NATIONAL NEWS

Iginiit ni Senate Committee on Agriculture Chairman Senador Kiko Pangilinan na mayroong mga circumstantial evidence para paniwalaan na nakikipagsabwatan ang mga Chinese smuggling syndicates sa mga local businessmen sa bansa.

Anya, ito rin ang dahilan kaya protektado sila ng ilang opisyal at tauhan ng Bureau of Customs, NBI, PNP, Department of Agriculture, at maaaring pati rin sa DOJ at Bureau of Immigration.

Dagdag pa ni Sen. Pangilinan, maaaring ihalintulad ang kasalukuyang isyu sa POGO na galing din sa China at may mga kasabwat na mga Pilipino kaya namayagpag sa bansa.

Kaugnay nito, ipinacontempt at ipinakulong na rin ng senador sa Senado ang dalawang opisyal ng Bureau of Customs sa Subic at ang isang broker matapos mapatunayang nagsinungaling sa pagdinig ng Senate Committee on Agriculture hinggil sa pagpupuslit ng mga iligal na agricultural products sa bansa.

—Sa panulat ni Mark Terrence Molave — ulat mula kay Cely Ortega-Bueno (Patrol 19)

Maganda ang itinatakbo ng mga pagdinig ng Independent Commission for Infrastructure.

Ito ang binigyang-diin ni Palace Press Officer Usec. Claire Castro, sa gitna ng mga panawagang bigyan ng ganap na legal authority ang komisyon upang mas magampanan nila ang kanilang mandato.

Paliwanag ng opisyal, sa kasalukuyan ay kinikilala ng lahat, mapa-senador man o kongresista, ang proseso ng ICI, partikular ang pagpapatatawag nito ng pagdinig.

Giit pa ni Usec. Castro, hindi isinasara ng Malacañang ang pinto nito sa mga suhestyong posible pang ikagaganda ng imbestigasyon ng ICI.

—Sa panulat ni Mark Terrence Molave — ulat mula kay Gilbert Perdez (Patrol 13)

Nagbabala ang Department of Budget and Management sa mga supplier at contractor ng gobyerno na hindi na makakalusot ang mga modus gaya ng dummy bidding, palit-pangalan, at palit-ulo sa ilalim ng Republic Act 12009 o ang bagong Government Procurement Law.

Ayon kay Palace Press Officer Undersecretary Claire Castro, bahagi ito ng kautusan ni Pangulong Ferdinand Marcos Jr. na higpitan ang pagbabantay sa paggamit ng pondo ng bayan at tiyaking patas at tapat ang proseso ng bidding sa mga proyekto ng gobyerno.

Paliwanag ng DBM, isa sa mga pangunahing probisyon ng batas ang mandatory disclosure of beneficial ownership information, kung saan kailangang ilantad ng mga kumpanyang sasali sa bidding kung sino talaga ang may-ari o may kontrol sa kanilang operasyon.

Layunin ng naturang hakbang na maiwasan ang conflict of interest at masawata ang sabwatan sa public procurement.

—Sa panulat ni Mark Terrence Molave — ulat mula kay Gilbert Perdez (Patrol 13)

Naninindigan ang Metro Manila Council na wala pa silang nakikitang dahilan para gawing mandatory ang pagsusuot muli ng face mask sa Metro Manila bilang proteksyon laban sa mga influenza-like illnesses.

Ayon kay MMC President at San Juan City Mayor Francis Zamora, nananatiling mababa ang kaso ng lagnat, ubo, at sipon sa San Juan City sa kabila ng pagdedeklara ng Department of Education ng “health break” sa ilang lugar.

Dagdag pa ng alkalde, hindi pa napag-uusapan ng mga mayor sa Metro Manila ang naturang isyu kahit papalapit na ang Undas kung kailan inaasahan ang pagdagsa ng mga tao sa mga sementeryo.

Pagtitiyak naman ni Mayor Zamora, sakaling irekumenda ng Department of Health ang muling pagsusuot ng face mask ay handa namang sumunod dito ang San Juan at iba pang lokal na pamahalaan sa NCR.

—Sa panulat ni Mark Terrence Molave

Magpapakalat ang Philippine National Police ng mahigit dalawampu’t limang libong pulis sa mga pampublikong sementeryo, memorial park, at columbaria sa buong bansa bilang paghahanda sa paggunita ng Undas 2025.

Bukod dito, ayon kay PNP Spokesman Brig. Gen. Randulf Tuaño, magtatayo sila ng mahigit 5,200 police assistance desk.

Makakasama rin sa kanilang operasyon ang mahigit walong libong tauhan mula sa Armed Forces of the Philippines, Philippine Coast Guard, at Bureau of Fire Protection, at mahigit 22,000 force multiplier.

Dahil aabot sa mahigit 56,000 ang kabuuang bilang ng mga ide-deploy na otoridad sa buong bansa bilang bahagi ng full alert status ng mga ito para sa kaayusan at kaligtasan ng publiko.

Siniguro naman ng PNP na mananatili silang alerto sa mga sementeryo, gayundin sa mga terminal at pantalan, lalo na sa inaasahang pagdagsa ng mga biyahero para sa paggunita ng Undas.

 Sa gitna ng isyu sa maanomalyang flood control projects, pumangalawa ang korapsyon sa mga alalahanin ng mga Pilipino nitong Setyembre.

