HEADLINES

Inihirit sa kamara ng ilang mambabatas na amyendahan ang kasalukuyang Mental Health Act o Republic Act No. 11036.

Kabilang sa mga mambabatas na ito ay sina Bohol 3^rd District Rep. Kristine Alexie Tutor, Bohol 1^st District Rep. Edgar Chatto at Aurora Rep. Rommel Rico Angara na naghain ng House Bill 6782, 6806 at 6884 na kung saan humihikayat ito na amyendahan ang kasalukuyang batas na maglaan ng financial aid sa mga empleyadong daranas ng mental health issues habang nagtatrabaho.

Matatandaang agarang ipinatupad matapos pirmahan ni Pangulong Duterte ang RA 11036 noong Hunyo 20, 2018. —sa panulat ni Airiam Sancho

Nangangamba ang isang grupo ng mga doktor sa pagbaba sa alert level 3 ng Metro Manila simula kahapon, oktubre 16.

Ayon kay Dr. Maricar Limpin, pangulo ng Philippine College of Physicians (PCP) ay dahil hindi pa nakakahinga ang health workers sa pagsirit ng kaso ng COVID-19

Bukod dito, ipinabatid ni Limpin ang pag a-alala nilang mga doktor kung hindi kaagad maka-responde ang gobyerno sakaling tumaas ang infections.

Sinabi ni Limpin na kung ibabatay sa mga naging karanasan noon, sa tuwing magluluwag ng restriction may kasama aniyang pagkalimot ang mga pilipino.

Hindi dapat maging kampante ang publiko sa pagbaba sa alert level 3 sa Metro Manila.

Ito ayon kay Dr Rontgene Solante,  isang infectious disease expert at miyembro ng Vaccine Expert Panel (VEP), dahil puno pa rin ng COVID-19 patients  ang ICU ng mga ospital.

Bagamat bumaba na ang kaso ng COVID-19, sinabi ni Solante na ang 7K hanggang 8K infection ay hindi pa rin magandang bilang.

Umapela rin sa publiko si Solante na mas maging maingat sa unti -unting pagbubukas ng ekonomiya nang isailalim sa alert level 3 ang Metro Manila hanggang oktubre 31.

Timbog ang anim na pulis Maynila dahil sa umano ay pangongotong sa mga inarestong curfew violators sa Sta Cruz, Maynila.

Ayon sa Manila Police District,  nasa custody na ng pulisya ang anim na pulis matapos sumailalim sa inquest proceedings.

Nabatid na hiningan ng mga naturang pulis ng pera ang dalawang taong hinuli nito sa Luzon Street at dinala sa Padre Algue Police Community Precinct.

Ibinigay umano ng mga biktima sa dalawang pulis ang P47K, isang motorsiklo at gold necklace.

Pagkalaya ay kaagad nagsumbong ang mga biktima sa Moriones Police Station at positibong itinuro ng mga ito ang anim na pulis na nangotong sa kanila.

Dinisarmahan din agad at pinosasan ang mga nasabing pulis na nahaharap sa kasong robbery extortion.

Isinulong ng Comelec ang bagong batas na magli-limita sa pangangampanya sa social media.

Ito ayon kay Comelec Spokesperson James Jimenez ay kasunod nang inaasahan nilang paggamit ng mga kandidato sa social media para makapangampanya  sa gitna na rin ng pandemya.

Sinabi ni Jimenez na tanging ang mamo-monitor nila ay ang paggastos ng mga kandidato sa pagpoproduce ng advertisements at pagbo-boost ng kanilang social media posts.

Maliban dito aniya wala na silang natukoy na limitasyon sa paggamit ng mga naturang platforms taliwas sa telebisyon na mayroong bilang ng minuto na maaaring malampasan.

Ang campaign period para sa mga tumatakbo sa national post ay mula February 8, 2022 hanggang May 7 samantalang March 25 hanggang May 7 para sa local positions.

Patay ang 18 katao matapos uminom ng alcohol sa Russia.

Ito na ang ikalawang beses na mayroong nasawi sa pag-inom ng alcohol na ibinibenta ng ilang tao sa ika-apat na pinakamalaking lungsod sa Russia na Yekaterinburg.

Dalawa katao na ang inaresto ng awtoridad sa gitna nang imbestigasyon sa nasabing insidente.

Sa pagsisimula pa lamang ng buwan ng Oktubre, 36 katao na sa rehiyon ng Orenburg ang nasawi matapos uminom ng bootleg alcohol na may sangkap na ng methanol at itinuturing na “highly toxic”.

Halos lahat ng tao ay nagkakaroon ng Arthritis sa pag-edad.

Ayon sa mga eksperto, ang Arthritis ay pamamaga ng kasukasuan o joints.

Mayroong klase nito, una, osteoarthritis, ito ay ang pamamaga ng cartilage, mga buto na napupudpod at nakikiskis kaya sumasakit at namamaga. Maari itong mamana, dating injury o dahil sa sobrang pagtarabaho.

Ang rheumatoid arthritis naman ay sakit sa immune system dahilan ng pamamaga ng lining ng mga kasu-kasuan.

Ngunit para malunasan ang sakit na ito, dapat kumonsumo ng mga pagkaing mayaman sa omega-3 fatty acids tulad ng tawilis, tamban, at dilis. Maaari din ang pagkaing may Vitamin C gaya ng papaya, suha, repolyo, at kamatis. Gayundin ang may Vitamin D para tumibay ang buto tulad ng pula ng itlog, soya milk at kabute. —sa panulat ni Airiam Sancho

Dinumog ng mga residente ang mga simbahan at dolomite beach sa baywalk matapos ang pagpapaluwag ng alert level status sa National Capital Region.

Ayon sa report, alas-sais pa lamang sa halip na alas-otso nitong umaga ay binuksan na ang gate ng dolomite beach para sa mga residenteng nais makita ang atraksyon.

Samantala, patuloy pa rin ang pagbabantay ng mga awtoridad sa mga nasabing lugar sa pag-oobserba ng health at safety protocols. —sa panulat ni Airiam Sancho