EXPLAINERS

Isa na namang kawatan ang hindi nagtagumpay! Ang lalaki kasing ito mula sa India, matapos subukang mang-snatch, mabilis na kinarma! Bukod sa biglaang sumemplang ang sinasakyan nitong motor, hindi rin ito agad na umandar kung kaya naglakad ito habang tumatakas.

Kung ano ang kinalagyan ng kinarmang snatcher, eto.

Sa isang CCTV footage sa nakuhanan isang gabi sa Uttarakhand, India, makikita ang dalawang motor na magkasunod na dumadaan sa isang maliit na kalsada.

Kapwa mga babae ang sakay ng nauunang motor, habang isang lalaki naman ang sakay ng kasunod nito.

Nag-overtake ang lalaki na isa palang snatcher at sinubukang hablutin ang suot na alahas ng mga babae.

Pero hindi pa man nakakalayo ay bigla na lang sumemplang ang motor ng snatcher.

Makikita na bigla na lang bumaba mula sa motorsiklo ang dalawang babae at sinubukan pang habulin ang suspek na agad-agad na bumangon at nagtulak ng kaniyang motor para makatakas dahil hindi ito agad na umandar.

Ang on the run na suspek, mayroon palang kasabwat na kasama ring naaresto ng mga pulis at kapwa mayroon umanong kinalaman sa mga naitalang snatching sa Haridwar District.

Samantala, narekober ng mga otoridad sa mga suspek ang mga nakaw na alahas, pistol, at kutsilyo.

Sa mga ayaw paawat sa paggawa ng hindi maganda diyan, itigil niyo na yan bago pa ang karma ang mahiyang lumapit sa inyo.

Isang malaking achievement para sa mga magulang na mapagtapos ng pag-aaral ang kanilang mga anak. Bonus pa kung mayroon itong awards at medals. Pero ang magkakapatid na ito, tripleng saya at karangalan ang dinala sa kanilang mga magulang dahil grumaduate ang mga ito nang Magna Cum Laude.

Kung ano ang kwento ng triplets, eto.

Kabilang ang identical triplets na ito mula sa Zamboanga, Sibugay sa mga nagtapos ng kolehiyo ngayong taon. Pero ang triplets, academic goals! Paano ba naman kasi, bukod sa iisa sila ng kinuhang kurso na Bachelor of Science in Business Administration Major in Financial Management, sabay-sabay din silang grumaduate.

Higit sa lahat, pare-pareho pa silang magna cum laude.

Bagama’t kambal ang mga ito, hindi pa rin maiiwasan ang pagkakaroon ng pagkakaiba sa kanila, lalo na pagdating sa pag-aaral.

Katulad na lang ng maagang pagtulog ng panganay na si Eva May para maaga ring magising para makapag-review. Gumagana naman sa pangalawa na si Lorie ang pagte-take down notes dahil mas naaabsorb niya ang mga inaaral niya. Habang ang bunso naman na si Xennia, mas pinipiling mag-review nang walang kasama.

Sa isang pahayag, sinabi ni Lorie na tulung-tulong at suportado nila ang isa’t isa pagdating sa pag-aaral. Ginagamit din nila ang pagkakaiba ng strengths ng bawat isa para magtulungan.

Pero ang achievement na ito ng magkakapatid, muntik nang maantala dahil umano sa mga hindi kasiguraduhan noong kasagsagan ng COVID-19 pandemic.

Hindi naman nagpatinag dito ang magkakapatid at ipinagpatuloy pa rin ang kanilang pag-aaral at nito lamang May 27 ay nagmartsa na ang mga ito at kapwa mga magna cum laude pa.

Samantala, sunod namang pinaghahandaan ng magkakapatid ay ang kanilang civil service eligibilty at ang paghahanap ng trabaho.

Sa mga may kakambal diyan, masasabi mo bang sibling goals din kayo ng mga kapatid niyo o palagi kayong nagbabangayan?

