HEADLINES

Inalmahan ng Malakanyang ang panawagang buwagin na ang Inter-Agency Task Force for the Management of Emerging Infectious Diseases.

Magugunitang nanawagan si Senador Joel Villanueva na buwagin na lamang ang IATF dahil palpak umano ito laban sa pandemya sa halip ay hayaan na lamang ang l.g.u. na manguna sa COVID-19 response.

Iginiit ni Presidential Spokesman Harry Roque na kung hindi dahil sa ITAF ay hindi magagawa ng bansa na mailayo ang maraming mamamayan sa kamatayang dulot ng COVID-19.

Bagaman hindi anya perpekto ang IATF, lumilikha naman ito mga polisiya na epektibong ginagamit ng pamahalaan upang tugunan ang health crisis.

Dagdag pa ni Roque, kung walang IATF ay walang naging desisyon ang pamahalaan sa pagbili sa COVID-19 vaccine para sa lahat ng mamamayan.—sa panulat ni Drew Nacino

Bumaba na sa 219 na lugar sa National Capital Region ang nasa ilalim ng granular lockdown.

Kumpara ito sa 235 lugar na nauna nang isinailalim granular lockdown.

Ayon sa PNP Public Information Office, 123 sa mga ito ay mga Barangay.

Habang  592 pulis at 714 na force multipliers naman ang ipinakalat sa mga apektadong lugar upang tiyakin ang seguridad at nasusunod ang minimum health standards.—sa panulat ni Drew Nacino mula sa ulat ni Jaymark Dagala (Patrol 9)

Bukas ang Employees’ Compensation Commission o ECC sa pagbibigay ng sickness benefits sa mga empleyadong magkakaroon ng COVID-19 kahit pa naka “work from home.”

Ayon kay ECC Executive Director Stella Banawis, pinag-aaralan na nila kung maaaring isama sa mga maaaring bigyan ng benepisyo ang mga empleyadong dinapuan ng naturang sakit kahit nasa bahay lang.

Sa ngayon ay maaaring makakuha ng benepisyo sa ilalim ng Employees Compensation Program o ECP ng ECC ang mga empleyado ng pribadong sektor maging sa gobyerno na tinamaan ng COVID-19.

Kabilang sa babayaran ng ECP ang death benefits, cash assistance sa mga nawalan ng sahod, reimbursements ng medical expenses at rehabilitation services.—sa panulat ni Drew Nacino

Target ng gobyerno na mabakunahan ang anim na milyong kabataan hanggang sa katapusan ng taon.

Ito, ayon kay Department Of Health Usec. at National Vaccination Operations Center Chairperson Myrna Cabotaje at aniya’y sa ngayon ay binabalangkas na ng ahensya ang guidelines para sa pagbabakuna sa mga kabataan na nakatakdang simulan sa Oktubre 15.

Sinabi pa ni  Cabotaje na magkakaroon sila ng stakeholder consultation ngayong weekend at posibleng ilabas sa susunod na linggo ang mga panuntunan para dito. —sa panulat ni Hya Ludivico

Nadagdagan pa ang bilang ng mga kaso ng delta variant  sa Davao Region.

Sa ngayon umabot na sa 123 ang delta variant cases sa rehiyon kung saan pinakamaraming naitala sa davao del norte na may 45 cases, Davao City na may 32 na mga kaso habang ang Davao Oriental naman ay may 26 na mga kaso.

Karamihan sa mga tinamaan ng naturang variant ay mga local cases, tatlo ang patuloy na bineberipika habang anim naman ang Returning Overseas Filipino o ROF.

Lima naitalang nasawi kung saan tatlo ay mula sa Davao City at isa sa Davao Del Norte at isa rin mula sa Davao De Oro. —sa panulat ni Hya Ludivico

Isinailalim sa Modified Enhanced Community Quarantine o MECQ ang San Fernando City, Bayan ng Agoo, Balaoan, Bauang, at Sudipen simula ngayong araw, Oktubre 1 hanggang 14, 2021.

