HOT STORIES OF THE WEEK

Isasarado sa publiko ang lahat ng mga sementeryo sa buong bansa simula October 29 hanggang November 4 bilang pag-iingat sa pagkalat ng COVID-19.

Ayon kay Presidential Spokesperson Harry Roque, kabilang din sa mga isasara sa nasabing petsa ang mga kolumbaryo.

Pagdidiin pa ni Roque, sang-ayon din ang pamunuan ng Inter-Agency Task Force (IATF) ang pansamantalang pagsasara sa mga libingan.

Kasabay nito, para bigyang daan ang mga nais na makadalaw sa kanilang mahal sa buhay na namayapa na, maaari pa namang bumisita sa mga sementeryo ng hanggang sa 30% ng kapasidad ng naturang sementeryo.

Samantala, iginiit din ni Roque sa publiko na dapat may suot ang mga ito na face mask at face shield oras na bibisita ang mga ito sa mga sementeryo.

Ibinasura ng Korte Suprema ang petisyong humihiling dito na puwersahin ang gobyerno na magsagawa ng pro-active mass testing para sa coronavirus disease 2019 (COVID-19), epektibong contact tracing at isolation at maging treatment ng positive cases.

Ayon sa high tribunal, bigo ang mga petitioner na makumbinsi ang pinakamataas na korte para utusan ang gobyerno na magsagawa ng mass testing at maipakitang entitled sila sa tinatawag na extraordinary writ of mandamus.

Sinabi ng Korte Suprema na hindi ginawa ng mga petitioner ang lahat ng administrative remedies tulad nang pagtungo sa mga ahensya ng gobyerno bago dumulog sa high tribunal.

Iginigiit ng mga petitioner na kinabibilangan ng mga kinatawan mula sa iba’t ibang sektor tulad ng medical frontliners at public utility vehicles drivers na ang kawalan ng epektibong mass testing ay paglabag sa kanilang right to health.

Nalungkot naman ang National Union of People’s Lawyers, kumakatawan sa petitioners sa naging desisyon ng Korte Suprema na umaasa silang magtutulak sa gobyerno na gawin ang tungkulin nila para protektahan at igalang ang karapatan ng tao sa health and information.

Nakaalis na ng bansa si US Marine Lance Corporal Joseph Scott Pemberton na suspek sa pagpatay kay Pinay transgender Jennifer Laude noong 2014 na kamakailan ay ginawaran ng absolute pardon.

Ayon kay Dana Sandoval, tagapagsalita ng Bureau of Immigration (BI), ganap na alas 9:14 ngayong linggo ng umaga nang mai-deport si Pemberton mula NAIA-terminal 3 pabalik ng Estados Unidos.

Dagdag pa ni Sandoval, lulan si Pemberton ng isang military plane at batid din aniya sa mukha ng ex-convic na ‘calm at relax’ ito.

Nauna nang inihayag ng BI, na perpetually blacklisted na si Pemberton o hindi na kailan pa pahihintulutang makabalik ng bansa makaraang i-deport ito.

JUST IN: US Marines Lance Corporal Joseph Scott Pemberton nakaalis na ng bansa pic.twitter.com/YuVDTWIieh

— DWIZ Newscenter (@dwiz882) September 13, 2020

Pinagkalooban ni Pangulong Rodrigo Duterte ng absolute pardon si U.S. Marine Lance Corporal Joseph Scott Pemberton na nakapatay sa transgender woman na si Jennifer Laude noong 2014.

Ayon kay Presidential Spokesperson Harry Roque, nangangahulugan itong makalalaya na at maaari nang makauwi ng Estados Unidos si Pemberton.

Mabubura na rin aniya ng ibinigay na absolute pardon ni Pangulong Duterte kay Pemberton ang isyu sa maaga sanang pagpapalaya kay Pemberton sa pamamagitan ng good conduct time allowance.

Sinabi naman ni Roque na wala nang dapat ipaliwanag si Pangulong Duterte sa pagbibigay ng pardon dahil prerogative na ito ng lahat ng presidente ng Pilipinas.

