EXPLAINERS

Muling napatunayan na sa panahon ngayon, digital na nga talaga ang karma. Paano ba naman kasi, ang lalaking ito na nagsunog sa isang restaurant sa Australia, agad na binalikan ng karma dahil kinapitan din ng apoy ang damit niya.

Kung ano ang kinahinatnan ng lalaki, eto.

Sa isang CCTV footage mula sa Victoria Police, makikita ang isang lalaki sa loob ng isang restaurant na mayroong bitbit na pulang container na naglalaman pala ng gas.

Dumeretso ang lalaki sa bar area ng restaurant at agad na ibinuhos ang gas sa ibabaw ng counter.

Hindi nagtagal ay sinilaban na ito ng lalaki pero bukod sa bar area ng kainan, nag-apoy din ang suot nitong damit.

Dahil sa sobrang pagkataranta, makikita kung paanong makailang ulit na nadulas ang lalaki at bumagsak pa sa sahig habang sinusubukang lumabas mula sa restaurant.

Sa ibang anggulo ng CCTV footage, makikita na patuloy pa rin sa pagliyab ang damit ng lalaki kung kaya hindi ito agad nakasakay sa nakaparadang sasakyan kung nasaan ang umano’y kasabwat nito.

Muling napaupo sa sahig ang lalaki at nagpagulung-gulong dahil sa desperasyon na maapula ang apoy.

Samantala ayon sa mga otoridad, nagtamo ng minor damages ang restaurant at patuloy pa ring pinaghahanap ang nakatakas na suspek.

Sa mga may binabalak na hindi maganda riyan, umatras ka na lang, dahil baka iniisip mo pa lang ang plano mo, kinakarma ka na agad.

Kung ang mga medical frontliners at ang mga nangangarap na makapasok sa industriya ng medisina ay nagpapakahirap muna sa pag-aaral para makuha ang titulo na inaasam-asam nila, ibahin niyo ang doktor na ito sa United Kingdom. Sa halip kasi na magpakahirap, dinoktor nito ang kaniyang diploma at nagpanggap sa loob ng mahigit dalawang dekada.

Kung ano ang mga kaparusahang ipinataw sa nagdoktor-doktoran na ito, eto.

Bigo na natapos ng fake doctor na si Zholia Alemi mula sa Iran ang kinuha nitong Bachelor of Medicine at Bachelor of Surgery kung kaya wala itong pahintulot na mag-practice ng medisina.

Pero ang babae, nakahanap ng paraan para maisakatuparan ang pangarap na makapasok sa nasabing industriya sa pamamagitan ng pamemeke ng diploma.

Nang lumipat si alemi sa United Kingdom, nakapagtrabaho ito bilang National Healthcare System (NHS) psychiatrist sa loob ng mahigit 20 taon gamit ang kaniyang forged diploma sa University of Auckland.

Pero makalipas ang halos dalawang dekada na pagpa-practice nito ng medisina, nabuko ito at napatawan ng pitong taon na pagkakakulong sa Manchester Crown Court noong 2023.

Ayon pa kay Adrian Foster ng Crown Prosecution Service (CPS), mayroong tyansa na daan-daang mga pasyente na ang dumaan kay Alemi at nalagay sa panganib dahil hindi ito qualified sa nasabing trabaho.

Bukod pa riyan, napag-alaman din na bago pa mabuko si Alemi ay nahatulan na ito ng tatlong fraud offenses noong 2018 matapos nitong muling mameke, hindi ng diploma, kundi ng last will and testament ng isang 84-anyos na babae nang sa ganon ay sa kaniya mapunta ang bungalow house nito na nagkakahalaga ng 300,000 euros.

Samantala, humingi naman ng dispensa ang General Medical Council (GMC) sa pagpalya nito na makitang peke ang isinumiteng papeles ni Alemi. Dahil dito ay sinuri ng gmc ang mga foreign doctors na naninilbihan sa UK.

Samantala, naatasan ang babae na magbayad ng compensation sa NHS na nagkakahalaga ng 406,624 euros o di naman kaya ay madadagdagan pa ang sintensya nito.

