HEADLINES

Umaasa si dating Senador Ferdinand ‘Bongbong’ Marcos Jr. na magiging mas maganda ang pasko ng mga Filipino ngayong taon, lalo’t dumarami na ang mga bakunado at protektado laban sa COVID-19.

Ayon kay Marcos, makakamit ang herd immunity kung 80 hanggang 90% ng populasyon na ang bakunado hanggang Disyembre.

Nanawagan naman ang dating mambabatas para sa mas sistematiko at epektibong vaccination roll out at dagdagan ang vaccine supply at cold chain storage facilities sa mga lalawigan.

Dapat din anyang makipag-ugnayan ang Department Of Health sa mga LGU upang matiyak na sapat ang bilang  ng mga vaccinator at tiyakin ng Department Of Energy na may stable power supply o generators na naka-standby sakaling magkaroon ng power outages.

Ipinunto ni Marcos na nahihinto lamang ang bakunahan kapag numinipis ang vaccine supply kaya’t mahalaga ang tulong ng national government sa mga LGU sa mga lalawigan.

Simula Marso 1, halos 70 milyong doses na ng COVID vaccine ang dumating sa bansa at sa katapusan ng buwan ay inaasahang aabot na ito sa 100 milyon. —sa panulat ni Drew Nacino

Target ng Commission on Elections na ilabas ang opisyal na listahan ng mga kandidato sa 2022 elections sa kalagitanaan ng Oktubre.

Ito ang inihayag ni COMELEC Chairman Sheriff Abas kasabay ng unang araw ng paghahain ng Certificate Of Candidacy.

Gayunman, nilinaw ni Abas na hindi otomatikong mapapabilang sa listahan ang lahat ng maghahain ng kandidatura.

Sasalain pa anya ito ng kanilang law department upang matukoy kung sino ang kwalipikado o diskwalipikado at nuisance candidates.

Magsisimula ang COC filing ngayong araw hanggang Oktubre 8.—sa panulat ni Drew Nacino

Lalarga na simula ngayong araw ang filing ng Certificate Of Candidacy ng mga kandidato sa national at local level para sa 2022 elections.

Magsisimula ang paghahain ng COC kasabay ng pagbubukas ng tanggapan ng Commission on Elections, mamayang alas-8 ng umaga hanggang ala-5 ng hapon.

Para sa mga tatakbo sa national level, isasagawa ang filing sa harbor garden tent ng 5-star hotel na Sofitel, Pasay City.

Ayon kay COMELEC Spokesman James Jimenez, asahan na ang mahigpit na proseso hanggang sa pagtatapos ng filing sa October 8 dahil kailangan munang magpakita ng negatibong COVID-19 antigen test result ang mga kanditato.

Bukod sa mga ito, lahat ng mga makikilahok gaya ng mga tauhan ng COMELEC, security staff maging mga media ay kailangan ding magpakita nito.

Hindi tulad ng mga nakaraang COC filings, inabisuhan ng poll body ang mga kandidato na iwasan ang magarbong parada mistulang piyesta habang kailangan ding limitahan ang bilang ng mga kasama sa dalawa hanggang tatlo.—sa panulat ni Drew Nacino

Nais ni Pangulong Rodrigo Duterte na paikliin na lamang sa isang linggo ang quarantine period ng mga biyaherong dumarating sa bansa.

Aminado si Pangulong Duterte na malaking tulong ito sa mga umuuwing OFW dahil mababawasan ang kanilang pasanin lalo’t mahal ang serbisyo ng ilang hotel sa bansa.

Kahit anya ang gobyerno ay makaluluwag sa gastos kung gagawin na lamang hanggang pitong araw ang quarantine period sa halip na dalawang linggo.

Kaawa-awa naman yung mga kababayan natin, yung mga OFW, pati yung utang natin kasi yung mga hotel na ginagamit natin maganda Manila hotel, diamond hotel, hindi ito basta-basta kung gusto mo makatikim ng magandang hotel na ganon magpahawa ka lang mamili ka ng hotel na gusto mo,” pahayag ng Pangulong Duterte.

Tiniyak naman ni DILG Secretary Eduardo Año na pina-plantsa na nila ang ilang guidelines para sa quarantine period ng mga biyaherong dumarating sa bansa.

…Pina-finalize na lang po namin ito, magiging 5-7 days na lang po ang quarantine period,” wika ni Pangulong Duterte.

Magkasunod na pahayag nina Pangulong Rodrigo Duterte at DILG  Secretary Eduardo Año.

Hindi isinasantabi ni Pangulong Rodrigo Duterte ang posibilidad na bumisita sa Estados Unidos upang personal na magpasalamat sa tulong nitong COVID-19 vaccine supplies sa Pilipinas.

Ito’y sa kabila ng maka-ilang ulit na pagtanggi ni Pangulong Duterte sa imbitasyon na bumisita sa amerika noong panahon ni dating US President Donald Trump.

Sa kanyang talk to the people kagabi, pinapurihan ng Pangulo ang amerika sa pagpapadala ng supply ng bakuna sa Pilipinas.

Noong isang buwan lamang ay nagpulong sina DFA Secretary Teodoro Locsin at DND Secretary Delfin Lorenzana kay US National Security Adviser Jake Sullivan matapos bumisita ang dalawang kalihim sa Washington DC.

May mga bakuna tayo, may dumating kakasabi lang ni Sec. Galvez, Sec. Duque na ang Amerika,nagbigay ng bago 5 million ang bait ng Amerika baka pupunta ako doon just to thank the American government and the people, pahayag ni Pangulong Duterte.

Mananatili sa kustodiya ng Senado si Pharmally Pharmaceutical Corporations Director Linconn Ong.

Isinulong ito ni Senate Minority Leader Franklin Drilon dahil sa pagmamatigas ni Ong na sagutin ang mga detalye sa perang pina-utang sa kanila ni dating Presidential Economic Adviser Michael Yang.

Una nang inamin ni Ong na ang perang nagmula kay Yang ay nakatulong upang makatupad ang Pharmally sa bilyon-bilyon pisong kontrata na ini-award sa kanila ng procurement service ng Department of Budget and Management sa pagbebenta ng medical supplies.

Sa ika-10 pagdinig ng Senate Blue Ribbon Committee kahapon, makailang ulit na iginiit ni Ong ang kanyang right against self-incrimination sa mga tanong ng mga senador alinsunod sa payo ng kanyang abogado.

Isiniwalat din ni Ong na mayroon din silang non-disclosure agreement ni Yang pero hindi naman niya masagot kung kailan nila ginawa ang nabanggit na kasunduan at kung ito ba ay notaryado.—sa panulat ni Drew Nacino mula sa ulat ni Cely Ortega Bueno (Patrol 19)