HOT STORIES OF THE WEEK

Bibigyan pa ng Department of Interior and Local Government (DILG) ng final push ang panukalang amyendahan ang konstitusyon.

Ayon kay DILG Usec. Jonathan Malaya, agad nilang isusumite sa pagbubukas ng sesyon ng kongreso ang resolusyon ng league of municipalities na, nananawagan ng pag-usad ng charter change.

Binigyang diin ni Malaya na hindi naman bago o biglaan ang pagsusulong nila ng cha-cha kundi bahagi na ng agenda ng Pangulong Rodrigo Duterte bago pa ito naupo bilang Pangulo kaya’t dapat lamang na itulak nila ito sa natitira pang dalawang taon ng kanyang administrasyon.

Sa katunayan, mayroon anyang Inter Agency Task Force (IATF) na binuo para lamang sa charter change kung saan si DILG Secretary Eduardo Año ang chairman.

Idinepensa ni Malaya ang pagbuhay nila sa cha-cha sa panahon ng COVID-19 pandemic.

Kahit naman anya mayroong pandemya ay nagawa naman ng kongreso na tumalakay ng ibang isyung panlipunan.

Nilinaw ni Justice Secretary Menardo Guevarra na magiging epektibo na ang Republic Act No. 11479 o Anti-Terrorism Act of 2020 bukas, Hulyo 18, at hindi sa Linggo, Hulyo 19.

Ayon kay Guevarra, dahil nailathala na sa pahayagan o Official Gazette ang batas noon pang Hulyo 3, dapat itong ipatupad makalipas ang 15 araw.

Matatandaang binatikos ng ilang sektor ang ginawang paglagda ni Pangulong Rodrigo Duterte sa anti-terror law dahil sa anila’y malabong definition ng salitang “terorismo” na posible umanong gamitin laban sa mga kritiko ng gobyerno.

Maaari na muling pumasok ang mga dayuhan sa Pilipinas simula sa unang araw ng Agosto.

Gayunman, may mga inilatag na kundisyon ang Inter Agency Task Force (IATF) sa pagpasok ng mga dayuhan sa bansa.

Una, tanging ang mga may dati nang visa ang papayagang makapasok sa Pilipinas at bawal pa rin ang new entry visa.

Dapat ay mayroon na silang pre booked accredited quarantine facility at pre booked coronavirus disease 2019 (COVID-19) testing provider.

Ayon sa IATF, ipatutupad rin ang maximum capacity para sa mga pumapasok na bansa, base sa petsa ng kanilang pagdating dahil prayoridad pa rin ang mga OFW’s na nagbabalik bansa.

Aprubado na ng National Task Force on COVID-19 ang barriers na gagamitin sa mga motorsiklo.

Para sa mga backriding couples, puwede na ang harang na gawa sa manipis na plastic.

Pero nilinaw ni NTF- COVID-19 Chairman Delfin Lorenzana na tanging mag-asawa, common law couple at live in partners ang pinayagan nilang umangkas sa motorsiklo

Samantala, iba naman ang disenyo para sa mga motorcycle taxis tulad ng Angkas.

Gawa ito sa mas makapal na plastic na tulad ng ginagamit sa mga containers.

Bigo ang Department of Health (DOH) na makapagpalabas ng pinakahuling tala ng kaso ng coronavirus disease 2019 (COVID-19) sa bansa para sa araw ng Linggo, ika-12 ng Hulyo.

Ito, ayon sa abiso ng DOH, ay dahil sa sa maraming bilang ng mga nakalap na datos bilang bahagi ng mga isinasagawang hakbang ng ahensya upang mapagtugma ang mga datos sa mga lugar sa National Capital Region (NCR) at sa iba pang mga rehiyon.

Kasalukuyan pa umano nilang vina-validate ang mga naturang bilang para sa nabanggit na araw.

“Due to significant volume of data gathered today as part of DOH’s efforts to harmonize data with the cities of NCR (National Capital Region) and the different regions, the DOH Data Team is still currently in the process of validating today’s numbers,” ayon sa DOH.

Giit ng DOH, batid nila ang kahalagahan ng pagbibigay ng impormasyon sa nakatakdang oras, ngunit nais din aniya nilang matiyak na tama ang kanilang ilalabas na mga datos.

Ilalabas naman ng DOH ang COVID-19 comprehensive report para sa ika-12 ng Hulyo ngayong Lunes, ika-13 ng Hulyo, dakong alas-8:30 ng umaga.