Sa mga mandaraya diyan, sa halip na gumagawa kayo ng plano para makapanlamang, mag-isip na lang kayo ng ibang mapagkakakitaan sa legal na paraan.

Normal sa mga bata ang pagiging malikot at curious dahil nasa stage sila ng kanilang buhay kung saan nag-eexplore pa ang mga ito. Pero ang explorer na bata sa kwentong ito, naipit at halos hindi makalabas matapos pumasok sa washing machine.

Ang dahilan kung bakit mahilig pumasok sa washing machine ang bata, eto.

Sa isang video na kinuhanan sa mismong bahay na tinitirhan ng pamilya ng tatlong taong gulang na si Dwayne, makikita ang bata na nakatayo sa loob ng washing machine.

Kung titingnan ay tila sukat ang taas at laki ng bata sa dryer ng washing machine. Pero ang totoo, nahirapan ang kaniyang pamilya na alisin siya mula rito dahil naipit na pala ang isang paa nito.

Dahil sa labis na pag-iyak ng bata, pati ang kanilang mga kapitbahay ay tumulong na sa pamilya ni Dwayne na baklasin ang washing machine para tuluyan itong mailabas.

Pero ang pagpasok ni Dwayne sa washing machine ay hindi na kataka-taka para sa pamilya niya dahil ayon mismo sa kaniyang nanay na si Aiza, mahilig umanong pumasok ang kaniyang anak sa washing machine dahil ginagawa itong taguan ng bata kapag naglalaro ng hide and seek.

Nilinaw naman ni Aiza na maigi nilang binabantayan ang kanilang mga anak, nagkataon lang pinapatulog nila ang kanilang bunsong anak nang mangyari ang insidente.

Dagdag pa ni Aiza, walang tinamong sugat si Dwayne at tinawanan lang ng bata ang pangyayari at nagpatuloy sa paglalaro.

Sa mga magulang diyan, sa kabila ng busyness niyo, sa paanong paraan niyo binabantayan ang welfare at safety ng mga anak niyo?

Muling napatunayan ng isang mister mula sa Canada na ang pagmamahal, hindi kumukupas kahit ilang taon pa ang lumipas. Ang lalaki kasi, pinag-aralan lang naman kung paano mag-ayos ng buhok at maglagay ng makeup para tulungan ang kaniyang misis na nagkakaroon na ng problema ang paningin.

Ang resulta ng naging pag-aaral ng lalaki, eto.

Sinadya ng noo’y 79-anyos na mister mula Alberta, Canada na puntahan ang beauty school na Delmar College of Hair and Esthetics para pag-aralan kung paano ayusan ng buhok ng isang babae at kung paano ito lalagyan ng makeup.

Kataka-taka man at hindi pangkaraniwan ang tagpo na ‘yon, mayroon namang malalim at nakakaantig pusong dahilan ang matanda para sa sinadya nitong pag-aaral.

Si mister kasi, gustong tulungan ang kaniyang misis sa loob ng lagpas limang dekada sa pag-aayos nito ng buhok at pag-a-apply ng makeup dahil nahihirapan na ito dulot ng labis na panlalabo ng mga mata.

Dahil makailang beses na umanong napaso ang kaniyang misis sa curling iron, tinuruan ng staff ng Delmar College si mister kung paano gumamit ng pangkulot sa tamang paraan.

Bukod pa riyan, hirap na rin umano si misis na maglagay ng mascara kung kaya naman ang kaniyang ma-effort na mister, pinag-aralan din ito.

Ayon sa director ng beauty school na si Carrie Hannah, inabot lang ng isang oras ang pag-aaral ng lalaki. Ipinagmalaki pa nito ang litrato ng kaniyang misis at ipinakita sa mga staff at estudyante kung gaano ito kaganda.

Samantala, sinabi pa ni Carrie na nakita nila kung gaano kaganda ang buhok ng misis ng lalaki nang magkasamang nagpunta ang mga ito sa beauty school para magpasalamat.

Sa mga mister diyan, hanggang saan aabot ang pagmamahal niyo para kay misis? Kaya niyo rin bang mag-effort katulad ng ginawa ng mister sa kwento na ito?