Naging tampulan man ng katuwaan, nagsilbi pa ring paalala sa mga online netizen ang isang babae na natagpuan na lang na tila wala ng buhay sa daan. Pero ang babae, hindi lang pala talaga umabot sa kanilang bahay dahil sa kalasingan.

Ang buong kwento, eto.

Nag-viral kamakailan lang sa social media ang mga litrato ng isang babaeng makikitang nakadapa at marumi ang damit habang pinagtitinginan ng mga residente.

Ayon sa caption ng post, natagpuan sa gilid ng creek sa isang hindi tukoy na lugar ang isang nakahandusay na babae na umano’y nilalangaw at nilalanggam na.

Dahil sa takot ng nakakita sa babae, tumawag agad ito ng tulong.

Pero ang babaeng inakalang patay na, tila bumangon sa hukay dahil bigla na lang itong tumayo at ngumisi na para bang walang nangyari at hindi naalarma sa kaniyang sitwasyon ang mga residente.

Sa kaparehong post, ini-reveal na lasing lang pala ang babae at hindi pa patay.

Samantala, katulad ng poster ng nasabing post ay nagpaalala ang mga commentator na magtira ng pang-uwi at huwag sasagarin ang sarili kapag nakikipag-inuman dahil maraming maaaring mangyari na hindi maganda sa kalsada lalo na kapag wala ka sa wisyo.

Sa mga mahilig tumoma diyan, tantyahin niyo muna kung hanggang saan lang ang kaya niyo. Baka mamaya, kayo na ang susunod na mag-viral.

Kung loyalty at dedication lang din naman sa trabaho ang pag-uusapan, walang tatalo sa lalaking ito mula sa Las Vegas, Nevada. Paano ba naman kasi, sa 27 taon nitong pagtatrabaho, ni minsan ay hindi ito um-absent na naging dahilan para makatanggap ito ng munting regalo mula sa kaniyang mga boss.

Kung ano ang naging kapalit ng pagiging dedikado ng lalaki sa trabaho, eto.

Bihira na ngayon ang magkaroon ng loyal employee na nagtatagal sa isang kumpanya ng mahabang panahon. Katulad na lang ni Kevin Ford mula sa Las Vegas Nevada na 27 years nagserbisyo sa isang kilalang burger restaurant sa Las Vegas Mccarran International Airport.

Taong 2022 nang mag-celebrate si Kevin ng kaniyang 27th anniversary sa trabaho. Bilang appreciation sa kaniyang mahabang pagseserbisyo, binigyan ito ng kaniyang supervisor ng regalo.

Naglalaman ang nasabing regalo ng movie ticket, tumbler mula sa isang kilalang coffee shop, at candies at chocolates.

Nag-viral ang video ni kevin na isa-isang inilalabas ang laman ng bag kung saan makailang beses din itong nagpasalamat.

Bagamat na-apperciate ng lalaki ang mga simpleng regalo, hindi naman ito ikinatuwa ng kaniyang anak an si Seryna, dahilan para magsimula ito ng online fundraising bilang pasasalamat sa kaniyang tatay na itinaguyod ang pag-aaral nilang magkakapatid.

Plano lang sana ni seryna na makalikom ng 200 dollars pero dahil sa mga netizen na naantig sa kwento ni Kevin ay nakalikom ito ng tumataginting na 459,800 dollars.

Sa tulong ng mga donasyon ay nakabili ng food truck si Kevin na nagkakahalaga ng 20,000 dollars na mayroong disenyo na K27Y o ‘Kevin 27 Years’.
Samantala, bukod sa food truck ay nakabili na rin ng bagong three-bedroom house si kevin sa tulong ng mga perang nalikom sa fundraising.

Sa mga pasuko na sa trabaho diyan, konting tiis lang dahil magugulat ka na lang isang araw na magbubunga na ang mga pinaghihirapan mo.

