NATIONAL NEWS

Nasa kustodiya na ng Philippine National Police (PNP) ang dalawang menor-de-edad na umano’y nambugbog at nanaksak sa kapwa menor-de-edad sa harap ng isang paaralan sa Barangay Bungad, Quezon City.

 Ayon kay Quezon City Police District (QCPD) Director Brig. Gen. Nicolas Torre III, naghihintay lamang sa harap ng Juan Luna High School ang 14 anyos na biktima dakong alas-siyete a-kinse ng gabi, nang lapitan ito ng dalawang menor-de-edad na lalaki na edad 13 at 15.

 Pinagsusuntok ng dalawa ang biktima, hinampas ng baseball bat sa ulo at sinaksak pa na nasaksihan ng kapatid nito.

 Agad namang isinugod sa Quezon City General Hospital ang biktima ng rumespondeng Barangay San Antonio Public Safety Officers habang nagsagawa ng follow-up operation sa mga suspek.

 Sa ngayon, nakikipag-ugnayan na ang pnp sa Quezon City Social Welfare and Development para sa proper disposition ng dalawang minors.

Inilunsad ng Overseas Workers Welfare Administration (OWWA-Hong Kong) ang telemedicine helpline para sa mga pilipino doon.

Ito’y dahil pa rin sa patuloy na pagtaas ng mga kaso ng COVID-19 infection sa Hong Kong.

Pinapayuhan naman ang mga Overseas Filipino Workers (OFWs) na magparehistro lamang sa online para maka-avail ng libreng medical consultation.

Nakatakda namang idaos sa linggo, September 25 ang naturang telemedicine sa pamamagitan ng zoom.

Tuloy pa rin ang Commission on Elections (COMELEC) sa pag-iimprenta ng mga balota sa susunod na linggo.

Ito ang sinabi ni COMELEC Acting Spokesperson Atty. John Rex Laudiangco kahit naipasa na ang pagpapaliban ng Barangay at Sangguniang Kabataang Eleksyon (BSKE).

Dagdag ni Laudiangco, tuloy pa rin ang kanilang ginagawa batay sa kalendaryo ng paghahanda para sa BSKE.

Aniya, kaya nilang tapusin sa loob ng tatlumpung araw ang pag-imprenta ng 91.2 -M balota dahil isang milyong balota kada araw ang kanilang output.

Kung isasama aniya ang pag-imprenta ng verification, accountable forms at election returns ay kakayanin itong matapos maimprenta sa loob ng 45 araw.

Maging ang pamimili aniya ng mga gagamiting materyales para sa eleksyon ay naka-kalendaryo na tulad ng indelible ink, ballpen, folders at iba pa at lahat ng ito ay matatapos aniya lahat sa Oktubre ng taong ito.

Nagsuspinde na ng klase para bukas, (September 23) ang Cavite City.

 Ayon sa Cavite Governor Jonvic Remulla, walang klase sa lahat ng lebel sa lugar dahil sa hindi magandang lagay ng panahon dulot ng bagyong Karding.

 Sa ngayon, ang Cavite pa lamang ang nagpapatupad ng suspensiyon sa mga local government units (LGUs) sa bansa.

Pinaiimbestigahan ni Senator Raffy Tulfo sa Land Registration Authority (LRA) ang mga kaso ng land grabbing sa palawan at iba pang lalawigan.

Sinabi ni Tulfo na ang lubhang naaapektuhan ay ang mga magsasaka at katutubo.

Maliban dito hinikayat ni Tulfo ang pamunuan ng LRA na aksyunan ang malawakang korapsyon sa ahensiya.

Karamihan aniya sa mga reklamo sa kanya ay mula sa mga magsasaka na nagsangla ng titulo ng lupa dahil sa matinding pangangailangan at kung tutubusin na nila ay malalaman na wala na sa kanilang pangalan ang titulo.

Nakapagtala ang Philippine National Police ng 83% recovery efficiency para sa mga nakaw na sasakyan at motorsiklo.

Batay sa datos ng PNP Directorate for operations, sa 60 carnapping cases, mula September 1 hanggang September 17 ay nasa 50 stolen vehicles ang narekober ng mga awtoridad.

Ayon kay PNP Chief General Rodolfo Azurin Jr., patunay ito na epektibo ang mga hakbang na ginagawa ng police organization upang mapigilan ang mga masasamang-loob.

