HEADLINES

Sapat ang pondo para makapagbigay ng food packs sa mga lugar na nasa granular lockdown at dinaanan ng kalamidad.

Tiniyak ito ni DSWD Spokesperson Glenda Relova na nagsabing nasa halos 46,000 family food packs na ang napamahagi nila sa mga naapektuhan ng granular lockdown hanggang nitong Oktubre 13.

Ipinabatid ni Relova na mayruong P1-B standby funds gayundin ang 138-M food packs sa Central at Regional Offices ng DSWD.

Nanghingi na rin aniya sa kanila ng food packs ang mga LGU’s ng Pasay, Pateros, Quezon City, San Juan, Caloocan City, Makati City, Mandaluyong, Maynila at Paranaque.

Mas malakas ang immune response kapag nabakunahan  ng unang dose ng Johnson and Johnson COVID-19 vaccine at kung Pfizer o Moderna vaccine ang gagamiting booster shot.

Ito ang resulta ng pag aaral ng NIH na sinalihan ng mahigit 450 individuals sa Amerika matapos makatanggap ng unang dose ng Pfizer, Moderna o kaya naman ay J&J kung saan ipinapakitang ligtas para sa adults ang pagmimix and match ng tatlong brand ng bakuna.

Ayon pa sa resulta ng pag aaral, nagpapakita ng kahalintulad na adverse reaction and mix and match ng doses bilang booster shots sa ginagawang pagbabakuna para sa una at ikalawang dose at walang nakitang banta sa kalusugan.

Ang nasabing pag aaral ay nabigyan ng authorization sa Amerika na nagpapakitang nakakapag produce ng pareho o mas mataas na anti body response ang paggamit ng ibang brand ng bakuna para sa booster shots kumpara sa pagtuturok ng parehong brand ng vaccines bilang ikatlong dose.

Nadagdagan pa ang bilang ng mga kinukumpirmang nasawi dahil sa pananalasa ng bagyong Maring.

Batay sa update ng National Disaster Risk Reduction and Management Council (NDRRMC), 30  na ang napaulat na namatay dahil sa bagyo.

14 sa mga  nasawi naitala sa Ilocos Sur, isa Pangasinan, dalawa sa Cagayan, apat sa Palawan, at siyam sa Benguet.

Sa bilang na ito ng mga napaulat na nasawi, 19 ang kumpirmado na ng NDRRMC.

Samantala 3 naman ang naitalang sugatan habang 11 ang missing at ngayon ay target ng search and rescue operation. —sa ulat ni Jaymark Dagala (Patrol 9)

Isinusulong ngayon sa Kamara ang panukalang batas na magbabawal sa substitution ng mga kandidato dahil sa withdrawal nito.

Layon ng House Bill Number 10380 na pagbawalan ang mga partido na magpalit ng kandidato kahit pa ang dahilan ay kamatayan o diskwalipikasyon ng orihinal na kandidatong nagsumite ng kandidatura.

Ayon kay Deputy Speaker at Cagayan De Oro Representative Rufus Rodriguez, nagiging daan kasi ito para manipulahin ng iba ang kandidatura o halalan.

Sa ngayon, bagama’t nagtapos na ang paghahain ng certificate of candidacy noong nakaraang linggo, pinapayagan pa rin ang substitution hanggang Nobyembre 15.

Limang nominasyon ang nakuha ng Pilipinas sa prestihiyosong 28th World Travel Awards sa gitna ng COVID-19 pandemic.

Ayon sa Department of Tourism (DOT), nakatanggap ng nominasyon ang bansa sa mga sumusunod na kategorya:

1. World’s leading beach destination 2021
2. World’s leading dive destination 2021
3. World’s leading island destination 2021 (Siargao Island)
4. World’s leading tourist attraction 2021 (Intramuros)
5. World’s leading tourist board 2021

Nanawagan ang DOT sa publiko na iboto ang Pilipinas sa pamamagitan ng pagbisita sa www.worldtravelawards.com/vote.

Kalaban ng Pilipinas ang iba pang bansa katulad ng Maldives, Thailand, Mexico, Hawaii, Kenya, Greece at iba pa.

Magtatapos ang botohan sa Oktubre 25.

Suportado ni Health Secretary Francisco Duque, III ang pagbibigay ng booster shots sa mga healthcare workers.

Ngunit binigyang diin ni Duque na dapat ay malaking populasyon na ang nababakunahan kontra COVID-19.

Sa ngayon ayon kay Duque nasa 30% pa lamang ng kabuuang populasyon ang nakakumpleto na ng bakuna habang 34% pa lamang ang nakatanggap na ng first dose ng COVID-19 vaccine.

Sinabi rin ni Duque na mababa pa rin ang bilang ng mga nababakunahan sa labas ng Metro Manila.

Nilinaw ni Health Secretary Francisco Duque, III na hindi siya nakonsulta kaugnay sa hakbang na payagan ang pagpasok sa bansa ng mga fully vaccinated travelers mula sa tinatawag na “green countries”.

Ayon kay Duque, maging ang ibang opisyal na sina Vaccine Czar Secretary Carlito Galvez at Interior Secretary Eduardo Año ay wala rin umano noong napagdesisyunan ito.

Sinabi ng kalihim na dadaan ulit ito sa pagtalakay at pagaaral ng iatf dahil sa ilang mga isyung kailangang silipin sakaling ipatupad ang nasabing hakbang.

Binigyang diin ni Duque na suportado niya ang pagsasailalim sa 5-day quarantine kasunod ay confirmatory test na talagang negatibo sa COVID-19 ang isang byahero.