Muli na namang napatunayan na kayang-kaya na talagang makipagsabayan ng Pilipinas sa iba’t ibang mga bansa. Pero this time, sa larangan naman ng edukasyon. Dahil ang isa sa mga tinitingalang unibersidad sa Pilipinas, ikinukunsidera lang naman ngayon na isa sa top universities sa buong mundo.

Kung ano ang naging basehan ng rankings na ito, eto.

Kilala ang University of the Philippines bilang isa sa mga prestihiyosong unibersidad sa bansa. Isang malaking achievement para sa mga estudyante ang makapasok at makapagtapos mula rito.

Kamakailan lang, muling napatunayan ng unibersidad ang kredibilidad nito matapos makipagsabayan sa iba’t ibang mga unibersidad sa buong mundo.

Ang UP Diliman at UP Manila kasi, kabilang sa inilabas na listahan ng Center for World University Rankings (CWUR) ng top universities all over the world.

Sa 2,000 mga unibersidad, lumapag ang UP Manila sa 1,677th rank, habang nasa 1,784th rank naman ang UP Diliman.

Pero kung national rankings ang pag-uusapan, nangunguna ang UP Manila at pumapangalawa naman ang UP Diliman.

Base sa latest report, nakakuha ang UP Manila ang 1,047th rank pagdating sa employability at nasa ika-1,607 naman ito sa research rankings. Sumatutal, 67.4 ang nakalap na score ng nasabing campus.

Habang ang Diliman campus naman ay nakakuha ng 67.0 na overall score at nasungkit naman nito ang 1,711th rank sa research category.

Samantala, pinangunahan naman ng Harvard University, Massachusetts Institute of Technology, at Stanford University ang listahan kung saan sinala ang mga napabilang na unibersidad base sa education, faculty, research, at employability nito.

Sa mga isko at iska diyan, mas nakakaproud ba ngayon na maging iskolar dahil sa naging resulta ng report na ito?

Isa ang pagkakaroon ng sariling bahay sa pinaka pinag-iipunan ng karamihan dahil hindi nga naman biro ang halaga nito. Pero ano ang gagawin mo kung ang pinaghirapan mong bahay, tinitirhan na pala ng ibang tao. Ang masama pa, hindi mo naman ito pinauupahan.

Kung ano ang kinahinatnan ng mga nanghimasok na ito, eto.

Takot ang naramdaman ng mga residente sa lugar ng San Miguel de Pedroso sa probinsya ng Burgos sa Spain dahil sa pangamba na baka ang bahay na nila ang susunod na angkinin at okupahin ng mga informal settler.

Paano ba naman kasi, mayroong grupo ng informal settlers na nanghimasok at nanirahan sa isang bahay na halos dalawang dekada nang bakante at inangkin ito na para bang sila ang nagbayad at nagmama-ari nito.

Ayon sa isang residente, itinapon pa raw ng informal settlers ang mga furniture ng nasabing bahay at pinalitan ang mga ito ng sarili nilang mga gamit.

Bukod pa riyan, nagkaroon pa ng lakas ng loob ang mga ito na mag-install ng alarm system sa nasabing bahay para protektahan ito mula sa mga masasamang loob.

Suspetsa ng mga residente, matagal nang inaabangan ng mga informal settlers ang bahay, at nang makalipat dito ay sinubukan pa nilang i-register ito sa mga otoridad pero hindi ito pinayagan.

Dahil dito, naging alerto na ang mga residente sa pagbabantay sa mga bumibista sa kanilang lugar dahil sa takot na ang bahay na nila ang susunod na puntiryahin.

Samantala, paaalisin naman na ng mga pulis ang mga informal settler matapos magsampa ng tatlong reklamo ang may-ari ng bahay.

Sa mga may pag-aaring properties diyan, may inatasan ba kayong magbantay sa mga ito? Baka mamaya, hindi na lang pala mga anay ang naninirahan dito.