Hindi biro para sa karamihan ang pagpapagamot dahil sa kaakibat nitong gastos, kung kaya nga ang ilan ay labis itong pinag-iipunan. Pero ano ang gagawin mo kapag na-diagnose ka ng isang sakit kahit na wala ka namang iniindang sintomas? Ganyan ang dinanas ng mga pasyente sa kamay ng isang doktor na nanloloko ng mga pasyente para lang kumita nang malaki at mamuhay nang marangya.

Kung ano ang mga kalokohang ginawa ng doktor, eto.

Naaresto at nasintensyahan na ang 68-anyos na rheumatologist na si dr. Jorge Zamora-Quezada mula sa Texas, Arizona ng sampung taong pagkakakulong matapos mabisto ang panlolokong ginagawa nito sa kaniyang mga pasyente sa loob ng halos dalawang dekada.

Dinadiagnose umano ni Quezada ang mga malulusog na pasyente ng mga chronic diseases at niloloko ang mga ito na kinakailangan nilang sumailalim sa gamutan at treatments na mayroong side effects at nagdudulot ng panghihina sa isang tao.

Ayon sa isa mga biktima, nang dahil sa mga hindi kinakailangang gamot ay halos hindi na nila magawang makabangon sa kama, habang ang iba naman ay nagsabing tumigil sila sa pag-aaral dahil sa panghihina ng kanilang mga katawan. Nakaranas pa ng stroke, pagkalagas ng buhok, at pagkasira ng atay ang ilan sa mga ito.

Bukod pa rito ay nameke rin ang doktor ng mga medical records at nanloko ng mga health insurance companies. Napag-alaman din na bina-blackmail nito ang kaniyang mga empleyado kapag hindi sinusunod ang kaniyang mga utos.

Nagpatunay at tumestigo ang iba pang mga doktor sa kaniyang trial at sinabi na daan-daang mga pasyente ang diniagnose nito ng rheumatoid arthritis kahit na wala naman talagang sakit ang mga ito.

Ayon sa head ng Justice Department’s Criminal Disvision na si Matthew R. Galeotti, nagawang mamuhay nang marangya ni Quezada dahil sa panloloko niya sa mga pasyente.

Matapos ang mga trial, lumabas na guilty ang lalaki sa conspiracy to commit fraud, seven counts of healthcare fraud, at one count of conspiracy to obstruct justice.

Samantala, bukod sa sampung taong pagkakakulong, binigyan din ito ng tatlong taong supervised release at naatasang magbayad ng mahigit 28 million dollars.

Sa mga mapanlinlang at mapanlamang diyan, ingat-ingat lang at baka dumating na ang karma mo at doble-doble pa ang balik sayo.

Sa napaka-stressful na mundo, sino ba naman ang hindi mapapaisip na magpakalayu-layo at mamuhay nang tahimik? Katulad ng lalaking ito sa China na ipinagpalit ang kaniyang trabaho para mamuhay nang tahimik at mag-isa sa isang kweba.

Kung ano ang nagtulak sa lalaki na gawin ito, eto.

Kung para sa karamihan ay hindi madaling mag-resign o iwanan ang trabaho dahil sa takot na mahirapang makahanap ng bagong mapapasukan o di naman kaya ay dahil sa pag-aalangan na magsimulang muli, ibahin niyo ang 35-anyos na lalaking ito mula sa China na si Min Hengcai.

Si Min kasi, nag-resign mula sa kaniyang 10-hour day job bilang ride-hailing driver kung saan kumikita ito ng 10,000 yuan kada buwan o may katumbas na mahigit 78,000 pesos.

Sa ganoong paraan binayaran ni Min ang mga pinagkakautangan ng kanilang pamilya. Pero mayroon pa rin umano itong kailangang bayaran na 300,000 yuan o mahigit 2 million pesos sa mga bangko at lending companies na mababayaran niya sana sa tulong ng kaniyang properties ngunit ibinenta umano ito ng kaniyang mga kaanak.

Matapos iwanan ang trabaho, nanirahan si Min sa isang kweba na nasa isang lupain na ipinagpalit niya sa pag-aari niyang lupa.

