EXPLAINERS

Sinong mag-aakala na nang dahil sa pagiging alerto at malakas na pagtahol ng isang maliit na aso, dalawamput dalawang pamilya ang nakaligtas mula sa malakas na pagguho ng luho na naganap kamakailan sa India?

Ang kwento ng kabayanihan ng tuta, eto.

Pasado alas dose ng madaling araw nang magising ang 6-month-old na tuta na si Rocky mula sa pagkakahimbing niya sa sahig ng kanilang bahay sa Siyathi village na matatagpuan sa Himachal Pradesh, India.

Bigla na lang kasing bumuhos ang napakalakas na ulan sa kanilang lugar kung kaya nabulabog ang pagtulog nito at nagtatahol hanggang sa magising ang kaniyang 35-anyos na amo na si Lalit Kumar.

Pagkagising ay agad na napansin ni Kumar ang malaking bitak sa pader ng kanilang bahay at ang mabilis na pagtaas ng baha sa loob nito.

Nakita ni Kumar kung paanong mabilis na gumuho ang lupa pababa sa kanilang village kung kaya agad niyang binuhat si Rocky at ginising ang kaniyang mga kaanak.

Sa isang pambihirang pagkakataon, ilang sandali lang matapos katukin ni Kumar ang mga kapitbahay para lumikas, tuluyang gumuho ang lupa na siyang sumira at tumabon sa maraming kabahayan.

Dahil sa pagiging alerto ng tuta na si Rocky, ang lahat ng animnaput tatlong residente sa kanilang village ay nakaligtas, bagama’t walang nailigtas na kagamitan ang mga ito.

Samantala, ligtas nang pansamantalang nananatili sa naina devi temple ang mga residenteng iniligtas ni Rocky kung saan nakatanggap ang mga ito ng tulong mula sa gobyerno.

Sa mga fur parents diyan, tinuturuan niyo rin ba ang mga alaga niyo na maging matalino at alerto pagdating sa panganib?

Sa sobrang pagmamahal ng mga fur parents sa kanilang mga alaga, bitbit nila ang mga ito kahit saan man sila magpunta. Katulad ng fur parent na ito mula sa London na hindi alintana ang taas at lubak ng bundok, maitulak lang ang kartilya na sinasakyan ng kaniyang asong nag-aagaw buhay para siguraduhin na magiging memorable ang mga huling sandali nito sa mundo.

Ang kwento sa huling byahe ng aso na ito, eto.

Sabi nga nila, iba ang pagbilang sa edad ng mga aso kumpara sa edad ng mga tao. Ayon pa sa mga eksperto, umaabot lang ng 10-13 years ang average life expectancy ng mga aso. Katulad ng mga tao, nagkakasakit din ang mga ito at nangangailangan ng extra care. Kung kaya nga ang mga fur parents ay todo effort sa pagpapanatili sa kalusugan ng mga ito.

Kagaya na lang ng lalaki mula sa london na si Carlos Fresco, isang fur parent sa 10-year-old labradoodle na si Monty. Mula sa London, bumyahe ang dalawa patungo sa Wales para dalhin si Monty sa bundok sa huling pagkakataon.

Ito ang paraan na naisip ni fresco para siguraduhin na magiging memorable ang huling adventure ni monty na noong panahon na ‘yon ay mahigit isang taon nang lumalaban sa leukemia.

Ayon kay Fresco, hindi na nakakakuha ng sapat na oxygen ang muscles ni Monty at hindi na gaanong nakakalakad. Matapos kasi nitong dumaan sa chemotherapy ay bumalik ang cancer ni Monty.

Isang linggong nanatili si Fresco at Monty sa bahay ng kanilang kaibigan sa brecon at doon ipinasyal ang aso sakay ng isang wheelbarrow o kartilya.

Ayon kay Fresco, nagustuhan ni Monty ang sinakyan nitong kartilya at tuwang-tuwa ito sa nakuhang atensyon mula sa mga taong nakasalubong nila dahil malambing ito at mahilig makisalamuha.

Naging successful naman ang plano ni Fresco at bagama’t malubak ang daan, nagawa niyang iakyat si Monty sa bundok na tinatawag na Pen Y Fan habang sakay ito ng kartilya.

Pero sa kasamaang palad, habang nasa bakasyon ang dalawa ay tuluyang binawian ng buhay si monty matapos ang father’s day. Matapos nito ay inuwi na ni Fresco ang mga labi ni Monty sa London at inilibing sa kanilang garden.

Sa mga fur parents diyan, hanggang saan ang kaya niyong gawin para sulitin ang hiram na sandali na kasama niyo ang mga minamahal niyong alaga?

