HOT STORIES OF THE WEEK

Wala nang nalalabing kaso ng coronavirus disease 2019 (COVID-19) sa National Center for Mental Health (NCMH) sa Mandaluyong.

Masayang ibinalita ito ni NCMH medical center chief Dr. Roland Cortez kung saan, mula aniya nitong Miyerkules ng tanghalim ika-17 ng Hunyo, lahat ng kanilang 3,200 na pasyente at 2,435 na staff ay COVID-19-free na.

Una nang nagpositibo sa COVID-19 ang nasa 41 na pasyente at 86 na empleyado ng NCMH.

Naka-recover naman mula sa virus ang lahat ng mga empleyadong tinamaan ng virus, ngunit pito (7) naman sa mga infected patients ang nasawi.

Nagpahayag din ng kalungkutan ang NCMH sa kanilang mga nasawing pasyente at ipagpapatuloy aniya nila ang pagsunod sa mga protocols upang matiyak na wala nang buhay na manganganib dahil sa COVID-19.

Guilty ang hatol ng Manila RTC branch 46 kay Rappler CEO Maria Ressa at dating Rappler researcher Reynaldo Santos Jr. sa kasong cyber libel.

Sinentensyahan sina Ressa at Santos na makulong ng anim na buwan hanggang anim na taon.

Samantala, inabswelto naman ng korte ang Rappler bilang isang korporasyon sa kaso.

Inatasan ng hukuman si Ressa at Santos na magbayad ng P200,000 danyos kay Keng bilang moral damages at P200,000 exemplary damages.

Mananatili namang malaya sina Ressa at Santos, gamit ang nauna na nilang pyansa.

Si Ressa, Santos at Rappler ay kinasuhan ng cyber libel noong January 2019 dahil sa artikulo na nalathala sa Rappler noong 2012 kung saan iniuugnay sa human trafficking ang complainant na si Wilfredo Keng base sa isang intelligence report.

Sabay-sabay na ginunita ang ika-122 anibersaryo ng Araw ng Kalayaaan.

Halos sabay-sabay na iwinagayway ang bandila ng bansa sa Rizal Park, Kawit Cavite, Panganiban San Juan, Malolos Bulacan, Monumento Caloocan, Pampanga, Davao at Cebu.

Nasa tig-10 opisyal lamang ng pamahalaan ang dumalo sa bawat aktibidad bilang pagsunod sa pagbabawal sa mass gathering.

Bagamat hindi pisikal na nakadalo ang Pangulong Rodrigo Duterte sa Luneta, ipinalabas naman sa malaking screen doon ang kanyang mensahe.

Umabot na sa halos 10 milyong estudyante ang nakapag-enroll sa loob lamang ng isang linggo.

Ipinaabot ni Education Secretary Leonor Briones sa senado na resulta ito ng magandang kooperasyon ng lehislatura at LGU’s lalo na sa barangay level.

Ayon kay Briones, ang 10 milyon ay katumbas na ng halos 40% ng kanilang target enrollment para sa school year 2020 -2021.

Iniulat rin ni Briones sa senado na marami nang LGU’s ang nangako ng tulong para sa mga estudyante at mga guro lalo na sa isyu ng gadgets na gagamitin sa online schooling.

Maaari nang tumanggap ng dine-in customer ang mga restaurant sa mga lugar na nasa general community quarantine (GCQ) kabilang na ang Metro Manila simula sa ika-15 ng Hunyo.

Ito’y matapos aprubahan ng Inter-Agency Task Force (IATF) ang rekumendasyon ng Department of Trade and Industry (DTI) hinggil sa gradual opening ng mga restaurant.

Ayon kay DTI Secretary Ramon Lopez, sa gradual opening na ito ng mga restaurant ay 30% lamang ng kanilang operating capacity ang pinapayagan.

Kumbinsido ang isang health expert na handa na ang Metro Manila at ang buong bansa para sa mas maluwag na quarantine.

Ayon kay Dr. Susan Mercado, kung mapapansin, 80% ng COVID-19 cases sa bansa ay pawang mild cases na hindi na kailangang dalhin sa ospital kaya’t marami na ang gumagaling.

Bagamat nakakalungkot anya na may mga namamatay pa rin araw-araw, hindi naman ito katulad ng ibang bansa na libo-libo ang nasasawi kada araw.

Sinabi ni Mercado na kahit ang mga ICU at ventilators ng mga ospital sa ngayon ay maluwag.

