EXPLAINERS

Nagbanta ang Filipino singer na si Arnel Pineda na kakalas na sa bandang Journey.

Ito ang matinding pahayag ni Arnel matapos dagsain ng pagbatikos!

Ang dahilan kung bakit siya binatikos ng husto? Tara alamin natin ‘yan!

Hindi kinaya ni Arnel Pineda ang kaliwa’t-kanang pagbatikos sa kaniya ng mga netizen matapos ang kaniyang huling performance sa ginanap na Rock in Rio Music Festival sa Rio de Janeiro.

Sa nasabing performance ni Arnel noong September 21, 2024, napansin ng fans ng Journey na hirap na hirap ito nang kantahin ang awiting “Don’t Stop Believing,” isa sa pinakasikat na awitin ng bandang Journey.

Lalong nakita ng mga netizen, ang hirap na hirap na pagkanta ni Arnel ng nasabing awitin nang i-post ng isang Facebook page sa Brazil ang performance nito.

Sa kaniyang Facebook account, agad na nag-sorry si Arnel at inilabas din nito ang kaniyang sama ng loob dahil sa kaliwa’t-kanang pambabatikos na natanggap.

Inamin din nito na maging siya ay nadismaya sa kaniyang performance.

Sinabi pa ng singer na sobra siyang naapektuhan ng matitinding batikos at nakakalungkot lang daw dahil sa isang libong magandang bagay na kaniyang nagawa ay nasira ito dahil lamang sa isang pagkakamali at doon pa raw sa Rock in Rio ito nangyari.

Naapektuhan daw siya mentally at emotionally.

Pagkatapos nito ay nagbanta na si Arnel na iiwan na lang ang kaniyang grupo kung saan sinabi nito na mag-comment lang ng “go” or “stay” ang mga nagagalit na fans at kapag umabot ng isang milyon ang comment na go ay aalis na siya ng tuluyan sa grupo.

Samantala, ipinost din ni Arnel ang link ng kaniyang performance sa kaniyang post sa Facebook.

Viral ngayon sa social media ang video clip ng isang grupo ng mga socialite na kumakain sa isang Japanese dinner na nagkakahalaga ng P133,000 matapos magdulot ng mainit na debate sa social media.

Anu-ano nga ba ang masasabi ng mga netizen tungkol sa video clip ng “guess the bill”  sa  Japanese dinner?

Tara, alamin natin yan!

Isang clip ng content creator na si Emman Atienza ang ibinahagi nito sa social media.

Sa nasabing video, makikita ang anim na babae na hinuhulaan ang bill ng kanilang kinain.

Sa huli, pumalo sa mahigit P130,000 ang naging presyo ng kanilang kinainan.

Isa sa mga babae ang makikitang nag-abot ng credit card matapos makita ang bill at tila balewala lamang dito ang libu-libong halaga ng kanilang kinain.

Dahil dito kung kaya’t nakatanggap ng pambabatikos ang anim na babae mula sa mga netizen na nagsasabing hindi dapat gumastos ng mahal para sa isang kainan lamang.

May mga nagsabi namang mas marami pang makabuluhang bagay na pwedeng paggamitan ng perang ginastos ng mga ito.

Ngunit may iba namang netizens na dinepensahan ang ginawa ng mga babae dahil afford naman umano ng mga ito ang gumastos at inggit lang ang iba.

May mga nagkomento pa na “Kasalanan na po kasing maging mayaman ngayon” bilang pagtatanggol sa anim na babae.

Kaugnay nito,ipinaliwanag naman ng influencer na si Emman na ang video clip ay biro lamang at hindi sila ang gumastos para dun at in- emphasize din niya na kahit sila ang gumastos ay karapatan nila iyon dahil pera naman nila ang gagamitin.

Ikaw, ano ang reaksyon mo sa napanood na viral video?

Matapos ang mahigit pitong dekada, himalang natagpuan ang isang lalaki sa California.