Inilagay naman sa General Community quarantine o GCQ ang mga bayan ng Aringay, Bacnotan, Bangar, Burgos, Caba, Bagulin, Luna, Pugo, San Juan, at Santo Tomas.

Habang ang mga bayan ng Naguilian, Rosario, San Gabriel, Santol, at Tubao ay isinailalim naman sa Modified GCQ.

Ayon kay Governor Francisco Emmanuel Ortega III, maaaring magpatupad ng kani-kanilang granular lockdown ang bawat barangay kung kinakakailangan.

Batay sa datos nitong Setyembre 27, umabot na sa 3,281 ang aktibong kaso ng COVID-19 sa La Union. —sa panulat ni Hya Ludivico

Nakapagtala na ang Catanduanes ng unang kaso ng delta variant ng COVID-19.

Ito ang kinumpirma ni Virac, Catanduanes Mayor Sinforoso Sarmiento at sinabing isang 26-taong gulang na lalaking bedridden at may sakit na “spina bifida” mula sa Barangay Gogon Centro ang nagpositibo sa naturang variant.

Walang travel history ang nasabing pasyente at isinailalim lamang sa RT-PCR test nang dalhin ito sa isang pribadong ospital matapos makitaan ng sintomas ng COVID-19.

Tatlong linggo na rin umano ang nakalipas mula nang ideklara itong ‘recovered’ na sa sakit at matapos ang halos isang buwan ay napag-alamang nagpositibo pala ito sa delta variant dahil sa isinagawang random testing ng Philippine Genome Center o PGC.

Nagsagawa naman ang lokal na pamahalaan ng contact tracing sa mga nakasalamuha ng pasyente na sa ngayon ay naka-quarantine na rin.—sa panulat ni Hya Ludivico

Arestado ang dalawang tulak umano ng iligal na droga sa ikinasang buy-bust operation ng mga tauhan ng District Drug Enforcement Unit ng Northern Police District sa Caloocan City.

Kinilala ang mga suspek na sina Najeb Abdulwahab, 26-anyos at Najir Mustapha, 30-anyos.

Nakuha mula sa mga suspek ang ginamit na buy-bust money, dalawang supot ng hinihinalang shabu na may timbang na 200 gramo na may street value na P1,360,000, at motor na ginamit ng mga suspek.

Nahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002.—sa panulat ni Hya Ludivico

Umakyat na sa 45,147,477 doses ng COVID-19 vaccine ang naiturok sa buong bansa.

Batay sa task force on pandemic response ng gobyerno, nasa 21 ,103,317 na ang kumpletong bakunado, habang tinaya sa 24,044 260 na indibidwal ang tinurukan ng unang dosage.

Ngayong Oktubre naman sisimulan ang pagbabakuna sa mga menor de edad kung saan aabot sa 29 milyong doses ang ilalaan para sa mga 12 hanggang 17 anyos.

Samantala, aabot na sa 71,324,050 doses ng COVID-19 vaccine ang dumating sa bansa. —sa panulat ni Drew Nacino

Tiniyak ni DILG Secretary Eduardo Año na hindi basta-basta makapagpapatupad ng granular lockdown ang isang local executive.

Ito ang nilinaw ni Año sa gitna ng pangambang maaaring magamit ang pagpapatupad ng granular lockdown sa isang lugar upang mapigilang makalabas ang isang kalaban sa politika para mangampanya sa May 2022 elections.

Sa ilalim ng alert level system sa Metro Manila, ang mga local government unit ang may kapangyarihan na magpatupad ng granular lockdowns sa mga COVID-19 hotspot area.

Gayunman, hindi naman anya kontrolado lahat ng mga LGU ang pagpapatupad ng lockdown dahil dadaan ito sa kumpirmasyon ng Regional Inter-Agency Task Force.

Ipinangako naman ng kalihim na mahaharap sa kaso ang mga tiwaling opisyal na mananamantala sa pagpapatupad ng granular lockdown para sa kanilang sariling political interest. —sa panulat ni Drew Nacino