HEADLINES

Kasuhan ang Senado.

Ito ang hamon ni Senate Minority Floorleader Franklin Drilon sa Malakaniyang kung kumbinsido itong lumalampas na ang senado sa kapangyarihan nitong mag-imbestiga.

Kasunod na rin ito ng pahayag ng Pangulong Rodrigo Duterte na lumalampas na sa kapangyarihan ang Senate Blue Ribbon Committee sa imbestigasyon sa Pharmally Pharmaceutical Corporation na binilhan ng medical supplies ng DOH.

Binigyang diin ni Drilon na katotohanan ang hinahanap nila sa naturang imbestigasyon dahil pera ng bayan ang sangkot sa usapin matapos overpriced umano ang medical supplies na binili ng gobyerno sa Pharmally.

Ikinasa na ng UP Marine Experts ang October Leg Research Expedition nito sa West Philippine Sea.

Ang grupo nina Dr. Cesar Villanoy, Dr. Fernando Siringan, Dr. Deo Florence Onda at Dr. Hazel Arceo ay sumakay sa my panata na magsasagawa ng PAGASA Island Research Station Refurbishment Plans.

Kasama rin sa team bilang research associates sina Dr. Dennis Tanay ng National Fisheries Research and Development Instiute at Dr. Jay Batongbacal ng Institute for Maritime Affairs and Law of the Sea.

Ipinabatid ng UP Marine Science Institute na matapos ang summer expeditions, tututukan ng research team ang pagsasaayos at installation ng bagong features kabilang na ang Solar Panel System.

Protektado sa ilalim ng mabusising data privacy at security settings ang Philippine Identification System o Philsys.

Ito ang tiniyak ng Philippine Statistics Authority, ang pangunahing implementing agency ng nasabing proyekto.

Ayon kay PSA Undersecretary Dennis Mapa, regular ang pagsasagawa nila ng privacy impact assessments o pia para sa disenyo at proseso ng Philsys.

Sa pamamagitan ng PIA, na isinasagawa ng isang independent 3rd party, tinutukoy anya ang lahat ng data privacy at security risks kaya’t nakatitiyak ang mga registrant na ligtas ang kanilang pribadong impormasyon.

Ang P.I.A. Isinasagawa katuwang ang Department of Information and Communications Technology at compliant ito sa rekomendasyon at guidelines ng National Privacy Commission. — sa panulat ni Drew Nacino

Hinimok ng Department of Health ang publiko na hanapin ang safety seals ng mga tindahan o establisyimento sa Metro Manila na pinayagang muling magbukas.

Ito’y makaraang dagdagan ng gobyerno ng 10% ang kapasidad ng mga negosyong nag-o-operate sa ilalim ng alert level 4 quarantine classification.

Ayon kay DOH Spokesperson Undersecretary Maria Rosario Vergeire, ang safety seals ay isang katiyakan na sumusunod sa public health safety standards ang mga pupuntahang establisyimento.

Tinitiyak din anya na ang ventilation ng lugar na pupuntahan ay maayos ang daloy upang maiwasan ang hawahan.

Kabilang sa mga pinayagang mag-operate muli ang mga fitness studio at gym sa 20% capacity pero tanging mga fully vaccinated ang tatanggaping kliyente at dapat ay bakunado rin ang lahat ng empleyado.  — Sa panulat ni Drew Nacino

Inaasahang sasagutin na sa susunod na linggo ni Julian Ongpin ang inilabas na subpoena ng National Bureau of Investigation kaugnay sa pagkamatay ng artist na si Bree Jonson.

Ang subpoena ay pormal na tinanggap ni Ongpin, anak ng negosyanteng si Roberto Ongpin, sa Baguio City.

Ayon kay NBI Director Eric Distor, pagkakataon na ng nakababatang Ongpin na ilahad ang kanyang panig hinggil sa naganap sa San Juan, La Union noong isang buwan.