Ika nga nila, kung sino pa ang walang-wala, sila pa ang maituturing na tunay na mayaman dahil walang pag-aalinlangan ang mga ito sa pagtulong sa mga katulad nila na nangangailangan. Katulad ng lalaking ito sa China na halos wala ng matira para sa kaniyang sarili at mas inuuna ang kapakanan ng ibang tao kahit na siya mismo ay nangangailangan din ng kalinga.

Ang kwento ng lalaking may malaking puso, eto.

Nabubuhay ang 32-anyos na si Hu Lei mula sa Ningxia Hui sa Northwestern China sa pamamagitan ng pamumulot ng mga gamit na kaniya namang inire-recycle at ibinebenta sa gilid ng kalsada.

Sa pamamagitan nito, nagawang makaipon at makapag-donate ni Hu ng one million yuan o may katumbas na mahigit 7.8 million pesos sa 500 mahihirap na mga estudyante mula noong 2008 hanggang 2023.

Pero ang lalaking may napakalaking puso, na-diagnose pala ng polio sa pagkabata, kung kaya mas hinahangaan ito ngayon at binansagan pa na Kneeling Giant.

Bukod sa mga estudyante, muli na namang nagpamahagi ng tulong si Hu sa mga nasalanta ng baha sa Rongjiang County kung saan mahigit isandaang libong mga residente ang naapektuhan.

Si Hu, nag-donate lang naman ng 5,000 kilos ng bigas, 500 kahon ng instant noodles, bottled water, 100 mga torch, at 2,000 pares ng gloves. Pati ang kaniyang mga kaibigan, namahagi rin ng mga relief packs, at ang nagastos nilang magkakaibigan, kung susumahin ay umabot ito ng 75,000 yuan o mahigit 500,000 pesos.

Ang matulunging lalaki, nakatanggap ng papuri sa social media. Mayroon pang nagsabi na bagama’t hindi makatayo at nakaluhod ang lalaki dahil sa kondisyon nito, deserve nito na tingalain at respetuhin.

Samantala, ayon kay Hu, ipagpapatuloy niya pa rin ang pagtulong sa ibang tao kahit na siya mismo ay maraming iniindang sakit, at nakakatanggap naman daw siya ng buwanang subsidy mula sa gobyerno para sa mga may kapansanan.

Sa mga nangangarap na magsagawa ng charity works diyan, ano pang hinihintay niyo? Tandaan, hindi mo kailangang maging mayaman para tumulong sa mga nangangailangan. Ang kailangan mo lang ay mabuting kalooban.

Kapag magbabakasyon ang isang pamilya, aligaga ang lahat na walang maiwanang mahahalagang gamit. Pero ang mister na ito mula sa France na magbabakasyon sana kasama ang kaniyang pamilya, hindi nga nakaiwan ng gamit, pero naiwanan naman ang kaniyang misis.

Kung natuloy pa rin ba ang bakasyon ng pamilya, eto.

Nagmamaneho ang 62-anyos na mister kasama ang kaniyang misis at ang kanilang 22-anyos na anak mula sa Paris, France patungo sa Morocco para sana magbakasyon.

Dahil nasa kalagitnaan ng long drive ang pamilya, hindi maiiwasan na kakailanganin nilang mag-stop over para magpahinga, kumain, at higit sa lahat ay para magbanyo.

Sa isa sa mga ginawang stop over ng pamilya, nagmaneho ang mister paalis sa gas station bandang alas kwatro ng umaga para ipagpatuloy ang byahe.

Pero makalipas ang apat na oras, matapos magmaneho ng 300 kilometro, saka lang napagtanto ng mister na wala pala sa sasakyan ang kaniyang misis at naiwanan ito sa gas station.

Ayon sa mga otoridad, bandang alas otso ng umaga nang makatanggap sila ng tawag mula sa mister na nanghihingi ng tulong na hanapin ang kaniyang asawa.

Sa kasamaang palad, hindi matandaan ng lalaki kung saang gasolinahan at kung anong oras niya ito naiwanan. Nakatulog din umano ang kanilang anak sa byahe kung kaya wala itong maitulong sa paghahanap sa kaniyang nanay.

Dahil nahirapan ang mga pulis sa paghahanap sa babae, pinagsuspetsahan ng mga ito na sinadyang iwanan ng mister ang kaniyang misis.

Mabuti na lang at na-track ang cellphone ng misis at natagpuan ito sa isang service station 300 kilometers ang layo, ibig sabihin, apat na oras itong naghintay na balikan siya ng kaniyang mister.

