NATIONAL NEWS

Magtutungo sa Japan sa susunod na linggo si Vice President Sara Duterte upang daluhan ang state funeral ni dating Japanese Prime Minister Shinzo Abe.

Ginawa ni VP SARA ang anunsyo matapos ang ginawang pagbisita ni  Japanese Ambassador to the Philippines Kazuhiko Koshikawa sa Office of the Vice President kahapom.

Sinabi ng pangalawang Pangulo na kanyang dadalhin ang condolence letters mula kay presIdent Ferdinand Marcos Jr., at ama nito, na si dating Pangulong Rodrigo Duterte.

Binaril at napatay si Abe habang nangangampanya sa Nara, Japan noong July 8, 2022.

Pinaiimbestigahan na ni Senate Committee on Migrant Workers chairman Sen. Raffy Tulfo ang pagpapasuot umano ng Personal Protection Equipment (PPEs) sa ilang Overseas Filipino Workers na papaalis ng Pilipinas.

Sa panayam ng DWIZ, binigyang diin ni Tulfo na hindi dapat ito ginagawa dahil tila kinakawawa at diskriminasyon ito sa mga OFW.

Iginiit ni Tulfo na posibleng pineperahan lamang ang mga OFW ng mga manpower agency.

Una na ring kwinestyon ng ilang Senador ang umano’y pagpapagamit ng PPE’s sa mga OFW.

Sinabi pa ni Tulfo na dapat na magpaliwanag at managot ang nasa likod ng pagpapasuot ng PPE’s sa mga OFW.

Nakapagtala na ang Valenzuela City ng 1,743 na kaso ng dengue.

Naitala mula January 1 hanggang September 17, 2022, ang mga kaso, na 148% ang itinaas sa kaparehong panahon  ng 2021.

Sa nasabing bilang, 1,037 ang probable cases, 706 ang suspected cases habang tatlo naman ang nasawi sa dengue sa lungsod.

Kaugnay nito, pinayuhan ng Valenzuela City LGU ang mga residente na agad na humingi ng atensyong medikal sa pinakamalapit na health station o ospital kung nakararanas ng lagnat sa loob ng dalawang araw.

Isang tao ang namamatay sa gutom kada apat na segundo sa 19,700 katao kada araw, babala ng mahigit dalawang daan Non-Government Organization (NGO).

Sa isang open letter para sa world leader na nagtipon sa New York  para sa United Nations General Assembly, nasa higit 200 na organisasyon mula sa 75 bansa ang nagpahayag na tumataas na antas ng kagutuman sa mundo.

Mahigit tatlong milyon katao ang nakakaranas ng matinding gutom na higit sa doble mula noong 2019.

Dahil dito, nanawagan ang NGO na tutukan ng mga lider ang iba’t ibang bansa ang agarang food support sa mga pamilyang nangangailangan.  —sa panulat ni Jenn Patrolla

Ipinaaresto na ng Department of Budget and Management (DBM) sa Department of Interior and Local Government (DILG) at National Bureau of Investigation (NBI) ang mga scammer na sinasabing nagsosolicit sa mga Local Government Unit (LGU).

Giit ni DBM secretary Amenah Pangandaman, nagpapakilala umanong mga kawani ng DBM na nanghihingi ng pera sa mga opisyal ng local government.

Aniya, dapat nang madakip ang mga nagpakilalang kawani ng ahensya para hindi na muling makapambiktima ng mga opisyal ng LGU.

Nanawagan ang ahensya sa mga Pinoy na makipag-transact sa official channels ng DBM para makaiwas sa scam. —sa panulat ni Jenn Patrolla

Makikipagtulungan ang Chinese government sa gobyerno ng Pilipinas para sa pagpapatupad ng batas sa krimen na may kinalaman sa Philippine Offshore Gaming Operators (POGO).

Ayon kay Chinese Ambassador to the Philippines Huang Xilian, maninindigan ang Chinese government na kontrahin ang sugal.

Nakipagpulong naman si Justice secretary Jesus Crispin Remulla kay Huang na ipagpapatuloy ng gobyerno ng Pilipinas na tapusin ang iligal na aktibidad.

Mahigit 175 kompanya ng POGO ang ipinasara at nawalan ng trabaho ang 40K Chinese.

Kasalukuyang nailigtas na ang Chinese citizens at nasa Bureau of Immigration Detention Facility sa Taguig City.

Ang Chinese Embassy sa Pilipinas ang mangangasiwa ng deportasyon. —sa panulat ni Jenn Patrolla