Si Luis Armando Albino, isang retiradong bumbero at Vietnam War Veteran sa East Coast, ay dinukot mula sa isang parke sa Oakland, California noong 1951 noong siya ay anim na taong gulang.

Naglalaro si Luis kasama ang nakatatandang kapatid nang lumapit sa kanya ang isang babaeng nakasuot ng bandana, kinausap siya sa wikang Spanish at nangako na bibili ito ng kendi kung sasamahan siya.

At iyon ng huling pagkakataon na nakita siya ng kanyang pamilya, kabilang na ang kanyang ina na namatay noong 2005.

Paano nga ba natagpuan si Luis?

Tara, alamin natin yan.

Matapos kidnapin, si Luis ay pinalaki ng mag asawa sa east coast.

At sa hindi inaasahang twist of fate, ang pamangkin ni luis na si Alida Alequin, 63  taong gulang ay kumuha ng online DNA test noong 2020 “Just for fun” at ipinakita nito ang 22% na resultang tugma kay Luis.

Ngunit muli silang nabigong  hanapin si Luis, kaya’t sa tulong ng kanyang mga anak nagsimula silang magresearch sa pamamagitan ng microfilm archive ng Oakland Tribune sa Oakland Public Library.

Kasama ang mga ebidensya na nakolekta mula sa mga archive at larawan nina luis at roger (kuya ni Luis) , agad nagtungo si Alequin sa isang law enforcement agency at hiniling na muling buksan ang kaso ng missing person.

Sa kaniyang pagsisikap noong Hunyo 20, ipinaalam ng pulisya na natagpuan na si luis.

Ikaw, handa mo bang hanapin ang nawawala mong kamag-anak?

Ligtas na nakauwi ang 8 taong gulang na batang babae matapos kunin ang kotse ng kanyang ina at i-maneho  papuntang Target sa Ohio.

Paano nga ba nakarating sa Target ang bata?

Tara, alamin natin yan!

Isang kapitbahay ang nagbigay sa mga kamag-anak ng dashcam footage ng batang babae na sumakay sa isang 2020 Nissan Rogue SUV nang mag-isa at nagmamaneho.

Sa  video makikitang palipat-lipat ng lane at tila nagsu-swerving  ang sasakyan habang ito ay nasa kalsada.

Kaya’t mabilis na hinanap ng awtoridad ang kinaroonan ng bata.

Natunton ang sasakyan sa paradahan ng Target, mga 25 minutes away o 11 miles sa bahay ng bata.

Ang batang babae ay hindi nasugatan sa kanyang pagmamaneho ngunit sinabi nito sa mga opisyal na siya ay nakatama ng isang mailbox.

Maraming netizens naman ang humanga sa  bata

“This is the best out of all the kids driving stories”

“Long distance and she got everything correctly.”

“Not gonna lie. That sounds like something my 8-year-old self would have done”

Ikaw, ilang taon ka bago matutong magmaneho?

Viral ngayon sa social media ang isang lalaki matapos madiskubreng halos 20 taon  na siyang nagbabayad ng electric bill ng kapitbahay.

Paano nga ba ito nangyari?

Tara, alamin natin yan!

Napansin kamakailan ni Ken Wilson, taga-Vacaville, California, na mas mataas ang bill ng kanyang kuryente kaysa sa normal.

Kaya’t bumili si Wilson ng submeter upang masubaybayan kung gaano karaming watts ang kinukunsumo ng kanyang mga appliance dahil pakiramdam niya ay may naka-jumper sa kanyang meter.

Bago magreklamo sa electric company, nag-inspeksiyon si Wilson sa pamamagitan ng pansamantalang pagpatay sa kuryente ng kanyang apartment. Matapos patayin ang lahat ng breaker, pinuntahan niya ang lugar sa kanilang apartment complex kung nasaan ang mga kuntador nang tiningnan niya ang kuntador na naka-assign sa kanyang unit, nakita niya na gumagalaw pa rin ito.