Samantala, bago patuluyin ang pamilya sa pagbyahe patungo sa kanilang bakasyon, nagsagawa pa rin ng imbestigasyon ang mga pulis at napatunayan na hindi naman talaga sinadya ng mister na maiwanan ang kaniyang misis.

Sa mga makakalimutin na mister diyan, makalimutan mo na ang lahat, wag lang ang anniversary niyo, lalong-lalo na ang misis mo.

Manganganak na lang, napa-duty pa! Ganyan ang nangyari sa isang obstetrician sa Frankfort, Kentucky na naghahanda na sanang manganak pero inuna muna ang kapwa niya pasyente na nangangailangan ng immediate medical attention.

Kung naging matagumpay ba ang pagpapaanak ng buntis na doktor, eto.

Isang araw, nagtungo sa Frankfort Regional Medical Center ang obstetrician na si Amanda Hess hindi bilang isang doktor kundi bilang isang pasyente para isilang ang kaniyang second baby.

Habang hinihintay ni Dr. Hess na magsimula ang procedure para sa kaniyang pagle-labor, napansin niya na sa kalapit niyang kwarto ay mayroong babaeng nagkakaroon ng contractions at nakita rin niya na mayroong mga nurse na nagtatakbuhan.

Sa kasamaang palad, noong mga oras na ‘yon ay wala sa ospital ang kanilang on-call OBGYN at nasa byahe pa lang pabalik sa ospital.

Mabuti na lang at nasa ospital si Dr. Hess, na bagama’t malapit na ring manganak ay walang pagdadalawang isip na tumugon muna sa tawag ng tungkulin, lalo na at nakapulupot na umano ang umbilical cord sa leeg ng baby ng pasyente at humihina na rin ang heartbeat ng bata.

Sa tulong ng buntis na doktor, matagumpay at ligtas na isinilang ng pasyente na si Leah Halliday-Johnson ang pang-apat niyang anak.

Samantala, pagkatapos ng tila isang normal na araw sa trabaho, bumalik si Dr. Hess sa kwarto kung saan siya naka-admit at pagkalipas lang ng labinisang oras ay winelcome na niya ang pangalawa niyang anak na si Ellen Joyce.

Sa mga female doctors diyan, pwede niyo bang i-share ang kakatuwang kwento ng pagbubuntis niyo while on duty?

Nakadepende sa pangangailangan ng users kung ano ang magiging purpose sa kanila ng social media. Para sa iba ay nagsisilbi itong libangan, pero para sa karamihan ay isa na itong hanapbuhay at platform para makilala. Katulad ng isang babae sa India na sa sobrang busy sa pagpapalawak ng kaniyang social media presence ay nakalimutan na ang mga gawaing bahay at nauwi pa sila sa demandahan ng kaniyang asawa.

Kung natuloy ba ang reklamo ng mag-asawa sa isa’t isa, eto.

Mapayapang naninirahan ang mga-asawang Nisha at Vijendra sa kanilang tahanan sa Noida na matatagpuan sa Uttar Pradesh, India.

Katulad ng iba, mayroon ding hobby ang 30-anyos na misis na si Nisha at yan ay ang araw-araw na pagpo-post ng dalawang reels sa kaniyang Instagram account.

Pero nang punahin ng kaniyang mister na si Vijendra ang pagiging babad niya sa social media at sinabing paglaanan din niya ng oras ang mga gawaing bahay, naapektuhan ang kaniyang daily uploads at social media presence.

Walang anu-ano’y nag-alsa balutan ang babae at bumalik sa bahay ng kaniyang mga magulang nang mabawasan ng dalawa ang kaniyang followers at nagsampa na ng reklamo laban sa kaniyang asawa.

Sinabi ng babae sa mga pulis na nawalan siya ng oras sa paggawa ng reels dahil naging busy siya sa paglilinis sa kanilang bahay.

Si mister, hindi nagpahuli at inireklamo rin ang kaniyang misis dahil napapabayaan umano nito ang mga gawaing bahay dahil sa pagiging busy sa Instagram.

Samantala, nang mapag-alaman ng mga pulis ang hinaing ng mag-asawa ay masinsinan nilang kinausap ang mga ito at ngayon ay nagsasama nang muli sa kanilang bahay. Pero ang lalaki, on the hunt ngayon sa trabaho dahil nawalan ito ng trabaho matapos ireklamo ng kaniyang misis.
Sa mga may asawa na diyan, kilos-kilos muna kasi sa bahay bago atupagin ang social media. Tandaan, magkatulong niyong binuo ang bahay niyo kaya dapat, magkatulong niyo rin itong itaguyod.