Kung progress and development lang din naman ang pag-uusapan, kayang-kaya nating makipagsabayan sa iba’t ibang lungsod all over the world. Paano ba naman kasi, nakapasok lang naman sa listahan ng 1,000 Best Cities to Live In ngayong 2025 ang siyam na lungsod sa bansa.

Kung paano ito nangyari, eto.

Inilabas kamakailan lang ng economic advisory firm na Oxford Economics ang pinakabagong listahan ng Global Cities Index para sa kasalukuyang taon at ang Pilipinas, nakapasok!

Sa loob ng isanlibong naglalakihang mga lungsod sa buong mundo, napabilang ang Manila sa ika-206th rank, habang nasungkit naman ng Cebu ang 470th rank.

Ikinategorya ang mga lungsod sa listahan base sa economic, human capital, quality of life, environment, at governance ng mga ito.

Pagdating sa economic ranking, Metro Manila ang nakakuha ng 158th rank. Ika-93 naman ito sa human capital, 373rd sa quality of life, 30th sa environment, at 604th pagdating sa governance category.

Habang 156th naman ang pinakamataas na rank na nakuha ng Cebu para sa category na environment. 371st rank naman ito sa economy, 504th sa human capital, 604th sa governance, at 697th sa quality of life category.

Bukod sa mga ito, nakapasok din sa listahan ang Angeles City na lumapag sa 488th rank, magkasunod naman ang Bacolod at Davao sa 118th at 119th ranks.

Nasa 577th rank naman ang Cagayan de Oro, 581st ang Dagupan City, 835th ang General Santos City, at pangsiyam ang Zamboanga City na nasa 861st rank.

Ayon sa kaparehong report, ang mas mabilis na productivity growth at mas mataas na pasahod kumpara sa ibang mga lungsod sa bansa ang dahilan kung bakit mas marami ang pinipiling manirahan sa mga nasabing lugar.

Samantala, pinangunahan naman ng New York, London, at Paris ang nasabing Global Cities Index.

Sa mga residente ng mga nabanggit na lungsod, anong masasabi niyo? Sangayon ba kayo sa naging resulta ng report na ito?

Mahirap ang mawalan ng mahal sa buhay, lalo na kung ito ang inaasahan mong magiging katuwang mo hanggang sa pagtanda. Pero ang lalaking ito sa Cotabato, habang nagdadalamhati pa sa pagkawala ng kaniyang misis ay hindi inaasahang binawian din ng buhay sa mismong araw pa ng libing ng kaniyang asawa.

Kung ano ang buong kwento, eto.

Sariwa pa man ang sugat ng isang pamilya mula sa pagkamatay ng kanilang nanay, nadagdagan pa ito nang hindi inaasahang sumunod ang kanilang tatay matapos itong maaksidente sa mismong araw ng libing ng kaniyang misis.

Ayon sa mga otoridad, nawalan ng kontrol sa sasakyan ang nasawi na kinilalang si Junifel Conel, Sr. Habang nagmamaneho papunta sa isang water refilling station sa barangay kilada, matalam, cotabato.

Base naman sa imbestigasyon at sa mga kaanak ni Conel, dala marahil ng pagod at puyat mula sa huling gabi ng lamay ng kaniyang misis kung kaya nakaidlip ito sa byahe at sumalpok sa isang 10-wheeler truck na nakaparada sa gilid ng highway.

Sakay din ng suv ang 17-anyos na anak ni Conel na nagtamo ng injury sa binti. Habang ang truck driver naman na nagtamo ng minor injuries ay agad pumayag na magpaimbestiga sa mga pulisya.

Sa kasamaang palad, dead on the spot si Conel, habang naiwan naman sa kanilang mga kaanak ang dalawa nilang menor de edad ng kaniyang misis.

Ikaw, anong masasabi mo sa nakapanlulumong kwento na ito ng pamilya?

