NATIONAL NEWS

Isinusulong ni Senator Jinggoy Ejercito Estrada na gawing krimen ang pagpapalaganap ng mga maling balita o impormasyon o fake news.

Sa paghahain ng Senate Bill no. 1296, sinabi ni Estrada na layon ng kaniyang panukala na masugpo ang paglaganap ng disinformation sa internet sa pamamagitan ng pagsama nito sa mga itinuturing na krimen o cybercrime sa ilalim ng Republic Act (RA) no. 10175 o ang Cybercrime Prevention Act of 2012

Giit ni Estrada, masyado ng talamak ang mga click baits, propaganda at pagmamanipula ng mga lehitimong news segments para makapagpalaganap ng maling impormasyon kaya mahirap na matukoy kung alin ang totoo sa mga pekeng balita.

Iminungkahi ni Estrada na amiyendahan ang section 3 ng RA 10175 para isama ang “fake news” sa definition ng mga termino at pagsama nito sa section 4 o ang listahan ng cybercrime offenses.

Sa kanyang panukala, maituturing na krimen ang paglikha at pagpapakalat ng pekeng balita na ginawa sa pamamagitan ng isang computer system. – mula sa ulat ni Cely Ortega-Bueno (Patrol 19)

Hinimok ni Senador Christopher Bong Go ang Philippine Amusement and Gaming Corporation (PAGCOR) at Philippine Charity Sweepstakes Office (PCSO) na i-maximize ang kanilang public resources para masuportahan ang healthcare at sports development programs.

Ayon kay Senator Go, alinsunod sa Republic Act no. 6847 o ang Philippine Sports Commission Law, mandato ng PAGCOR na i-remit ang five percent ng kita nito sa National Sports Development Fund.

Kasabay nito, pinuri ng mambabatas ang PAGCOR sa kanilang commitment at mahalagang kontribusyon sa covid-19 response.

Pinasalamatan din ni Go ang PCSO sa pagsuporta sa Malasakit Center Program.

Hiniling din ng mambabatas sa mga opisyal ng PCSO na tiyaking naipagpapatuloy ang pagbibigay tulong sa publiko sa pamamagitan ng malasakit center. –  sa ulat ni Cely Ortega-Bueno (Patrol 19)

Patuloy na bumababa ang lebel ng tubig sa Angat dam sa kabila ng patuloy na pag-ulan sa Metro Manila.

Ayon kay National Water Resources Board (NWRB) Executive Director Dr. Sevillo David, nasa 176.17 meters na lamang ang lebel ng tubig sa Angat dam, mababa ito ng halos 4 meters sa minimum operating level na 180 meters.

Gayunpaman, nananatili aniyang sapat ang suplay ng tubig sa Metro Manila pero pinaghahandaan nila sa ngayon ang pangangailan sa mga susunod na araw, mga buwan at sa susunod na taon.

Samantala, sinabi ni David na kung kailangang magkaroon ng adjustment sa alokasyon ay magkakaron sila ng karampatang abiso sa publiko partikular na sa Metro Manila.

Abala si Pangulong Ferdinand Marcos Jr. Sa ikaapat na araw na working visit sa Estados Unidos.

Kasunod ito ng ginawang pagharap at pakikipag usap ni Pangulong Marcos sa sideline ng 77th session ng United Nations General Assembly sa New York sa mga miyembro ng United States – Association Of Southeast Asian Nations (ASEAN) business council at us chamber of commerce.

Sa event na ito muling binanggit ng pangulo ang mga prayoridad ng pilipinas na una na nitong sinabi sa high level general debate ng 77th UNGA

Binigyang diin din dito ng punong ehekutibo ang bilateral economic at investment agenda ng pamahalaan.

Isang premier advocacy organization ang us-asean business council na nag ooperate sa ASEAN Region.- sa ulat ni Jopel Pelenio (Patrol 17)

Paiigtingin pa ng Land Transportation Office (LTO) ang pag-iinspeksyon sa mga terminal kasabay ng random drug tests sa mga drayber ng pampublikong sasakyan.

Ito ay para matiyak ang kaligtasan ng mga pasahero at motorista.

Sa ilalim ng Section 15 ng Republic Act no. 10856 o ang Anti-Drunk and Drugged Driving Act of 2013 isinasagawa sa buong bansa ang random terminal inspection at quick random drug test sa PUV drivers.