Batay sa pinakahuling survey ng OCTA Research, 31% ng mga Pilipino ang alalahanin ang korapsyon, mas mataas ng 18 points kumpara sa 13% noong Hulyo.

Ayon sa OCTA, ito ang unang beses na nakapasok sa top five national issues ng Tugon ng Masa surveys ang korapsyon.

Nanguna naman sa nasabing survey ang pagkontrol sa tumataas na presyo ng mga pangunahing bilihin at serbisyo na nakakuha ng 48%, bahagyang mas mababa kumpara sa nakaraang 50%.

Bukod sa mga nabanggit, alalahanin din ng mga Pilipino ang access sa abot-kayang presyo ng bigas, gulay, at karne; taas-sahod para sa mga manggagawa; at pagbawas sa kahirapan.

Isinagawa ang survey sa 1,200 male and female adult respondents sa pamamagitan ng face-to-face interviews noong Setyembre 25 hanggang 30.

Tinawag na “destabilization plot” ni retired Philippine Marines Colonel Ariel Querubin ang spekulasyon na tatanggalan ng pensyon ang mga retiradong sundalo na mapapatunayang sumusuporta sa inilulutong kudeta.

Una nang ibinunyag ni Cavite Fourth District Rep. Francisco “Kiko” Barzaga na tatanggalan ni Pangulong Ferdinand Marcos Jr. ng pensyon ang mga retiradong uniformed personnel na kumalas ng suporta sa pamahalaan pero itinanggi ito ng Palasyo.

Sa kabila nito, nilinaw ni Querubin na may proseso ang Armed Forces of the Philippines upang bawiin ang pensyon ng mga retiradong sundalo.

Pinag-iingat naman ng retiradong koronel ang publiko, kabilang ang mga kapwa kawal, sa mga nababasang impormasyon lalo sa social media, na maging mapanuri, iwasang magpadala sa simbuyo ng damdamin, o sa sulsol ng ilang pulitiko na mag-aklas laban sa pamahalaan.

Naniniwala si Bukluran ng Manggagawang Pilipino President Atty. Luke Espiritu na bagamat makatutulong ang pagsasabatas ng panukalang magpapatibay sa pagkakatatag ng Independent Commission for Infrastructure, mas magiging epektibo pa rin ang pagsasabatas sa Anti-Dynasty Law upang tuluyan nang masugpo ang korapsyon.

Ayon kay Atty. Espiritu, makatutulong lamang ang ICI sa mismong proseso ng imbestigasyon sa korapsyon sa bansa at hindi sapat ang pagbibigay ng pangil sa komisyon upang matuldukan na ang pangungurakot.

Dagdag pa ng labor group president, kahit na bigyan pa ng mas mahigpit na kapangyarihan ang ICI, aabutin pa rin ng dekada bago maubos ang mga korap.

Iginiit din ni Atty. Espiritu na kailangang magkaroon ng mas “independent” na komisyon ang pamahalaan upang tuluyang mapanagot ang mga dapat mapanagot.

Dapat nang panagutin at ikulong sa lalong madaling panahon ang lahat ng sangkot sa maanomalyang flood control projects at isauli ang perang ninakaw nila sa kaban ng bayan.

Ito ang panawagan ni retired Philippine Marines Colonel Ariel Querubin sa isyu ng katiwalian sa pamahalaan matapos ang malawakang protesta noong Setyembre a-bente-uno at panibagong malawakang demonstrasyon na ikinakasa sa Nobyembre 30.

Ayon kay Querubin, naiinip na ang taumbayan maging ang mga retiradong uniformed personnel sa proseso ng imbestigasyon ng Independent Commission for Infrastructure.

Ibinunyag din ng 2025 senatorial candidate na bagaman nagpapatuloy ang pulong nilang mga retiradong sundalo kaugnay sa ikinakasang kilos-protesta, hindi dapat makinig ang taumbayan at Armed Forces of the Philippines sa sulsol ng ilang pulitiko na mag-aklas laban sa pamahalaan.

Samantala, nanawagan din si Querubin, na isa sa mga Medal of Valor recipient, na magkaisa ang mga Pilipino na tuldukan na ang katiwalian sa pamahalaan at maging mas mapanuri ang mga sundalo sa mga impormasyong naglalabasan, lalo sa social media.

Aabot pa lamang sa dalawampu’t dalawang classrooms ang natatapos ng Department of Public Works and Highways ngayong taon.

Nabunyag ito sa pagtatanong ni Senate Committee on Basic Education Chairman Bam Aquino sa budget hearing ng Senado para sa panukalang pondo ng DPWH para sa susunod na taon.

Ayon kay DPWH Sec. Vince Dizon, maging siya ay hindi makapaniwala sa baba ng bilang ng natapos na classrooms dahil 1,700 dapat nakatakdang gawin ng ahensya ngayong 2025.

Nagbabala si Senador Aquino na kung magpapatuloy ang rate na ito, ang 146,000 na backlog sa classrooms ay maaaring tumaas pa sa 200,000 pagsapit ng 2028.

Samantala, suportado ni Sec. Dizon ang panukala ng Senado na tanggalin sa DPWH ang pondo sa pagpapatayo ng mga silid-aralan at ibigay na lamang ang pondo direkta sa mga lokal na pamahalaan at kailangan na ring maging agresibo sa public-private partnership upang mapabilis ang pagpapatayo ng mga kailangang classrooms.