Kaugnay nito, iginiit naman ni Roque na tanging hindi nabura ng ibinigay na pardon kay Pemberton ang katotohanang nahatulan ito dahil sa pagpatay kay Laude.

Nakapili na ng tatayong Officer-in-Charge (OIC) sa Philippine Health Insurance Corporation (PhilHealth) kasunod ng pagbibitiw sa puwesto ni President at CEO Ricardo Morales.

Ayon kay Health Undersecretary Maria Rosario Vergeire, magsisilbi bilang OIC President and CEO ng PhilHealth si Executive Vice President and Chief Operating Officer Arnel De Jesus.

Kahapon, inaprubahan ng board ng PhilHealth ang pagtatalaga kay De Jesus bilang OIC.

Magugunitang, tinanggap na ni Pangulong Rodrigo Duterte ang resignation ni Morales matapos niya na rin itong atasan na magbitiw sa puwesto bunsod ng kinahaharap na problema sa kalusugan.

Maliban kay Morales na umaming may sakit na lymphoma, sinabi rin ni De Jesus na mayroon siyang sakit sa puso at diabetes dahilan kaya hindi ito pisikal na nakadalo sa pagdinig ng Senado at Kamara sa isyu ng korapsyon sa PhilHealth.

Nangako si Pangulong Rodrigo Duterte na papanagutin ang mga tiwaling opisyal na mapatutunayang sangkot sa korapsyon sa PhilHealth.

Sa kanyang public adress, sinabi ni Pangulong Duterte na gugugulin niya ang nalalabing dalawang taon ng kanyang termino para matiyak ang pag-iimbestiga, pag-uusig at pagpapakulong sa mga sangkot sa anomalya sa PhilHealth.

Iginiit din ng pangulo na hindi dapat mahalo ang usaping kinahaharap ng PhilHealth sa pagtugon ng pamahalaan sa coronavirus disease 2019 (COVID-19) gayundin ang paggasta sa pondo sa ilalim ng Bayanihan 1 at 2.

Itong pera sa Bayanihan, I will still impose stricter measure, pero itong nagnakaw ng pera ng bayan, lalo na ‘yang sa COVID, they will go to prison. I am sure, pag wala akong nakita na magpapakulong, magdampot ako ng tatlo sa kanila, kulungin ko. Pilitin kong kulungin para may makulong lang talaga sa ginawa nila dito sa pera ng tao,” ani Duterte.

Samantala, ipinag-utos rin ng pangulo ang buwanan o kada 15 araw na paglalathala sa naging paggasta ng lahat ng mga ahensiya at kagawaran ng pamahalaan.

Ito aniya ay bilang pagsasalang sa naramdamang sama ng loob ng taumbayan kinasasangkutang isyu ng PhilHealth.

The rule to apply for them ‘yung magreport sila ng respective agency disbursement. Ilagay nila magkano ang ginastos and for what. At the end of the month, maybe, buwanan maganda, makita nila kung ‘yung pinuntahan ng pera, pumunta ba talaga sa gastos at sino. That is, in view of the, sama ng loob ng tao ‘tong sa PhilHealth na ito. Lalo na itong PhilHealth, maski paper clip, ipublish ninyo, at sino ‘yung bidder,” ani Duterte.

Lagda na lamang ni Pangulong Rodrigo Duterte ang kulang para maging isa nang ganap na batas ang Bayanihan to Recover as One Act o Bayanihan 2.

Ito ay matapos na maratipikahan ang Bicameral Conference Committee report sa House of Representatives.

Una nang naratipikahan ang naturang panukalang batas sa  Senado nuong Agosto 20.

Sa ilalim ng Bayanihan 2, P140 billion ang magsisilbing available funds habang P25.5 billion naman ang standby fund.

Pinakamalaking bahagi ng pondo ay para sa pautang at assistance sa mga micro, small and medium enterprise, agriculture at fisheries, tulong sa mga PUV drivers, dagdag na hiring sa healthcare workers at iba pa.

Sa ilalim din ng naturang batas ay bibigyan ng 60-araw na moratorium ang mga may utang sa bansa habang 30-araw naman na palugit sa mga hindi nakapagbabayad ng kuryente, tubig at renta ng bahay o pwesto sa ilalim ng ECQ.