Batay sa datos ng LTO, umabot sa 558 road crash incidents ang naitala mula January hanggang August 2022.

Nasa 476 drayber naman ang nagpositibo sa alcholic intoxication o nasa ilalim ng impluwensya ng alak kung saan lumalabas sa datos na 17 ang nasawi habang 281 ang sugatan dahil sa aksidente sa kalsada sa mga nasabing buwan.

Samantala, muling nagpaalala ang LTO sa publiko na huwag uminom ng alak kung magmamaneho dahil magdudulot lamang ito ng panganib.

Mas lumala pa ang nararanasang rotational brownout ng Occidental Mindoro sa gitna ng nagbabadyang power shotdown sa lugar.

Sa panayam ng DWIZ, nilinaw ni Vice Governor Diana Apigo-Tayag ng nasabing lalawigan na apat na oras kada araw lamang sila may suplay ng kuryente.

Paliwanag niya, 14 megawatts lamang din kasi ang ibinibigay na suplay ng kuryente ng Occidental Mindoro Consolidated Power Corporation (OMCPC).

Giit pa ni Tayag na napalaking dagok sa kanilang lalawigan ang nararanasang brownout dahil apektado nito ang sektor ng agrigultura.

Nilinaw naman ng vice governor na nagdeklara na sila ng state of power crisis sa kanilang probinsya kung saan nanawagan rin ito sa mga opisyal na tulungan sila kaugnay sa naturang usapin.

Isusulong ng Department of Foreign Affairs (DFA) ang visa free entry ng mga Pilipino sa Japan.

Sa gitna na rin ito ng rekomendasyon nina Senate President Juan Miguel Zubiri at Sagip Party List Representative Rodante Marcoleta sa isinagawang pagdinig ng Commission on Appointments Committtee on Foreign Affairs na mapayagan ng Japanese government ang pagpasok ng mga Pinoy sa nasabing bansa ng walang visa.

Tiniyak ni Ambassador Extraordinary and Plenipotentiary to Japan Mylene Garcia-Albano ang naturang rekomendasyon ng mga mambabatas.

Sa idinaos na bilateral talks ng Pilipinas at Japan kabilang sa priority ang visa free entry, food security, energy, health, education, trade and investment at tourism.

Pormal nang nai-turn over ng Civil Aviation Authority of the Philippines (CAAP) ang anim na airports sa Bangsamoro Autonomous Region in Muslim Mindanao (BARMM).

Kabilang sa mga paliparang ito ang Cotabato Airport sa Datu Odin Sinsuat, Maguindanao del Norte Sanga-Sanga at Mapun Airports sa Tawi Tawi, Jolo Airport sa Sulu at Wao at Malabang Airports sa Lanao del Sur.

Nakasaad sa Memorandum of Agreement ng CAAP at BARMM na ang Bangsamoro Ministry of Transportation and Communications sa pamamagitan ng Bangsamoro Airport Authority ang magti-take over sa mga assets gayundin sa management at supervision sa mga airport.

Dumipensa ang isang grupo ng UV express drivers sa iginigiit nilang pisong dagdag sa pasahe.

Ito ay matapos aprubahan ng Land Transportation Franchising and Regulatory Board (LTFRB) ang dagdag pasahe sa mga pampublikong sasakyan tulad ng jeep, taxi at Transport Network Vehicle Services (TNVS) epektibo sa October 4  maliban lamang sa UV express.

Ayon kay George Jalandoni, Executive Secretary ng Alliance of Uv Express Association of the Philippines  hindi na nila talaga kakayanin ang presyo ng krudo kaya’t humihingi sila ng pisong dagdag sa pasahe na sa tingin naman nila ay makatuwiran.

Tutumbasan naman aniya nila ng mas magandang serbisyo ang aaprubahang dagdag pasahe sa mga sumasakay sa UV express.

Umapela pa si Jalandoni sa publiko na unawain sila dahil kailangan din naman nilang makaagapay sa pandemya.

Sinabi ni Jalandoni na naibalik na ang halos lahat ng kanilang pre-pandemic route subalit hindi pa bumabalik ang dating dami ng kanilang mga pasahero.