Setyembre 22 nang matagpuang patay si Jonson sa isang kwarto bagaman hindi pa malinaw kung ano ang tunay na sanhi, itinuturo namang suspek ang bente nwebe anyos na anak ng bilyonaryo.

Samantala, sinimulan na rin ng NBI Ang pag-analyze sa body fluids at kuko na kinuha mula sa trenta anyos na pintor. — Sa panulat ni Drew Nacino

Kinumpirma ni Pangulong Rodrigo Duterte na makakatambal ng kanyang anak na si Davao City Mayor Inday Sara Duterte – Carpio si Senador Christopher “Bong” Go sa May 9, 2022 elections.

Ito’y kahit pa muling tatakbo sa pagka-alkalde si Mayor Inday matapos maghain ng Certificate of Candidacy.

Inamin ng pangulo sa isang pahayag sa labas ng Sofitel Hotel sa Pasay City na tatakbo sa pagka-presidente ang alkalde at makakatambal bilang bise presidente si go, na nag-file rin ng COC kahapon.

Pinal na umano ang pasya ng anak pero aminado siyang hindi pa mabatid kung kailan ito mag-a-anunsyo ng kandidatura sa pagka-pangulo.

Magugunitang umatras si Pangulong Duterte bilang Vice-Presidential candidate ng PDP-Laban Cusi faction, sa halip ay magreretiro na lamang umano siya sa pulitika sa oras na matapos ang termino sa Hunyo.  — Sa panulat ni Drew Nacino

Tiniyak ni Interior Secretary Eduardo Año na malabong sumiklab ang mala-anarkiyang sitwasyon sa bansa gaya ng looting, riot at kaguluhan sa gitna ng COVID-19 pandemic.

Ayon kay Año, mas disiplinado at sumusunod sa batas ang mga Pilipino kumpara sa ibang bansa kung saan nagkakaroon ng riot at looting.

Sa katunayan ay mayroon anyang ilang kriminal na nahuhuli naman sa tulong ng mga concern citizen.

Hinikayat naman ng DILG Chief ang publiko na maging mapagmatiyag at agad magsumbong sa mga otoridad o tumawag sa 911 kung may kahina-hinalang aktibidad sa kanilang lugar. — Sa panulat ni Drew Nacino

Ini-atras ng Department of Health sa susunod na linggo ang pagsama ng rapid Antigen test results sa daily tally ng karagdagang COVID-19 cases.

Una nang inihayag ni Health Undersecretary Maria Rosario Vergeire na isasama na ng DOH Sa resulta ang mga magpopositibo sa Antigen test.

Ayon kay Vergeire, bina-validate at kinukumpleto pa nila ang lahat ng datos.

Samantala, binalaan naman ng opisyal ang mga gumagamit ng rapid antigen testing sa maling paraan.

Kadalasang ginagamit ang Antigen test para sa screening sa mga border control, sa trabaho at ilan pang aktibidad pero hindi anya ito ang tamang paraan dahil posibleng magkaroon ng ibang resulta.  — Sa panulat ni Drew Nacino

Dalawa hanggang tatlong bagyo ang posibleng pumasok sa bansa ngayong buwan.

Ayon sa PAGASA, mayroong apat na common tracks ang mga bagyo ngayong huling quarter ng taon.

Karaniwang hindi nag-la-landfall ang mga ito dahil madalas tinutumbok ang hilagang-silangan ng Pilipinas patungong Japan o Korea.

Ikalawa ay ang mga bagyong tumatama sa kalupaan at dumaraan sa Northern o Central Luzon patungong Hong Kong o China, may ilan ding nag-la-landfall sa Central o Southern Luzon patungong Vietnam habang ang iba ay dumaraan ng Visayas patungo ring Vietnam.

Batay sa rainfall forecast ngayong buwan, halos normal hanggang “above normal” ang mga pag-ulan sa malaking bahagi ng bansa. —Sa panulat ni Drew Nacino