BREAKING: Department of Health, bigong maipalabas ang COVID-19 case report para sa araw ng Linggo, July 12.

Batay sa inilabas na abiso ng DOH, kanila na lamang ilalabas ang naturang COVID-19 report ngayong Lunes, July 13. https://t.co/HHOy7zaafm pic.twitter.com/xAEj7xahTn

— DWIZ Newscenter (@dwiz882) July 12, 2020

Samantala, ang DOH ay inaasahang maglalabas ng COVID-19 updates sa bansa dakong alas-4 ng hapon, araw-araw.

Pormal nang tinapos ng House Committees on Legislative Franchises at Good Government and Public Accountability ang mga pagdinig hinggil sa panukalang pagbibigay muli ng prangkisa sa ABS-CBN.

Binuo ng dalawang komite ang isang technical working group na gagawa ng rekomendasyon hinggil sa usapin matapos ang 12 pagdinig.

Bukas ay nakatakdang magpulong ang mga nasabing komite bagamat hindi pa masabi kung isasagawa rin kaagad ang botohan o itatakda sa ibang araw. —sa panulat ni Judith Estrada-Larino

Nanindigan si Bayan Muna party-list Representative Carlos Zarate na walang napatunayang paglabag ang giant network na ABS-CBN sa anumang probisyon ng konstitusyon.

Ito ay matapos ang mga isinagawang pagdinig ng kongreso hinggil sa isyu ng prangkisa ng ABS-CBN.

Ayon kay Zarate, walang nakitang ebidensya na nagpapatunay na may ginawang paglabag ang network sa konstitusyon.

Binigyang-diin din ng mambabatas na isang Pilipino si ABS-CBN chairman emeritus Gabby Lopez III, kasunod na rin ng pagkumpirma ng Department of Justice (DOJ) hinggil dito, kaya naman maaari aniya itong magmay-ari ng isang mass media company.

Dagdag pa nito, nakasunod din sa batas, ayon aniya sa Securities and Exchange Commission (SEC), ang pagbebenta ng network ng Philippine Depositary Receipts (PDRs).

Tumestigo rin aniya pati ang Bureau of Internal Revenue (BIR) hinggil sa regular na pagbabayad ng tax ng giant network.

Muli ring binigyang-diin ni Zarate na malalagay lamang sa alanganin ang trabaho ng nasa 11,000 empleyado ng ABS-CBN kung aalisan ng prangkisa ang network at tuluyang magsara.

Nanawagan naman si Zarate sa kaniyang mga kapwa mambabatas na ikonsidera ang interes ng publiko sa kanilang pagboto sa kung pagkakalooban nila o hindi ng bagong prangkisa ang ABS-CBN upang makapagpatuloy sa operasyon.

Samantala, isa si Zarate sa dalawang mambabatas, ang isa ay si Deputy Speaker Rodante Marcoleta, na nagbigay ng buod sa mga isyu at naging resulta ng nasa 12 pagdinig ng House Committee on Legislative Franchies at House Committee on Good Government and Public Accountability hinggil sa naturang prangkisa.

Taliwas naman ito sa naging panig ni Marcoleta.

Nanindigan itong may mga paglabag ang media giant sa konstitusyon at bigo aniyang magbigay ng pruweba ang ABS-CBN upang patunayang Filipino citizens ang mga magulang ni Lopez nang sya ay ipanganak sa US noong taong 1952.

Samantala, nagtatag naman na ang Kongreso ng isang technical working group (TWG) upang pag-aralan at bumalangkas ng rekomendasyon hinggil sa kung pagkakalooban ba ng prangkisa ang ABS-CBN.

Nakatakda namang ipresenta ng naturang TWG ang kanilang napagkasunduan sa pagpupulong ng House legislative franchise panel hearing, ala-1 ng hapon bukas, ika-10 ng Hulyo.

Uubra na ang backriding o pag-aangkas sa motorsiklo para sa mga mag-asawa.

Ayon kay DILG Secretary Eduardo Año simula bukas, July 10 ay puwede na rin ang pag-aangkas sa motorsiklo ng magkasintahan at magka-live in basta’t magpakita lamang ng katunayan ng kanilang relasyon tulad ng marriage contract.

Ipinabatid pa ni Año na inaprubahan na rin ng IATF ang prototype model na ibinigay ni Iloilo Governor Arthur Yap para sa backriding.

Sinabi ni Año na maglalabas naman ang IATF ng guidelines hinggil dito na magiging batayan sa checkpoint.