Magugunitang lumabas din sa datos ng pnp crime research analysis center na sumadsad ang index crimes sa 34 na kaso noong lunes mula sa 83 kaso noong linggo.

Kabilang ang murder, homicide, physical injury, rape, robbery, at carnapping sa nasa hanay ng index crimes. - sa ulat ni Gilbert Perdez

Naselyuhan na ang pagmamahalan ng 11 persons with disabilities (PWDs) couples sa pamamagitan ng tulong ng Taguig City government sa Lakeshore Hall sa Barangay Lower Bicutan.

Binigyang-diin ni Taguig City Mayor Lani Cayetano na pinatuayan nang ginanap na kasalang bayan na walang boundaries ang pagmamahalan kung saan tatlo sa mga pares ay kapwa PWDs, habang siyam na PWDs ang ikinasal sa mga walang kapansanan.

Sagot ng lokal na pamahalaan ang singsing, Arrhae, wine, cake, at venue ang nasabing event na inorganisa ng persons with Disabilities Affairs Office.

Ang nasabing kasalang bayan ay may temang “sa Lungsod ng Taguig, Kasalang Bayan para sa mga Taong may Kapansanan, Pwede!” at patunay ito na dapat makamit ng mga PWD ang kanilang karapatan tulad ng iba.

Photo courtesy: I Love Taguig

Ipaprayoridad ng Department of Labor and Employment (DOLE) ang pagtanggal ng child labor sa bansa sa 2023.

Ayon kay DOLE Secretary Bienvenido Laguesma, iniharap na niya sa kongreso ang mga proyekto at programa na gustong pagtuunan ng pansin ng kagawaran.

Kabilang dito ang implementasyon ng Philippine Program Against Child Labor (PPACL) na naglalayong baguhin ang buhay ng mga child laborer, kanilang pamilya, at mga komunidad sa pamamagitan ng pagbibigay proteksyon.

Sa datos ng International Labour Organization (ILO), nananatili pa ring rason ang kahirapan kung bakit nagtatrabaho ng maaga ang mga bata.

Samantala, hinimok ni laguesma ang patuloy na suporta ng stakeholders upang mapadali ang pagsasakatuparan ng child-labor-free sa Pilipinas.

Hinikayat ni Senator Pia Cayetano ang mga kapwa senador na busisiin ang pag-oobliga sa mga OFW na magsuot ng Personal Protective Equipment o PPEs kasama pa ang face shields, gloves at footsies habang naghihintay ng kanilang flight sa Ninoy Aquino International Airport.

Ayon kay Cayetano, mistulang panahon na naman ng kasagsagan ng COVID- 19.

Binigyang diin ng senadora na wala namang pagkakaiba ang pagsusuot ng regular na sapatos at footsies.
Nais matukoy ng mambabatas kung requirement sa mga OFW ang pagsusuot ng kumpletong PPE.

Nangako anya si Department of Migrant Workers Secretary Toots Ople na aalamin ang bagay na ito.

Ipinabatid naman ni Senator Joel Villanueva, maituturing itong diskriminasyon sa mga OFW at dapat mapatigil at kung mayroong nagkamali ay dapat na papanagutin.

Ipinaalala ni Villanueva na bahagi ng pagbangon ng ekonomiya ang pagsisikap ng mga OFW kaya hindi anya dapat dagdagan ang kanilang paghihirap. - sa ulat ni Cely Ortega-Bueno ( Patrol 19)

Matagumpay na naidaos ang KIA Batangas ground breaking ceremony ngayong araw sa Batangas City Grand Terminal, Diversion Road Brgy. Alangilan Batangas City.

Pinangunahan ito ng mga local government official kabilang na sina Batangas 5th District Representative Marvey Mariño, dating Batangas City Mayor Dondon Dimacuha, at si President of Prime Legacy Motors Mr. Jose Antonio V. Rivera.

Habang pinangunahan naman ni father vicente cisneros ang blessing ng naturang groundbreaking ceremony.

Inihayag naman ni Congressman Mariño sa kaniyang talumpati ang pagsuporta sa mga nagnanais magtayo ng negosyo sa batangas gayong nagsisimula na muli aniyang mabuhay ang ekonomiya at negosyo.

Habang tiwala naman si dating Batangas Mayor Dondon Dimacuha na uunlad ang mga negosyo sa Batangas gayong magandang lugar aniya ito para sa investment. –  mula sa ulat ni Tina Nolasco (Patrol 11)