HEADLINES

Halos P37.8 million na halaga ng hinihinalang droga ang nasabat ng mga awtoridad mula sa walong drug suspects sa magkakahiwalay na operasyon sa apat na lugar sa Metro Manila.

Ayon sa Philippine Drug Enforcement Agency o PDEA at Southern Police District, unang nahuli ang isang lalaki sa buy-bust operation sa Col. Santos Street, Barangay South Cembo, Makati kung saan nakuha mula rito ang P32,600 na halaga ng pinaniniwalaang shabu.

Sa Parañaque naman, aabot sa P34 million na halaga ng umano’y droga ang nakuha mula sa isang drug suspect sa buy-bust operation ng PDEA sa Lombos Ave., Barangay San Isidro.

2 naman ang arestado sa Daang Hari sa Barangay Ayala Alabang, Muntinlupa na dito’y aabot sa P3.4 million ang halaga ng hinihinalang shabu na nakumpiska mula sa mga ito.

Apat na lalaki rin ang timbog sa buy-bust operation sa Rosales St. sa Barangay Sta. Ana, Pateros na nahulihan ng 357,000 pesos na halaga ng umano’y shabu.

Sasampahan ang mga suspek ng kasong paglabag sa Comprehensive Dangerous Drugs Act.

Magiging prayoridad ng dating 4th district representative Marvin Rillo ang pagpapatayo ng karagdagang pasilidad para sa COVID-19, sakali na muling mahalal bilang kinatawan sa Quezon City.

Ayon kay Rillo, target niyang maging venue ang Quezon City circle upang pagtayuan ng mga pasilidad para sa mga magpopositibo sa COVID-19.

Magugunitang naghain ng Certificate of Candidacy (COC) si Rillo para sa pagkakonsehal. —sa panulat ni Airiam Sancho

Maari nang bisitahin ng mga tao ang kanilang mahal sa buhay na pumanaw sa paparating na Undas sa lungsod ng Iloilo.

Ayon kay public safety and transportation management office head Jeck Conlu, maaaring makapasok sa sementeryo ang mga nabakunahan na ng una at ikalawang dose laban sa COVID-19.

Aniya, kailangan lang magpresenta ng valid ID at vaccination card sa entrance, na pangangasiwaan ng PNP at safety officers.

Samantala, limampu porsyento kapasidad lamang ang pahihintulutang makapasok sa pampubliko at pribadong sementaryo na magsisimula sa Oktubre 30 hanggang Nobyembre 2. —sa panulat ni Airiam Sancho

Nagpaalala sa publiko si Balanga Bishop Ruperto Santos para sa nalalapit na pagdaraos ng eleksyon 2022.

Aniya, kailangang maging matalino sa pagboto sa pagpili ng susunod na lider ng bansa.

Sinabi pa niya na nakasalalay rin sa desisyon ng publiko ang kalalabasan ng Pilipinas sa mga susunod na taon, kung kaya’t hindi dapat gawing padalos-dalos ang pagpili sa iboboto.

Kaugnay nito, hinimok pa ng Obispo ang publiko na piliin ang politikong naniniwala, taos-puso at matatag ang pananampalataya sa Diyos.–-mula sa ulat ni Aya Yupanco sa panulat ni Airiam Sancho

Ilalabas na ng Research Institute for Tropical Medicines (RITM) sa Oktubre 11 ang report hinggil sa imbestigasyon ng supposed false positive result ng COVID-19 test na isinagawa ng Philippine National Red Cross- Subic.

Ayon kay Health Secretary Francisco Duque III, malalaman na kung ano ang resulta ng assessment, evaluation ng RITM sa PRC laboratory sa Subic Bay.

Kaugnay ito sa nangyaring insidente sa ospital ng Subic na kung saan ang ilang mga empleyado ay nagpositibo sa COVID-19, subalit naging negatibo ito nang ulitin matapos ang tatlong araw.

Samantala, ipinaliwanag naman ng PRC na ang nangyaring supposed false positive results ay dahil sa timing at koleksyon ng ikalawang sample na maaring nakaapekto sa negatibong resulta. —sa panulat ni Airiam Sancho

Nagsimula nang dumagsa sa bagong Bicol International airport ang domestic flights ng local air carriers sa bansa.

Mula sa Ninoy Aquino International Airport (NAIA) ay nakapaghatid na ng mga pasahero ang Philippine Airlines at Cebu Pacific sa nasabing bagong airport sa Daraga, Albay.

Bukod dito, inaasahan na rin ang direktang paglapag ng ilang international flights mula sa iba’t ibang bansa.

Samantala, 2 milyon na pasahero ang inaasahang maa-accomodate bawat taon ng naturang bagong airport. —sa panulat ni Airiam Sancho

Pinag-aaralan pa ni Health Secretary Francisco Duque III kung posible na ibaba sa alert level 3 ang kasalukuyang status na alert level 4 classification sa National Capital Region hinggil sa COVID-19.

Aniya, ang pagbaba ng kaso mula Setyembre 29 hanggang Oktubre 5 na may daily average na higit 13,000 na kaso ay 23% na mas mababa kumpara sa nakaraang linggo na higit 17,000.

Inaasahan ni Duque na magpatuloy ang downtrend at makita kung maaari nang ibaba ang kasalukuyang alert level.

Magugunitang nasa alert level 4 ang NCR mula Setyembre 16 hanggang 30 mula sa pilot implementation ng alert system at pinalawig hanggang Oktubre 15. —sa panulat ni Airiam Sancho