic and Development Authority (NEDA).
Ito ay dahil sa limitadong suplay ng asukal at pagtaas ng presyo ng refined sugar kung saan, tinukoy ng Senadora ang ipinadalang liham ni dating NEDA chief Karl Kendrick Chua kay dating Finance secretary Carlos Dominguez bilang tugon sa komento sa concern ng COCA-COLA sa supply gap na 116,000 metric tons ng asukal.
Agad naman itong sinagot ni Senator Francis Tolentino at iginiit na hindi niya alam ang liham na tinutukoy ni Hontiveros at hindi ito bahagi ng Committee report.
Dagdag pa ni Tolentino, hindi din ito natalakay sa pagdinig ng Senate Blue Ribbon Committee sa Sugar Order no. 4 para sa importasyon ng 300,000 metric tons ng asukal.
Sa kabila nito, tiwala si Hontiveros na lalabas ang katotohanan sa kontrobersyal na usapin ng sugar shortage sa bansa.