Dahil dito, nagpasya siyang tawagan ang Pacific Gas and Electric (PG&E) para ipa-check ang kanyang metro.

Sa imbestigasyon, ipinaalam sa kanya ng isang manggagawa mula sa kumpanya na ang kanyang apartment, unit 90, ay naka link sa maling metro at siya ay nagbabayad ng utility bill para sa unit 91 sa loob ng  20 taon.

Kaugnay nito, humingi ng paumanhin ang PG&E sa pagkakamali at nangako sila na ire-refund nila ang lahat ng mga sumobrang ibinayad nito.

Sa isang update, sinabi ng spokesperson ng PG&E na naayos na ang metro ni Wilson at binigyan siya ng credit na higit sa $600 ng  kumpanya.

Gigil na sumulat sa kumpanya ang isang ina matapos mamatayan ng 26-anyos na anak dahil sa “excessive workload,” kung saan nilahad niya ang toxic work culture at ang hindi pagdalo ng mga ka-trabaho sa burol ng anak.

Ano nga ba ang hinaing na isinulat ng nanay sa kumpanya?

Tara, alamin natin yan.

Ikinalungkot ni Anita Augustine ang pagkamatay ng kanyang anak na si Anna Sebastian Perayil, na nagtatrabaho bilang isang chartered accountant sa accounting firm na Ernst & Young (EY) sa Pune, India.

Ayon sa kaniya, si Anna ay pumasok sa kumpanya noong March 19, ngayong taon,  bilang isang executive na may full of life, dreams, at excitement para sa kanyang future,  ngunit ng dahil sa workloads, new environment, pressure at long hours o overtime naapektuhan ang  physical, emotional, at mental health ng kaniyang anak na naging dahil upang mabawian ito ng buhay sa murang edad at wala ni isa sa mga ka-trabaho ang dumalo sa libing ng kaniyang anak.

Si Anna ay namatay dahil sa chess constriction mula sa kakulangan sa tulog at pagkain sa hindi tamang oras.

Kaugnay ng pangyayari, nanawagan ang nanay ni Anna sa kumpanya na panahon na upang baguhin ang work culture at iprioritize ang health at well-being ng bawat empleyado.

Sapagkat, nakasaad sa Labor Law na ang normal na oras ng pagtatrabaho ng sinumang empleyado ay hindi lalampas sa walong (8) oras sa isang araw.

Sa panig naman ng EY India, nag-alay ang kumpanya ng “deepest condolences” sa  pamilya ni Anna. – sa panulat ni Elaine Dimalanta

Viral ngayon sa social media ang day-in-the-life video ng co-founder ng Lola Nena na si Steffi Santana patungkol sa “working lunch”.

Ano-ano nga ba ang masasabi ng mga netizen tungkol sa marketing clip ng Lola Nena?

Tara, alamin natin yan.

Naipakita ng video ang kaso ng micromanaging kung saan pinagtrabaho ng co-founder ang mga empleyado, kahit na naka-lunch break ang mga ito.

Nakasaad kasi sa Labor Law na ang bawat empleyado ay may karapatan para sa 60 minutes meal break kada araw.  

Dahil dito, nakatanggap ng pambabatikos ang Lola Nena mula sa mga netizen na nagsasabing hindi dapat pinapayagan ang “working lunch“. Anila, mas masarap umanong magtrabaho kung may sapat na oras para makapag-relax at makaidlip.

Kaugnay nito, humingi naman ng pasensya ang nasabing co-founder na aniya naging careless at iresponsable siya sa kaniyang mga binitawang salita at actions.

Ikaw, ano ang reaksyon mo sa napanood na viral video? – sa panunulat ni Elaine Dimalanta

Milyun-milyong metriko tonelada ng plastik ang napo-produce sa buong mundo bawat taon. Kalahati sa plastik na ito ay nire-recycle, sinusunog, o kaya naman ay itinatapon sa mga landfill at dagat na nakakapinsala sa marine ecosystem.

