HOT STORIES OF THE WEEK

Inihayag ni Pangulong Rodrigo Duterte na balang araw ay mayroon siyang isisiwalat laban sa kaniyang kritiko na si Rappler CEO Maria Ressa.

Sa kaniyang public address, nabanggit ng pangulo ang mga ulat o alegasyon kaugnay sa mga umano’y nangyayaring kurapsyon sa gitna ng pagtugon ng pamahalaan sa coronavirus disease 2019 (COVID-19) pandemic.

Dito nabanggit din ng pangulo si Ressa dahil sa kaniya aniyang mga alegasyon dahilan kaya ito umano nakasuhan ng cyber libel.

Dahil dito, tinawag ng pangulo si Ressa na “fraud” at sinabing kaniya itong patutunayan balang araw.

Tiniyak ni Pangulong Rodrigo Duterte na walang dapat ikatakot ang mga Pilipinong sumusunod sa batas.

Ito’y sa gitna ng kontrobersiya sa bagong batas na anti-terrorism law.

Ayon kay Pangulong Duterte, hindi dapat matakot ang mga Pilipinong wala namang hangad o planong masama laban sa gobyerno.

For the law-abiding citizens of this country, I am addressing you with all sincerity. Huwag ho kayo matakot kung hindi ka terorista,” ani Duterte.

Sinabi pa ng pangulo na maging sya ay ayaw rin ng gulo o giyera.

Wala naman gustong may gyera. Ako ayaw ko. Lalo na ako,” ani Duterte.

Naniniwala si Pangulong Rodrigo Duterte na magkakaroon na ng bakuna o gamot laban sa coronavirus disease 2019 (COVID-19) sa Disyembre.

Ayon kay Pangulong Duterte, kun’di man magkaroon ng bakuna ay posibleng mayroon ng gamot para sa COVID-19 bago magtapos ang taon.

I think by December mayroon na hong vaccine or at least if not a vaccine, a medicine that could kill the COVID-19,” ani Duterte.

Sinabi pa ng pangulo na mas nanaisin niyang makakuha muna ng gamot para puksain ang virus at saka na lamang kumuha ng bakuna.

Magugunitang ilang beses na rin nagkaroon ng pahayag ang pangulo kaugnay sa pagkakaroon na ng bakuna laban sa sakit dahil umano sa tagumpay ng ginagawang pag-aaral ng mga Chinese researcher.

Iniatras na ng Department of Health (DOH) ang paggamit ng dalawang gamot sa mga coronavirus disease 2019 (COVID-19) patients sa ilalim ng solidarity trial ng World Health Organization (WHO).

Ito, ayon kay Health Undersecretary Maria Rosario Vergeire, ay base na rin sa mga nakitang ebidensya at rekomendasyon ng mga experts ng bansa laban sa paggamit ng hydroxychloroquine at kombinasyon ng HIV drugs na lopinavir-ritonavir sa mga pasyenteng dinapuan ng COVID-19.

Sinabi ni Vergeire na kaagad nilang ipinatigil ang paggamit ng hydroxychloroquine nang mailabas ng experts ang ebidensya laban dito.

Lumalabas aniya sa interim trial results na maliit lamang o halos walang epekto sa mortality ng mga naka-confine na COVID-19 patients ang hydrochloroquine at lopinavir-ritonavir combination, kumpara sa standard of care o mahigpit na pagtutok ng medical experts  sa isang may sakit.

Dahil dito, ipinabatid ni Vergeire na gagamitin na lamang ngayon ang kumbinasyon ng remdesivir at interferon para sa medical treatment laban sa COVID-19, mula sa hiwalay na paggamit sa mga gamot nito noong mga nakalipas na araw.

WHO ipinatigil na ang paggamit ng ilang anti-HIV drugs, hydroxychloroquine  vs. COVID-19

Ipinatigil ng World Health Organization (WHO) ang paggamit ng ilang anti-HIV drugs at hydroxychloroquine sa mga isinasagawang clinical trials sa pagtuklas ng gamot laban sa coronavirus disease 2019 (COVID-19).

Ito ay matapos na matuklasan ng WHO na hindi naman nito nagagawang mapaliit ang tyansa na masawi ang mga pasyente ng COVID-19 na sumasailalim sa mga clinical trials.

Samantala, sinabi naman ni WHO director-general Tedros Adhanim Ghebreyesus na nakatakda nang lumabas ang unang resulta ng kanilang isinasagawang clinical trials sa loob ng dalawang linggo.

Matatandaan namang nasa 5,500 ang mga COVID-19 patients mula sa 39 na bansa kabilang na ang Pilipinas na lumahok sa clinical trials sa paghahanap ng lunas sa naturang virus.

Malayo pang matapos ang nararanasang coronavirus disease 2019 (COVID-19) pandemic sa iba’t ibang panig ng mundo —eksakto anim na buwan makaraang mapaulat ang unang mga kaso ng pneumonia sa China na kinalauna’y natukoy na dulot ng naturang virus.

Ito, ayon kay World Health Organization (WHO) director-general Tedros Adhanom Ghebreyesus, ay bagaman nagkakaroon ng magandang pagbabago ang ilang mga bansa hinggil sa kanilang laban sa virus, ay bumibilis din ang pagkalat nito.

Lubha aniyang malaki na ang nawala sa mundo dahil sa COVID-19 ngunit hindi dapat mawala ang pag-asa.

Panahon aniya ito upang pagnilayan ang mga nagawa ng bawat bansa upang labanan ang naturang virus at gawin ng bawat isa ang lahat upang makapagligtas ng buhay.

Sa ngayon, umabot na sa mahigit 10-milyong ang bilang ng kaso ng COVID-19 sa buong mundo habang mahigit kalahating milyon na ang pumanaw dahil dito.

Isusumite ngayon ng Pangulong Rodrigo Duterte ang kanyang huling ulat sa kongreso kaugnay sa pagtupad ng pamahalaan sa Bayanihan to Heal as One law.

Ito na ang ika-14 na ulat ng pangulo sa kongreso mula nang maisabatas ang Bayanihan to Heal as One act kung saan binigyan ng kapangyarihan ang pangulo na mag-realign ng budget para magamit sa pagresponde sa coronavirus disease 2019 (COVID-19) pandemic.

Nagpaso na ang batas noong ika-25 ng Hunyo at inaasahang magpapasa muli ang kongreso ng kahalintulad na batas dahil hindi pa tapos ang laban sa pandemya.

Samantala, tiniyak naman ni Presidential Spokesman Harry Roque na tuloy ang pamamahagi ng ikalawang tranche ng social amelioration program kahit pa nagpaso na ang Bayanihan to Heal as One act.

Paglalaan naman anya ng pondo ang nakasaad sa batas at hindi ang pisikal na distribusyon ng ayuda.

Inaasahang iaanunsyo ngayong araw na ito ng pangulo ang magiging estado ng quarantine sa mga rehiyon sa bansa.

Pinakamabilis ang pagdami ng coronavirus disease 2019 (COVID-19) sa Pilipinas kumpara sa ibang mga bansa sa Western Pacific Region.

Batay sa datos ng World Health Organization (WHO), mula lamang noong ika-16 ng Hunyo ay nakapagtala ng mahigit sa 8000 kaso ng COVID-19 ang Pilipinas o tatlong beses na mas mataas sa pumapangalawa na Singapore.

Ayon sa WHO, nagtala ng mahigit sa 2,000 kaso ang Singapore sa nagdaang dalawang lingo, samantalang mahigit sa 300 naman sa China kung saan pinaniniwalaang nagmula sa virus.