Sa panahon ngayon, tila isa nang malaking challenge ang tumagal sa trabaho, pero ang babaeng ito mula sa Japan, mahigit animnapung taon nang nagsisilbi sa isang kumpanya at nabigyan pa ng parangal ng Guinness World Record.

Ang kwento ng dedicated na empleyado na ito, eto.

Taong 2021 nang pagkalooban ng Guinness World Record ang noo’y 90-anyos na si Yasuko Tamaki mula sa Japan bilang oldest office manager.

1956 pa nang magsimulang magtrabaho si Tamaki sa trading company na Sunco Industries. Pero kahit may katandaan na, pumapasok pa rin ito mula alas nuwebe ng umaga hanggang alas singko ng hapon sa loob ng limang araw kada linggo.

Dahil sa haba ng experience at lawak ng kaalaman ni Tamaki sa nasabing kumpanya, tinutulungan niyang magsanay ang mga bago at nakababata nilang empleyado.

Na-promote at naging Section Chief si Tamaki sa edad na 40. Pagdating naman ng 67-year-old, natuto ito na gumamit ng computer sa trabaho. Hindi rin ito tumigil sa pag-aaral at kumuha pa ng certification sa edad sa 86 para patuloy na i-challenge ang kaniyang isip.

Nang matanggap ni Tamaki ang certificate mula sa Guinness World Record, sinabi nito na ginagawa niya lang naman ang kaniyang trabaho at talagang naantig siya sa ipinagkaloob sa kaniya na recognition.

Samantala, sinabi naman ni Tamaki na naniniwala siya na ipinanganak siya para tumulong sa ibang tao. Lifelong goal niya rin daw na pasayahin ang chairman, managers, at iba pa niyang mga kasamahan sa trabaho, at wala rin siyang balak mag-retire mula rito.

Sa mga masisipag at ganadong-ganado magtrabaho diyan, hinahangad niyo ba na makatanggap ng award dahil sa pagiging dedicated niyo?

Kadalasan ay kilig ang mararamdaman kapag nakatanggap ka ng regalo mula sa partner mo kahit pa picture frame lang naman ang laman nito. Pero paano kung ang picture frame ay naglalaman pala ng mga resibo ng panloloko? Sa ganyang paraan sinorpresa ng isang babae ang kaniyang boyfriend para hulihin ito sa ginagawa nitong panloloko.

Kung ano ang kinahinatnan ng magkasintahan, eto.

Pinaghahandaan na ng isang magkasintahan ang pagdating ng kanilang second anniversary at ang graduation ng lalaki nang madiskubre ng babae na nangangaliwa umano ang kaniyang boyfriend.

Dahil dito, naisipan ng babae na supresahin ang kaniyang boyfriend ng isang regalo.

Sa isang video, makikita ang dalawa na magkaharap sa isang mesa habang binubuksan ng lalaki ang regalo ng babae.

Tila sabik na sabik pa ang lalaki noong una pero nang makita nito ang regalo na picture frame at ang nilalaman nitong picture, bigla na lang nawala ang mga ngiti nito.

Paano ba naman kasi, resibo pala ito ng panloloko niya sa kaniyang girlfriend. Humingi pa ng tulong ang babae sa kaanak ng kaniyang boyfriend na makita ang conversation nito at ng umano’y kabit nito.

Doon niya nabisto na nag-celebrate pa ang mga ito ng monthsary at nagtatawagan pa ng ‘baby’.

Samantala, aminado naman ang babae na hindi naging madali para sa kaniya ang ginawang panghuhuli sa lalaking ngayon ay ex-boyfriend niya na.

Dagdag pa niya, sa kasalukuyan ay magkasintahan na ang kaniyang dating nobyo at ang umano’y third party sa kanilang dating relasyon.

Sa mga in a relationship diyan, kung kayo ang mapupunta sa ganitong sitwasyon, magkakaroon din ba kayo ng lakas ng loob na komprontahin ang partner niyo?