HEADLINES

Bumaba na sa 9,154 tonnes ang ibinugang sulfur ng Taal volcano.

Ayon sa Phivolcs, kapansin-pansin ang pagbaba ng lebel ng asupre nitong sabado kumpara sa 23,576 tonnes na inilabas ng bulkan noong biyernes na tinawag bilang ‘anomalously high’.

Nakapagtala naman ng anim na volcanic earthquakes sa nakalipas na 24 oras na tumagal ng tig-dalawa hanggang limang minuto.

Naglabas din ng vog ang bulkan na resulta umano ng “upwelling” ng mainit na volcanic fluids sa lawa ng Taal.

Nananatili sa alert level 2 ang bulkan, indikasyong nagpapakita pa rin ito ng mga aktibidad.—sa panulat ni Drew Nacino

Muling ipinaalala ng isang Infectious Disease expert sa publiko na iwasang magpaka-kampante kahit bumababa na ang kaso ng COVID-19 sa bansa.

Ito‘y dahil mataas pa rin o nasa 75% ang utilization rate ng mga Intensive Care Unit sa mga ospital lalo sa Metro Manila.

Ayon kay vaccine Expert Panel Member, Dr. Rontgene Solante, nasa 7,000 hanggang 8,000 pa rin ang bagong kaso ng COVID- 19 at hindi pa rin ito magandang numero.

Nanawagan din si Solante sa publiko na mag-ingat pa kahit unti-unti nang nagbubukas ang mga establisyimento ngayong nasa alert level 3 na ang National Capital Reigon.

Naniniwala si Solante na dapat manatili ang mahigpit na quarantine status lalo’t hindi pa rin umaabot sa 40% ang vaccination rate at wala pa ang tinatawag na herd immunity ng mga nabakunahan kontra COVID-19.—sa panulat ni Drew Nacino

Hinimok ng  Philippine National Police ang mga may-ari ng night markets at mga tiangge na mahigpit na ipatupad ang minimum health protocols kontra COVID-19.

Dapat rin aniyang maglagay ng mga pasilidad ang mga may-ari ng naturang mga establisyimento upang matiyak na nasusunod ang health protocols.

Sinabi naman ni Metropolitan Manila Development Authority Chairman Benhur Abalos na maglalabas ng guidelines ang Inter-Agency Task Force kaugnay sa operasyon ng night markets at mga tiangge.—sa panulat ni Hyacinth Ludivico

Posibleng bumaba pa sa 5,000 hanggang 6,000 ang arawang kaso ng COVID-19 sa bansa sa katapusan ng Oktubre.

Sinabi ni OCTA Research Fellow Dr. Guido David na patuloy ang pagbuti ng mga datos sa COVID-19 nitong mga nakalipas na araw dahil hindi na umaabot sa 10,000 ang bilang ng mga bagong kaso.

Gayunman, posible pa rin naman aniyang umabot ng hanggang 10,000 ang maitatalang kaso ngunit ito’y dahil sa backlog at aniya’y pansamantala lamang.

Sa ngayon ay nasa 0.64 ang reproduction number ng COVID-19 sa buong bansa habang ang seven-day average cases ay nasa 8,400 na lamang.—sa panulat ni Hyacinth Ludivico

Nangako si Pangulong Rodrigo Duterte na susuportahan ang kampanya ng political aspirants ng PDP-Laban, kabilang na ang pagkakaloob ng sako-sakong pera upang matiyak ang kanilang pagka­panalo.

Gayunman, hindi naman malinaw kung seryoso ang naturang pahayag ng Pangulo dahil batay sa omnibus election code ay ipinagbabawal ang paggamit ng pondo ng gobyerno para sa pangangampanya sa eleksyon.

Sinabi pa ng Pangulo na kahit hindi siya makakadalo sa lahat ng political meetings ay ikakampanya niya ang mga miyembro ng partido.

Hinimok rin ng Pangulo ang PDP-Laban party members na tiyakin ang integridad ng halalan para sa kani-kanilang posisyon, sa kabila ng hamon na kanilang kakaharapin.—sa panulat ni Hyacinth Ludivico

Umabot na sa mahigit 52.1 milyong doses ng bakuna kontra COVID-19 ang naiturok na sa buong bansa.

Batay sa  national COVID-19 vaccination dashboard, mahigit 24 milyong indibidwal ang fully vaccinated na o nakatanggap ng dalawang dose, habang mahigit 27 milyon naman ang nabigyan ng first dose ng COVID-19 vaccine.

Sinabi naman ni Vaccine Czar Carlito Galvez, na sapat na ang suplay ng bakuna sa bansa.

Sa ngayon ay aabot na sa mahigit 91.5 milyon doses ng COVID-19 vaccines ang kabuuang supply ng bakuna na natanggap ng Pilipinas.—sa panulat ni Hyacinth Ludivico

Pinayagan na ng lokal na pamahalaan ng Tagaytay City na mag-operate ng mas mahabang oras ang mga restaurant sa lungsod.

Sa Executive Order No.394 ni Tagaytay City Mayor Agnes Tolentino, maaari nang mag-operate hanggang alas-10 ng gabi ang mga restaurant sa lugar.

Gayunman, dapat pa ring ipatupad ang 30% maximum seating capacity sa mga kainan, at 50% seating capacity sa al fresco dining.

Tanging mga nakakumpleto na ng bakuna kontra COVID-19 ang pinapayagan na mag-dine in sa mga restaurant sa Tagaytay.

Una nang inanunsiyo ng lokal na pamahalaan, na 70% ng kanilang populasyon ang nabakunahan na kontra COVID-19.

Inalis ng rappler ang presidential survey nito sa Facebook makaraang upakan ng mga netizen dahil umano sa pandaraya kay Partido Federal ng Pilipinas Presidential candidate at dating Senador Ferdinand ‘Bongbong’ Marcos Jr.

Humingi naman ng paumanhin ang Rappler at nagpaliwanag na tinanggal ang survey dahil hindi umano ito naaayon sa kanilang layunin

Gayunman, dinumog ng batikos mula sa vloggers ang nabanggit na media entity dahil sa pagtatangka umano nitong linlangin ang publiko.

Ayon sa vlogger na si Maui Becker, na kilala rin bilang Princess Maui, hindi matanggap ng rappler na natambakan ni marcos ng 100,000 o 150,000 sa survey si Vice President Leni Robredo.

Iginiit naman ni vlogger Chika-Doro na isang tangkang pananabotahe ang survey dahil tila naka-auto heart ang post kaya ang “shocked emoji” na pinindot niya ay napalitan ng heart.

Nitong Oktubre 7 ay nagpost sa Facebook ang Rappler ng isang survey para makita kung sino ang gusto ng netizens na ihalal bilang Pangulo sa May 2022 elections. —sa panulat ni Hyacinth Ludivico