HEADLINES

Iimbestigahan na ng Research Institute for Tropical Medicine o RITM ang insidente sa Subic, Zambales kung saan ilang hospital personnel ang nagpositibo sa COVID-19 pero nag-negatibo matapos ang tatlong araw.

Ito ang kinumpirma ni Health Secretary Francisco Duque matapos igiit ni Deputy Speaker at Sagip Party-List Rep. Rodante Marcoleta sa congressional inquiry sa kontrobersyal na pandemic funds.

Ayon kay Duque, nakarating na sa kanya ang reklamo ng isang complainant na hindi muna niya pinangalanan.

Binubusisi na anya ito ng lab network na pinamumunuan ni Assistant Secretary Nestor Santiago na nag-utos na magsagawa ng evaluation o assessment.

Batay sa imbestigasyon, 49 na hospital staff ang nagpositibo sa COVID- 19 noong Setyembre 3 base sa isinagawang testing ng Philippine Red Cross sa Subic pero sa ibang laboratory, 44 ang nagnegatibo.

Pawang bakunado na ang mga ito at dahil may duda sa resulta ng unang test ay nagpa-retest sila noong Setyembre 6 o tatlong araw matapos magpositibo sa COVID-19 test ng red cross. —sa panulat ni Drew Nacino

Pinasisilip ngayon ni Surigao Del Sur Rep. Johnny Pimentel ang presyo ng mga facemask na binili sa Pharmally kung saan, mas mababa umano sa price monitoring ng Department of Trade and Industry o DTI.

Ayon kay DTI Asec. Anne Claire Cabochan, unang buwan pa lamang ng taong 2020 ay nagsimula na pagmomonitor sa presyo ng facemask ang kanilang ahensya.

Dumipensa rin si Cabochan na ang Department Of Health umano ang nagtakda ng price ceiling para sa face masks at hindi ang DTI.—sa panulat ni Angelica Doctolero

Inihayag ni Health Undersecretary Maria Rosario Vergeire na nasa ilalim parin ng high risk classification ng kanilang ahensya ang Metro Manila at 11 pang rehiyon sa bansa.

Ito ay dahil patuloy paring tumataas ang bilang ng mga tinatamaan ng COVID-19.

Ayon kay Vergeire, nasa 39.56 na ang average daily attack rate pero nasa 70.57% pa ang bed utilization sa mga ospital habang 76.64% naman ang ICU utilization sa Metro Manila.—sa panulat ni Angelica Doctolero

Ininspeksiyon ng Metropolitan Manila Development Authority o MMDA at Department Of Trade and Industry o DTI ang ilang mga establisyimento sa Makati City sa ilalim ng alert level 4.

Kasama sa pag-iinspeksiyon si Makati City Mayor Abby Binay upang alamin kung may mga lumalabag o sumusuway sa quarantine protocols na ipinatupad ng pamahalaan.

Ayon kay MMDA Chairman Benhur Abalos at Trade Secretary Ramon Lopez, layunin ng kanilang ahensya na masunod ang ipinatutupad ng Inter-Agency Task Force for the Management of Emerging Infectious Diseases.

Kabilang sa mga ininspeksiyon ang al fresco dine -in services, ilang mga business establishment kabilang na ang mga gym at mall.—sa panulat ni Angelica Doctolero

Nagbukas ng 7K na trabaho ang Department Of Transportation o DOTR sa ilalim ng build-build-build program ng pamahalaaan para makatulong sa mga apektado ng COVID-19 pandemic.

Maglulunsad ng libo-libong job offer ang DOTR sa pamamagitan ng konstruksiyon ng Clark phase 2 project ng Philippine National Railways o ang Malolos, Bulacan to CLARK, PAMPANga line.

Ayon kay Transportation Secretary Arthur Tugade, gagawa ng direct at indirect employment opportunities ang kanilang ahensya kung saan, prayoridad ang mga local, Overseas Filipino Workers, at transport sector workers na apektado ng COVID-19 pandemic.

Dagdag pa ni Tugade, bukod sa 7,000 direct jobs na nagbukas, may 3,000 pang job opportunities ang planong ilunsad sakaling maging operational na ang proyekto ng gobyerno.

Bukod pa dito, magkakaroon din ng 25,000 direct job opportunities nabubuksan habang ginagawa ang proyekto.

Ang PNR Clark phase 2 ay bahagi ng massive 147-kilometer North-South commuter railway project na magkakaroon ng 35 istasyon at mag-ooperate ng 464 na train cars na may 58 car train sets configuration.—sa panulat ni Angelica Doctolero

Karagdagang 561,600 doses ng Pfizer COVID-19 vaccine ang natanggap ng Pilipinas kagabi.

Ang nasabing mga bakuna ay ibinigay ng gobyerno ng Estados Unidos sa pamamagitan ng COVAX facility.

Ayon kay Vaccine Czar Carlito Galvez, umabot na sa 64,942,000 doses ang kabuuan ng supply ng bakuna sa bansa.—sa panulat ni Hya Ludivico

Binigyang diin ng Commission on Human Rights na malalabag ang karapatang-pantao ng Pilipino kung lalagyan ng yellow marking ang mga bahay ng mga nahahawaan ng COVID-19.

Ayon kay CHR Commissioner Gwendolyn Pimentel-Gana, nagdudulot lamang ito ng diskriminasyon sa komunidad.

Wala aniya itong pinagkaiba sa inilalagay na yellow marking sa mga bahay ng pinaghihinalaang drug pusher sa ilalim ng war on drugs ng pamahalaan.

Sa halip na yellow markings, ipinayo ng CHR na dapat na mahigpit na i-monitor ng barangay at mga lokal na pamahalaan ang mga pamilya na apektado ng granular lockdown.—sa panulat ni Hya Ludivico

Umabot na sa 18,560,409 ang bilang ng mga Pilipinong fully vaccinated na laban sa COVID-19.

Ayon kay Presidential Spokesperson Harry Roque, nasa 22.8 milyon na indibidwal naman ang nakatanggap ng kanilang first dose ng bakuna.

Nasa 6.4 milyon naman ang bilang ng mga nakakumpleto na nang bakuna sa Metro Manila.

Sa kabuuan, nasa 41.4 milyon na aniya ang doses ng COVID-19 vaccine na naiturok na ng pamahalaan.—sa panulat ni Hya Ludivico

Nakikipag-ugnayan na ang  Department of Education (DEPED) sa mga otoridad upang imbestigahan ang napaulat na ‘online cheating’ kung saan nagbibigayan ng sagot ang mga mag-aaral.

Nadiskubre kamakailan ang isang Facebook group kung saan ginagamit umano ng mga mag-aaral upang mangalap ng sagot sa kanilang modules at iba pang activity sheets.

Mayroong mahigit 600,000 na miyembro ang “online kopyahan” community ngunit matapos itong maiulat ay mayroon na lamang itong 571,900 members.

Sinabi naman ni DEPED Secretary Leonor Briones na hindi nila kinukunsinti ang ganitong gawain at problema na talaga aniya ang kopyahan hindi lamang sa Pilipinas.—sa panulat ni Hya Ludivico

Inihayag ng Department of Foreign Affairs o DFA na karamihan sa mga Pilipino mula Afghanistan ay lumikas na.

Aabot sa 191 mga Pilipino ang nakaalis na sa nasabing bansa hanggang nitong Setyembre 16.

Sa pagtaya ng ahensya, 20 mga Pinoy pa ang nasa Afghanistan.

Tiniyak naman ng DFA na patuloy nilang tututukan ang sitwasyon sa naturang bansa.—sa panulat ni Hya Ludivico