METRO PATROL

Tinatayang nasa 150 pamilya ang nawalan ng tirahan matapos matupok ng apoy ang isang residential area sa Malabon City nitong Biyernes.

Batay sa ulat, dakong ala-1:40 ng madaling araw nang sumiklab ang sunog kung saan mabilis itong kumalat sa katabing mga bahay na gawa sa light materials.

Agad namang rumesponde ang mga tauhan ng Bureau of Fire Protection at idineklarang fire-out ng sunog bandang alas-6:35 ng umaga.

Wala namang naipaulat na nasaktan o nasawi sa naturang insidente habang inaalam pa ang pinagmulan ng sunog at kabuuang danyos nito.

Agad namang nagpadala ng tulong si Malabon City Mayor Jeannie Sandoval sa mga naapektuhan ng sunog.

Kaugnay nito, namigay ng food packs, tubig, banig, hygiene kit at portable tents ang lokal na pamahalaan ng Mandaluyong at nangako ang kanilang alkalde na magbibigay ito ng agarang tulong upang makabangon ang mga nasunugang residente mula sa nangyaring trahedya.—mula sa panulat ni Hannah Oledan

Nasawi ang isang senior citizen habang dalawa ang sugatan matapos masagasaan ng fire truck na rumesponde sa isang sunog sa Makati City.

Sa isang video, makikita na nakatayo ang mga tao at bumbero sa kalsada ng barangay Viejo pero ilang saglit, dumire-diretso ang fire truck hanggang sa masagasaan ang mga residente.

Ayon sa hepe ng Makati City Police na si police Colonel Edward Cutiyog, nilagyan ng kalso ang sasakyan, ngunit pababa ang kalsada. Bumaba ang driver upang tumulong sa pag-apula ng apoy nang biglang umabante ang fire truck.

Binawian ng buhay sa ospital ang senior citizen na kinilalang si Florencio Balaoing Jr. matapos pumailalim sa truck na tumulong pa sa pag-apula sa sunog habang isinugod din sa ospital sina Rita Roxas at Relin Azuelo na nagkaroon ng mga bali sa katawan.

Humarap sa awtoridad ang driver ng sasakyan na si John Polinar Orbeta ngunit tumangging magbigay ng komento. Iimbestigahan pa ng pulisya kung may problema ang fire truck.—mula sa panulat ni Maize Aliño- Dayundayon

Naantala ang pagresponde ng mga tauhan ng Bureau of Fire Protection sa sumiklab na sunog sa lungsod ng Malabon matapos magkaroon ng water interruption bandang ala-1 ng madaling araw.

Nagsimula ang sunog sa isang bahay sa barangay Tonsuya at mabilis na kumalat ang apoy dahilan para itinaas sa ikatlong alarma ng BFP ang sunog.

Sinabi ni Senior Fire Officer-4 (SF04) Kriby Banglos ng BFP, nag-iigib pa sa Portero at Navotas ang mga fire truck dahil sa kawalan ng supply ng tubig. Tumulong naman ang mga residente sa pag-apula ng apoy.

Inaalam pa ng awtoridad ang sanhi ng sunog, bilang ng mga naapektuhang pamilya at halaga ng mga napinsalang ari-arian.

Walang namang naiulat na nasawi sa sunog.—mula sa panulat ni Maize Aliño-Dayundayon

Mahigit 500 piraso ng ecstasy tablets ang nasabat ng mga tauhan ng Bureau of Customs (BOC) sa Parañaque City.

Ayon sa BOC, tinatayang aabot sa mahigit 858,500 pesos ang halaga ng ilegal na droga.

Galing umano ang package na idineklarang “beads in a bottle” sa The Netherlands.

Naaresto naman ang kumuha ng package na hindi pa nagbibigay ng pahayag.

Inihayag ni Manila Mayor Honey Lacuna na walang lugar ang mga kriminal sa kanyang lungsod.

Ayon sa alkalde, hindi aniya porket babae ang nakaupo bilang mayor ay pupwede na ang kalokohan sa Maynila.

Nais ng kauna-unahang babaeng mayor ng lungsod na magpatupad ng bakal na kamay sa pagsugpo sa mga kriminal sa lungsod.

Paninindigan pa ng alkalde, ang lungsod na malaya sa kriminalidad ay susi sa pag-unlad at magreresulta sa pagkakaroon ng mga trabaho.

Kumpiyansa naman si Lacuna na gagawin ni Manila Police District (MPD) Director Police Brigadier General Andre Dizon ang lahat upang mapanatulu ang kaayusan sa kanilang lugar.

Samantala, tiniyak naman ng alkade na susuportahan niya ang MPD sa abot ng kanyang makakaya. —sa panulat ni Hannah Oledan

Nagdulot ng matinding trapiko sa mga motoristang bumabaybay sa Northbound lane ng EDSA Busway Station ang lalaking nag-amok dahil niloko umano ng kanyang nobya.

Ayon sa Inter-Agency Council for Traffic (I-ACT), pumasok nang umiiyak sa busway ang lalaki habang pinakakalma ng kanyang nobya.

Itinulak at hinamon pa nito ng suntukan ang isa sa mga operatiba upang mawala umano ang sama ng loob nito.

Samantala, agad namang rumesponde ang mga tauhan ng I-ACT, PCG, at MMDA para pakalmahin at dalhin sa presinto ang lalaki.  —sa panulat ni Hannah Oledan