HOT STORIES OF THE WEEK

Hinimok ng Department of Health o DOH ang mga magulang na huwag dumipende lamang sa mga anti- dengue vaccine program ng pamahalaan.

Sinabi sa DWIZ ni Health Secretary Francisco Duque III na ito’y dahil sa hindi isandaang (100) porsyento ang ibinibigay na proteksyon ng nasabing bakuna lalo na sa mga may history ng dengue.

Giit pa ni Duque, walang ibang dapat gawin ang mga magulang kung hindi pag-ingatan ang kanilang mga anak mula sa mga lamok na nagdadala ng naturang sakit sa pamamagitan ng araw-araw na paglilinis ng kapaligiran.

“Itong dengvaxia ay mababa ang protective and efficacy rate niyan, siguro at the most 80 percent, at the least 40 percent,  and average of about 60 percent efficacy or protection, so ibig sabihin niyan kahit na nabakunahan ka posible pa rin na tamaan ka ng dengue at yung ibang hindi nabakunahan ganun pa rin, kaya yung tinatawag nating prevention is still the order of the day.” Ani Duque

Kasunod nito, sinabi ni Duque na magpapatupad sila ng heightened surveillance kung saan, bibigyan nila ng ID at baller ang mga kabataan na naturukan na ng dengvaxia.

“Susulatan natin, maliban doon sa mga ID cards and ballers meron tayong targeted letters of instructions, advise sa mga magulang, mga anak, guro, local government units, chief executives. We have to approach this na magkakasama, may complimentation of activities.” Dagdag ni Duque

(Sapol Interview)

Nanindigan si dating Health Secretary Paulyn Ubial na inudyukan siya ng mga mambabatas na palawigin at palawakin pa ang dengue vaccination program ng pamahalaan.

Ito’y sa kabila ng pagtanggi ng asawa ni dating DOH Secretary Janette Garin na si Iloilo Representative Oscar Garin Jr. at Cebu Representative Gwen Garcia na pinilit nila si Ubial na gawin ang expansion ng programa sa Region 8.

Sa panayam ng DWIZ kay Ubial, mayroon na aniyang naging pasya ang binuo niyang panel noong Hulyo ng nakalipas na taon para ipatigil ang pagtuturok ng dengvaxia sa mga kabataan.

“Sa akin lang is dapat yung science hindi na pinapasukan ng pulitika, mayroong desisyon yung expert panel na kinonvene ko July 21 na huwag nang ipatuloy, last year, tapos yung budget hearing I think was around August, September, may desisyon na, na hindi itutuloy, tatapusin na lang yung nabigyan ng first dose, tatapusin up to three doses, yung nabigyan nung April, May up to June, sa Region 3, 4-A and NCR, na decision ng expert panel na yun na lang ang itutuloy.” Ani Ubial

Nilinaw din ni Ubial na kanilang ibinatay sa inilabas na rekomendasyon ng binuo niyang expert panel ang pagpapatigil sa nasabing programa

“Kung hindi yan tinake up doon, tapos na yung desisyon eh, hindi na kami magkakaroon ng dilemma whether to expand it or not, and when asked for a second panel to convene for second opinion, I did that but that was their decision, I based my decision on the recommendation of the expert panel.” Dagdag ni Ubial

“Mga programa ng DOH suportahan na lang kaysa kuwestyunin”

Hindi rin napigilang maglabas ng sama ng loob ni Ubial sa mga mambabatas na kumukuwestyon sa mga programang bakuna ng pamahalaan.

Kasunod ito ng naging pagbubunyag ni Ubial hinggil sa pakikialam umano ng mga mambabatas kung saan, inudyukan siyang bumili ng mas marami pang mga bakunang dengvaxia kahit tinututulan niya ang pagpapatupad nito.

Sinabi sa DWIZ ni Ubial na hindi dapat ginagawang pampapogi ng mga pulitiko ang naturang programa dahil nasasakripisyo rito ang kalusugan ng taumbayan.

“Hindi ko po sinasama sa diskusyon ng budget dahil that is a health decision, ang programa ng DOH huwag na po nilang ikukuwestyon, kasi yan ay pinag-aralan at pinag-aaralan nang mabuti para ma-ensure yung safety at kalusugan ng ating mga kababayan, yun lang po, ayoko na sanang magsalita pagkatapos nung hearing but I felt it was very important to change the system.” Pahayag ni Ubial

Nakalulungkot ani Ubial na sinusunod niya ang mga proseso gayundin ang mga rekomendasyon ng mga eksperto subalit siya pa rin ang masisisi sa dakong huli.

“Sa panahon na yun parang I made a decision and I own up to that decision eh bakit ngayon ako pa ang sinisisi nila bakit ko inexpand, so I have to tell the truth, what happened na although there was pressure parang dinaan ko pa rin sa proseso, I consulted the experts, we looked at all the evidence that was available at that time when I made the decision and I own up to that decision.” Ani Ubial

(Sapol Interview)

Sinampahan ni dating Technical Education and Skills Development Authority o TESDA Chief at Iloilo Representative Augusto Syjuco Jr. si dating Pangulong Noynoy Aquino ng kasong mass murder at plunder sa Office of the Ombudsman.

Kaugnay ito sa pagbili at pagpapabakuna ng nasa 3.5 billion pesos na halaga ng dengvaxia dengue vaccine.

Kasama rin sa kinasuhan si dating Health Secretary Janette Garin at ilan pang mga Jane Doe at John Doe.

Gayunman aminado si Syjuco na wala siyang hawak na mga ebidensya laban sa dating pangulo at ang tanging meron lamang siya ay pinagsama-samang mga news articles at report kaugnay sa usapin ng dengvaxia.

Matatandaang kahapon ay humarap sa pagdinig ng Senado si Aquino at Idinepensa ang ipinatupad na dengue vaccination program sa ilalim ng kanyang administrasyon.

Binigyang diin nito na 2010 pa problema ang dengue sa bansa at batay aniya sa ulat ni dating Health Secretary Enrique Ona, limang rehiyon sa bansa ang may pinakamataas na kaso ng dengue noong panahong iyon.

 (Ulat ni Jill Resontoc)