Merong karagdagang kaalaman na ang mga hospital, ang ating mga health facilities; ang pinaka importante hawak ng local government natin ay hasang-hasa na. So, kung magkakaroon man ng outbreak kunwari sa isang barangay mukhang handa na sila dito sa Metro Manila na mag-lockdown ng smaller areas at tulungan yung magkakalapit kasi talagang naghihirap ang mga tao kapag sarado yung ekonomiya natin,” ani Mercado.

Binigyang diin ni Mercado na kailangan nang magbalik sa normal ang pamumuhay ng mga Pilipino dahil hindi na mawawala ang banta ng COVID-19.

Magiging bahagi na anya ito ng ating buhay tulad ng dengue at iba pang sakit na kailangang harapin kasabay ng pagpapatuloy ng buhay.

Pero sa mga bagong pag-aaral na makikita natin talagang nakakahawa siya kapag may sintomas at kapag maaga pa ang mga bagong lumalabas sa pag-aaral ngayon sa Estados Unidos pati naman sa WHO. Pagkadating ng 8, 9, 10, 11, kahit nag-positive yung PCR hindi pa rin mabubuhay yung virus,” ani Mercado. — panayam mula sa Ratsada Balita.

Nabulaga si Defense Secretary Delfin Lorenzana nang magtungo ito sa Pag-asa Island upang pangunahan ang inagurasyon ng beaching ramp sa isla ngayong Martes, ika-9 ng Hunyo.

Ito ay makaraang nakatanggap ito ng ‘welcome’ text mula sa isang telco na nagsasabing sila ay nasa China at Vietnam kahit pa nasa teritoryo ito ng Pilipinas.

Nakasaad din sa text na maaaring magamit ang telco service sa pamamagitan ng roaming partners nito sa dalawang naturang bansa.

TINGNAN: Mensaheng natanggap mismo ni Defense Secretary Delfin Lorenzana nang makatapak sa Pagasa Island para pangunahan ang inagurasyon ng beaching ramp doon | via @jaymarkdagala pic.twitter.com/9r1rjjvzuK

— DWIZ Newscenter (@dwiz882) June 9, 2020

Nakatanggap din umano ng kaparehong text message ang mga reporters na nagtungo sa Pag-asa Island upang mag-cover sa nabanggit na inagurasyon.

Samantala, kasama namang nagtungo ni Lorenzana ang ilan pang matataas na opisyal ng militar upang pasinayaan ang itinayong beaching ramp sa isla na magbibigay daan upang pagtibayin ang komunidad at presensya ng mga Pilipino sa lugar.

Ang Pag-asa Island ay bahagi ng teritoryo ng West Philippine Sea —teritoryo na inaangkin din ng China.

Naipadala na sa Malakanyang ang anti-terror bill para sa lagda ng Pangulong Rodrigo Duterte.

Ayon kay Senate President Vicente ‘Tito’ Sotto III, kagabi lamang nila ito nilagdaan ni House Speaker Alan Peter Cayetano.

Hindi na dumaan sa bicameral conference committee ang anti-terror bill dahil ang bersyon na rin ng senado ang ipinasa ng mababang kapulungan.

Bagamat sinertipikahang urgent ang anti-terrorism bill, sinabi ng Malakanyang na isasalang muna ito sa review ng Pangulong Rodrigo Duterte.

Una rito, kabi-kabilang kampanya at demonstrasyon ang isinagawa ng mga aktibista bilang pagtutol sa anti-terrorism bill na anila’y may mga probisyon na posibleng makalabag sa karapatang pantao.

Gumugulong na ang imbestigasyon ng facebook sa naglipanang duplicate accounts ngayon ng maraming indibidwal.

Ayon kay Commissioner Raymond Liboro ng National Privacy Commission (NPC), bukas ang linya ng kanilang tanggapan sa facebook para sa development ng imbestigasyon.

Sa ngayon aniya ay hindi pa puwedeng iugnay sa pulitika ang pagkalat ng mga duplicate accounts sa fb at kung anong sektor ang target nito.

Malaki aniya ang maitutulong sa imbestigasyon kung ang bawat biktima ng cloning o duplication ay magre-report sa fb.

Before marami din silang nilagay na privacy features ngayon ang marapat na lamang dito ay maaskyunan nila itong mga nagrereklamo, yun ang hihintayin natin,” ani Liboro.

Tiniyak ni Liboro na papasok sa imbestigasyon ang NPC kapag ginamit na ang fake o duplicate accounts sa pagbabanta o illegal na gawain.

Well, yung biktima siya ang kailangan mag-file ng reklamo dyan; ang rules din namin ay una yung biktima ay kailangan sabihin niya sa facebook kasi sila nag-o-operate ng platform at kung hindi sila aaksyon dyan ay maaari rin kaming pumasok sa bagay na yan,” ani Liboro. — Panayam mula sa Ratsada Balita.