Ano nga ba ang Top 10 countries na may pinakamaraming itinatapon na plastic sa dagat?

Tara, alamin natin yan.

Ipinakita ng Science Advances ang mga nangungunang bansa na naglalabas ng plastic pollutants sa dagat.

Kabilang dito ang Pilipinas na nasa Top 1!

Batay sa ulat ng naturang scientific journal, ang Pilipinas na may 36,300 kilometrong coastlines ang nagtatapon ng 35% o higit 350,300MT na plastic sa karagatan.

Bukod sa Pilipinas, pasok din sa top 10 ang India, Malaysia, China, Indonesia, Myanmar, Vietnam, Bangladesh, at Thailand na lahat ay mula sa Asya.

Habang ang Brazil naman ang tanging bansa na hindi mula sa Asya na nakapasok sa nasabing listahan.

Kaugnay nito, bilang pagsisikap na bawasan ang plastic waste sa Pilipinas, inilunsad kamakailan ang Extended Producer Responsibility Law (EPR). Sa ilalim ng estratehiyang ito, magiging responsable na ang mga kumpanya sa kanilang plastic packaging na ginagamit nila upang protektahan, dalhin, at ibenta ang kanilang mga produkto.

Dahil dito, nagsimula na ang ilang kumpanya sa bansa sa paggawa ng mga produkto mula sa mga recycled plastics. – sa panunulat ni Elaine Dimalanta

Gustong magpakasal pero walang nagpopropose? Hindi problema iyan sa 24-anyos na babae sa India na pinakasalan na lang ang sarili.

Bakit nga ba pinakasalan ng babaeng ito ang kanyang sarili?

Tara, alamin natin yan.

Ayon kay Kshama Bindu, pagod na raw siyang maghintay at maghanap ng karelasyon kaya pinili na lamang niyang pakasalan ang sarili.

Naniniwala kasi siya sa kasabihang “love yourself,” kahit pa nagdulot ito ng kontrobersiya sa kanilang lugar.

Bagama’t hindi natuloy ang kaniyang kasal sa nakatakdang araw dahil umurong ang pari at kinansela ng templo ang kaniyang booking ay itinuloy niya pa rin ang kasal sa kaniyang bahay.

Aniya, wala naman daw itong pinagkaiba sa ibang Hindu wedding dahil ginawa niya ang lahat ng tradisyon. Makikita naman na hinalikan ni Kshama ang kanyang sarili gamit ang isang salamin.

Sa huli, napag-alaman na isang bisexual si Kshama, at pinaniniwalaan na kauna-unahang “sologamist” sa India.

Nais din daw ni Kshama na magbigay mensahe na ang tunay na pagibig ay nasa sarili lamang.

Nitong mga nakaraang araw, nakaranas na naman ng matinding pagbaha ang ilang bahagi ng bansa dahil sa walang tigil na pag-ulan.

Matagal nang problema ang baha sa Pilipinas. Ngunit ang Bonifacio Global City (BGC) sa Taguig, nakahanap ng solusyon upang maiwasan ito.

Sa ilalim ng Burgos Circle, nakatago ang isang napakalaking water detention tank kung saan naiimbak ang tubig-baha.

May lalim itong 12 meters o katumbas ng apat na palapag na gusali. Kaya nitong mag-imbak ng hanggang 22 million liters ng tubig na katulad sa 8 Olympic-sized swimming pools.

Kapag tumigil na ang ulan, ipa-pump ang naipong tubig sa Balisampan Creek na dadaloy patungong Ilog Pasig.

Pinag-isipan na ng Department of Public Works and Highways (DPWH) na gayahin ang underground water impounding structure ng BGC upang matugunan ang hindi mawala-walang problema sa baha, partikular na sa Metro Manila. Gayunman, nananatili pa ring hamon ang paghahanap ng angkop na lokasyon para rito.