Inabot naman si min ng 40,000 yuan o mahigit 300,000 pesos para gawing isang komportableng tahanan ang kweba na tinatawag niyang blackhole.

Tunay ngang mapayapa at tahimik ang piniling buhay ni Min, dahil sa apat na taon, nakabuo ito ng isang healthy na routine kung saan gumigising ito ng alas otso ng umaga araw-araw para magbasa ng libro, maglakad-lakad, magtanim ng mga gulay na kaniya ring kinakain, at natutulog pagpatak ng alas diyes ng gabi.

Bukod sa pag-iwan sa kaniyang trabaho, hindi rin umano naniniwala si Min sa konsepto ng kasal at tinawag pa itong waste of time and money. Sinabi pa nito na mababa ang tyansa na makahanap ng true love kung kaya hindi niya na ito paghihirapan pa.

Samantala, bagama’t malayo sa magulong lungsod, ibinabahagi naman ni Min ang kaniyang simple at tahimik na pamumuhay sa social media sa pamamagitan ng livestreaming na kaniyang ring pinagkakakitaan kung saan nakakuha na ito 40,000 followers.

Sa mga gusto nang mag-resign at manirahan sa dagat o bundok diyan, baka ito na ang sign na matagal niyo nang hinihintay.

Kung ang mga tao ay nagtatrabaho at nagbibigay ng kanilang serbisyo para makatanggap ng sahod o mabayaran bilang empleyado, ibahin niyo ang mga nauusong kumpanya na ito sa China. Paano ba naman kasi, sila pa ang binabayaran ng mga empleyado kuno para lang magkapagtrabaho ang mga ito.

Kung hindi mo pa naririnig ang bagong konsepto na ito, eto.

Ayon sa National Bureau of Statistics, pumalo ng 16.9% ang urban jobless rate ng mga nasa pagitan ng edad 16-24 sa China mula sa dating 16.1% na naitala noong January.

Kaugnay nito, ilang mga indibidwal ang tumatangkilik ngayon sa bagong trend sa China na fake companies kung saan maaaring magrenta ang mga kliyente ng office desk para magpanggap na nagtatrabaho sila.

Bukod sa pagkakaroon ng pekeng opisina at instant work environment, makakatanggap din ng lunch at access sa wifi ang mga empleyado sa halagang 30-50 yuan o may katumbas na 200-300 pesos.

Para gawin pang mas realistic ang pagpapanggap, maaaring magbayad ng extra ang mga fake employees para magkaroon ng pekeng tasks at manager.

Ayon sa ilang reports, mayroong mga indibidwal na bumibisita sa nasabing pekeng opisina dahil sa kanilang curiosity o di naman kaya ay para gawin itong tambayan.

Mayroon ding nag-advertise sa mga ito bilang isang paraan para sa mga taong nahihiya dahil wala silang trabaho.

Samantala, ang pinaka nakikinabang sa mga ito ay ang mga unemployed individuals na hindi makahanap ng tyempo na sabihin sa kanilang mga pamilya na wala na silang source of income.

Sa mga tambay diyan, magkakainteres din ba kayo sa mga pekeng opisina kung sakali man na mayroon din nito sa Pilipinas?

Ang isa sanang normal na araw sa isang probinsya sa China, nauwi sa isang makapanindig balahibo at mala-pelikulang tagpo nang dahil sa maling akala ng isang lola.

Ang buong pangyayari, eto.

Nakuhanan sa video ang naging maaksyon na pagsagip ng mga lokal sa isang lola na nakakapit mula sa labas ng bintana ng isang establisyimento sa henan province sa China.

Makikita ang mga lokal na nakatingala sa bintana at nakaantabay sa pagbagsak ng matanda na 102-anyos na pala.

Ang lola kasi na nasa 3rd floor ng establishment, inakala na pintuan ang bintana at doon ito dumaan kung kaya nauwi ito nasabing sitwasyon.

Mabuti na lamang at na inihanda ng mga residente para nagawa pang makakapit ng lola sa labas ng bintana bago ito tuluyang nahulog sa malaking mat saluhin ang matanda.