Kung minsan ay nababagalan tayo sa pagtakbo ng oras lalo na kapag nasa eskwelahan o trabaho. Pero minsan naman ay napakabilis ng takbo nito at halos hindi natin mapagkasya ang dami ng mga gawin. Pero napansin niyo ba na noong nakaraang Miyerkules, July 9, 2025, ay napakabilis ng oras? Umabot pa sa punto na maaari itong mapabilang sa history.

Kung bakit nga ba mapapabilang sa kasaysayang ang July 9, 2025, eto.

Ang bawat oras na lumilipas sa kada araw, ginagamit mo ba nang tama? Sigurado ka ba na hindi mo ito sinasayang sa mga walang kwentang bagay? Sige ka, baka maubusan ka ng oras niyan.

Katulad na lang noong nakaraang Miyerkules, napansin mo ba na mabilis na natapos ang araw? Sa sobrang igsi ng araw, maaari itong maitala bilang pinakamaigsing araw sa International Earth Rotation and Reference System Services (IERS).

Ang bawat araw na dumaraan ay binubuo ng 86,400 seconds. Pero ayon sa mga eskperto, ang July 9, 2025 ay mas maigsi ng 1.3 milliseconds.

Ito ay dahil sa bahagyang pagbilis sa pag-ikot ng mundo noong Miyerkules kumpara sa karaniwang bilis nito dahil sa paglaki ng distansya sa pagitan ng buwan at ng Earth.

Sa katunayan hindi naman iyon ang unang beses na nangyari ang phenomenon na ito, dahil nitong nakaraang taon, naitala ang July 5 bilang pinakamaigsing araw dahil mas maigsi lang naman ito ng 1.66 milliseconds.

Samantala, inaasahan na mangyari pa ulit ang nasabing phenomenon sa darating na July 22 at August 5.

Sa mga mahilig magrelak-relak diyan, ihanda mo na ang to-do-list mo para hindi ka maubusan ng oras sa susunod na umigsi ulit ang araw.

Shopping dito, check out doon. Ganyan ang routine ng iba sa atin kapag payday Friday. Pagkapasok ng sweldo, ilalabas din agad, hindi lang sa mga pangangailangan kundi pati sa mga luho. Tingnan natin kung hindi kayo magdalawang isip na gumastos sa susunod na sahod kapag nakita niyo ang nadiskubre ng isang lalaki sa cabinet ng kaniyang mga magulang.

Kung ano nga ba ang pinakatatago sa cabinet na ito, eto.

Nagulantang ang content creator na nakilala bilang ‘Kuya Bro’ nang buksan niya ang tila isang ordinaryong cabinet ng kaniyang mga magulang.

Sa ibinahaging video, makikita na makailang ulit sinubukang buksan ng lalaki ang padlock ng cabinet na matagal na umanong nakakandado. Naisipan niya lang itong silipin dahil namamalengke umano ang kaniyang mga magulang at curious siya sa kung ano ang laman nito.

Nang tuluyang mabuksan ang kandado ng cabinet, bumungad sa lalaki ang samu’t saring mga gamit na napapalibutan na ng mga agiw at alikabok.

Isa-isa itong kinalikot ng lalaki na maayos niya ring ibinalik dahil walang permiso niya itong binuksan. Nang buksan niya ang isang lumang bag, nagulantang ang lalaki nang makakita ng sandamakmak na bente pesos na masinop na itinabi ng kaniyang nanay.

Bukdo pa rito, nadiskubre niya rin ang isang envelope na naglalaman ng perang nagkakahalaga ng P32,500, at isa pang envelope na ang nilalaman naman ay P15,000 na bonus pa ng kaniyang tatay sa trabaho.

Hindi pa riyan nagtatapos ang itinatagong yaman ng kaniyang mga magulang dahil mayroon pang isang kahon na naglalaman ng mas malaking halaga ng pera na binubuo ng mga 100, 50, at 20 peso bills.

Ang video na naisipang kuhanan ng lalaki out of curiosity, nagsilbing inspirasyon at paalala na bagama’t minamaliit ang halaga ng mga barya, lumalaki pa rin ang value nito kapag pinagsama-sama.

Samantala, napabilib naman ang commentators at pinuri ang pagiging masinop sa pera ng nanay ng uploader. Sa katunayan, sinabi ng content creator na dalawang bags ng kaniyang nanay ang muntikan na nilang itapon na naglalaman din pala ng mga pera.

