HEADLINES

Tumigil pansamantala ang operasyon ng LRT 2 dahil sa mga pumilipit na lobo sa pagitan ng Pureza at V. Mapa stations.

Dahil dito, humingi ng paumanhin sa publiko ang pamunuan ng LRT 2.

Inalis naman ang code red status o temporary stop operations sa LRT 2 makalipas ang 30 minuto.

Bumaba pa sa .61 ang reproduction number ng COVID-19 sa Metro Manila para sa Oktubre 2 hanggang 8.

Ito ayon sa OCTA Research Group ay mas mababa sa .83 na reproduction number ng NCR para sa Setyembre 25 hanggang Oktubre 1.

Ang .61 na reproduction number ay maituturing na low risk.

Kinumpirma ng Philippine National Police (PNP) na hawak na ng Criminal Investigation and Detection Group (CIDG) ang mga dokumentong isinumite ng Armed Forces of the Philippines (AFP).

Ito’y may kaugnayan sa sandamukal na umano’y mga paglabag ng mga miyembro ng Communist Party of the Philippines – New People’s Army (CPP-NPA) sa karapatang pantao, gayundin sa International Humanitarian Law.

Ayon kay PNP Chief P/Gen. Guillermo Eleazar, aabot sa 1,672 ang mga kaso at paglabag sa karapatang pantao ng mga komunistang terrorista mula pa noong taong 2010 hanggang sa kasalukuyan.

Aniya, kabilang dito ang paggamit sa mga child warriors, pagpatay, paninira ng mga kagamitang sibilyan, paggamit sa mga anti-personnel mines at iba pa. —sa panulat ni Jaymark Dagala (Patrol 9)

Matapos ang bagyong Lannie, muling pinaghahanda ng pamunuan ng Philippine National Police
(PNP) ang mga tauhan nito sa epektong dulot naman ng bagyong Maring.

Ayon kay PNP Chief P/Gen. Guillermo Eleazar, kanya nang inatasan ang Police Regional Office 8 o Eastern Visayas at mga karatig na rehiyon nito na tutukan ang pinakahuling lagay ng panahon.

Inabisuhan niya ang mga kinauukulang yunit ng pulisya na palagiang alamin ang mga ulat mula sa PAGASA para sa pagkakasa ng maagang paglilikas kung kakailanganin. —sa ulat ni Jaymark Dagala (Patrol 9)

Sasampahan ng kaukulang kaso at hindi mangingimi ang Philippine National Police (PNP) na ipakulong ang sinumang kandidatong magbibigay ng ‘permit to campaign fee’ sa mga komunista.

Ayon kay PNP Chief P/Gen. Guillermo Eleazar, ang pakikipagsabwatan sa mga rebelde ay patunay lang na hindi karapat-dapat humawak ng anumang puwesto sa gobyerno ang isang kandidato dahil isa itong malinaw pagtataksil sa bayan.

Ipinaalala rin ng PNP Chief na kandidato man o sibilyan ay maaaring sampahan ng kaukulang kaso tulad ng paglabag sa Republic Act 10168 o Terrorism Financing Prevention and Suppression Act of 2012 ngayong nakalagay na sa listahan ng mga terrorista ang NPA. —sa ulat ni Jaymark Dagala (Patrol 9)

Nakatakdang isara sa daloy ng trapiko ang eastbound portion ng North Avenue sa Quezon City kung saan sa susunod na taon pa ito muling bubuksan.

Sa isang advisory, binanggit ng Metropolitan Manila Development Authority (MMDA) na gagawin ang hakbang upang bigyang daan ang kontruksiyon ng Metro Rail Transit Line 7 (MRT-7).

Ayon sa MMDA, ang bahagi ng North Avenue patungong Elliptical Road ay sarado mula Oktubre 15, 2021 hanggang Hunyo 1, 2022.

Ipinaliwanag ng ahensya na maaari pa rin namang dumaan ng North Avenue ang mga motoristang papasok ng Wildlife at Veterans Memorial Medical Center.

Binigyan na ng go-signal ng Inter-Agency Task Force (IATF) ang pagbibiyahe ng 18 taon gulang pababa at fully vaccinated senior citizens sa mga lugar na nasa ilalim ng general community quarantine at modified GCQ.

Ayon kay Department of Tourism Secretary Bernadette Puyat, malaki ang maitutulong nang muling pagbuhay sa industriya ng turismo ang pagpayag sa point-to-point interzonal travel.

Aniya, mas maraming pamilyang Pilipino ang magnanais nang bumyahe dahil sila ay kumpleto na sa bakuna.
Samantala, ang resolusyon na ito ay para hikayatin pa ang publiko na magpabakuna.—sa panulat ni Airiam Sancho

Inihirit ng isang kongresista sa Senado na bilisan ang pagpasa ng panukalang batas na nagsusulong na huwag nang patawan ng income at iba pang withholding taxes ang honoraria ng mga election servers tulad ng mga miyembro ng Board of Election Inspectors (BEIs).

Ayon kay ACT Teachers Rep. France Castro, ang pagpapataw ng buwis sa honoraria at allowances ng mga election service volunteers ay sumisira sa diwa at layunin ng Election Service Reform Act.

Matatandaang noong Agosto ay lumusot sa ikatlo at huling pagbasa sa Kongreso ang House Bill 9652 na nagbibigay ng  income tax exemption sa kompensasyon ng mga election officers na karamihan ay mga guro.