Samantala, matagumpay namang nailigtas ang matanda ngunit nahagip sa ibang anggulo ng video na tumama ito sa signage ng isang tindahan na nasa unang palapag ng establishment.

Sa mga maka-lola diyan. Anong say niyo sa kwento na ito? Mas babantayan niyo ba ngayon ang mga lola niyo matapos marinig ang kwento na ito?

Labis na pinaghahandaan ng mga nanay ang araw ng kanilang panganganak. Gayunpaman, hindi pa rin maitatanggi na isa itong unpredictable event. Katulad na lang ng nangyari sa isang nanay mula England na napaanak nang wala sa oras sa loob ng kanilang luxury car habang binabaybay ang bahang kalsada.

Kung matagumpay ba ang panganganak ng nanay, eto.

Alas tres ng madaling araw noong February 24 nang bumyahe ang magkasintahang Chiara Musetti aat James Spence patungo sa furness general hospital dahil nakatakdang manganak ang babae.

Ayon kay Chiara, sampung minuto na lang ang layo nila mula sa ospital nang pumutok ang kaniyang panubigan. Makailang beses din umanong huminto ang byahe nila dahil sa mga nadaanan nilang bahang kalsada.

Dagdag pa niya, makalipas lang ang limang minuto habang nasa gitna ng daan ay nagsimula nang lumabas ang ikalawa nilang anak ni James. Sinalo na lang umano ni Chiara ang baby nang tuluyan itong lumabas mula sa kaniyang sinapupunan.

Pagkarating sa ospital ay isinakay sa wheelchair si Chiara at inobserbahan sa loob ng labindalawang oras bago tuluyang nakauwi sa kanilang bahay.

Ayon sa ngayo’y isa nang mom of two, nasa maayos na kalagayan ang kanilang bagong baby na pinangalanang Siena. Hindi rin daw niya inaasahan na napaka-kalmado ng bata sa kabila ng dramatic entrance nito.

Samantala, hindi naman na raw nagulat ang magkasintahan sa naging pagdating ni Siena dahil sa una niyang pagbubuntis, nasa kasalan sila nang magsimulang makaramdam si Chiara ng pahiwatig na malapit nang lumabas ang kanilang panganay.

Sa mga magulang diyan, pwede niyo bang i-share ang kakatwang kwento niyo nang i-welcome niyo ang inyong first baby?

Sinong mag-aakala na habang nasa libing at ipinagluluksa ang pagkamatay ng isang kaanak, tumibok ang puso ng babaeng ito mula sa Brazil nang makita ang funeral director nito at matyagang kinuha ang pansin nito at ipinaglaban ang kaniyang nararamdaman.

Kung paano napaibig ng babae ang funeral director, eto.

April 2023 nang ma-love at first sight ang trenta’y tres anyos na si Daniela Signor sa trenta’y uno anyos na si Apollo Scariot nang makita niya ito sa lamay ng kaniyang kaanak.

Dahil sigurado si Daniela sa kung ano ba talaga ang gusto niya, literal na sinunod niya ang kagustuhan niya at dumalo sa mga lamay sa kanilang lugar dahil sa pag-asa na makikita niya si Apollo na isa palang funeral director.

Bagama’t inamin ni Daniela na ayaw niya sa mga libing, matyaga itong dumalo at nakiramay sa mga funeral services na alam niyang in-arrange ni Apollo para kuhanin ang atensyon nito.

Makalipas ang dalawang taon, napansin din ni Apollo si Daniela na kaniya rin naman palang tipo at doon na nagsimula ang pag-uusap at ang getting to know stage ng dalawa.

Ang love story na nagsimula sa lamayan, nauwi sa kasalan. Si Daniela, ginulat pa ang mga bisita nang dumating siya sa kanilang wedding venue habang sakay ng karo ng patay.

Bilang parte ito ng simula ng kanilang pagmamahalan, ito rin ang sinakyan ng bagong kasal papunta sa kanilang honeymoon na mayroon pang signage na “till death do us part.”

Sa mga nahanap na ang kanilang wagas na pag-ibig, pwede niyo bang i-share kung paano at saan kayo nagkakilala?