Sa mga gastador diyan, na-inspire ba kayo na mag-ipon dahil sa kwentong ito? Hinay-hinay sa paggastos at pag-ipunan ang kinabukasan sa halip mag-waldas sa mga bagay na walang katuturan.

Isang pulis ang inaresto matapos gampanan ang kaniyang trabaho na humuli ng masasamaang loob na lumalabag sa batas. Ang pulis kasi, nagkamali ng bunot! Sa halip kasi na taser gun, tunay na baril ang nabunot nito at naiputok pa!

Kung tinamaan ba ng bala ang hinahabol na suspek, ito.

Nagsimula ang maaksyong paghahabulan ng pulis na si Officer Brandon Thomas at ng suspek nang mahulihan niya ito ng umano’y marijuana sa isang sasakyan na sa ibang tao nakarehistro ang plate number.

Nang masita at makita ng pulis ang ipinagbabawal na droga, agad na kumripas ng takbo ang suspek.

Habang naghahabulan ang dalawa, maririnig pa ang pulis na binabalaan ang lalaki na tumigil sa pagtakbo at kung hindi ay gagamitan niya ito ng taser.

Sa kalagitnaan ng mala-pelikula at maaksyong paghabol dito, bumunot ang pulis ng baril, pero hindi ng taser gun, kundi ng isang literal na baril at pinaputok ito sa suspek.

Pati ang pulis ay nagulat nang marinig ang pagputok ng baril at sinabing hindi niya ito sinasadya.

Matapos dumaan sa Office of the Inspector General ang nangyari, napatunayang baril nga ang nahugot ng pulis, dahilan para maaresto ito dahil sa paglabag sa mga kasong second-degree reckless endangerment at unlawful discharge of firearm.

Muli ring dumaan si Officer Thomas sa remedial training pero baril na naman ang nabunot nito sa halip na taser gun.

Dahil dito, sumailalim na muna ang pulis sa restricted duty, habang matagumpay naman nilang dinakip ang hinabol niyang suspek na sa kabutihang palad ay hindi tinamaan ng bala ng baril.
Sa mga nagmamay-ari ng mga armas diyan, dahan-dahan lang sa pagbunot at baka magamit niyo ito sa maling pagkakataon o di naman kaya ay baka maling tao ang mapaputukan niyo.

Sa mga pet lovers diyan, sa paanong paraan niyo sinisigurado na hindi magdadala ng kapahamakan sa inyo at sa mga kapitbahay niyo ang mga inaalagaan niyong hayop? Ang pamilya kasi na ito sa Pakistan, naaresto matapos mag-alaga ng leon sa kanilang bahay. Hindi lang yan, naka-perwisyo rin ito at nang-atake ng mga residente matapos makatakas.

Kung ano ang kinahinatnan ng nakatakas na leon, eto.

Nahuli sa CCTV kung paanong nakaakyat at lumundag mula sa pader ang isang alagang leon at hinabol ang isang babae at dalawang mga bata sa lungsod ng Lahore sa Pakistan.

Kitang-kita kung paano dumapa sa kalsada ang dinambaan nitong ginang bago nagtatakbo papalayo.

Ayon sa mga ulat, nagtamo ng mga pasa at galos sa katawan ang ginang, habang naospital naman ang mga batang hinabol nito na edad syete-anyos at singko-anyos.

Samantala, naaresto na ng mga otoridad ang mga nagmamay-ari ng leon at naakusahan na wala umanong lisensya ang mga ito at naging pabaya kung kaya nakatakas ang mabangis na hayop. Mahaharap ngayon ang mga ito sa pitong taon na pagkakakulong o magbabayad ng multa na aabot ng $17,500 o mahigit P900,000.

Matapos nito ay kinumpiska na ang nasabing leon at dinala sa isang safari park sa kanilang lugar.

Bukod sa umatakeng leon, nagsagawa rin ng raid ang Wildlife and Parks Department sa 38 lion and tiger breedings farms kung saan 18 mga hayop ang nakumpiska at walong mga indibidwal ang naaresto.

Ayon sa director general ng departamento na si Mubeen Elahi, ang pag-aalaga ng mga leon ay kinakailangan ng lisensya at mayroong dapat sundin na tamang sukat ng kulungan at standard operating procedures.
Samantala, napag-alaman na ang pag-aalaga pala ng mga leon ay isang simbolo ng kapangyarihan at para sa mga pakistani, isa naman itong simbolo ng kaymanan.

Sa mga naghahangad na mag-alaga ng mababangis na hayop diyan, bago kayo magdesisyon, isipin niyo muna nang maigi ang magiging kapakanan, hindi lang ng hayop, kundi lalo na ng mga taong nakapaligid sa inyo.