METRO PATROL

Nadakip ng Quezon City Police District ang dalawang suspek sa pagho-hold-up at pagnanakaw sa barangay san Isidro sa Quezon City.

Ayon sa biktima na si Diem Garcia hinihintay niya ang kanyang live-in partner na si Dennis Mariano sa bahagi ng Cordillera street nang tigilan siya ng dalawang lalaking sakay ng motorsiklo.

Aniya matapos huminto tinutukan siya ng mga ito ng baril at sapilitang inagaw ang kanyang cellphone at agad na tumakas pa-Maynila

Dahil dito, sinundan ng live-in partner ni Garcia ang mga suspek at natunton ang kinaroroonan ng mga ito.

Kaya’t nagsumbong sila sa Galas Police Station 11 at naaresto ang mga suspek na sina Mark Gil Concepcion at Analdo Ebores.

Patay ang dating kadete ng Philippine Merchant Marine Academy (PMMA) matapos paputukan ng baril ang mga humahabol sa kanyang otoridad sa Quezon City.

Nabaril din ang isang miyembro ng SWAT team na kasama sa mga tumugis sa suspek na si Martin Luther Nuniez.

Naganap ang engkuwentro sa pagitan ni Nuniez at QC Police at SWAT sa isang subdivision sa Barangay 177 sa CALOOCAN CITY.

Ayon sa mga otoridad, bago ang engkuwentro ay nagpaputok ng baril si Nuniez sa Barangay Pasong Putik dahil hinahanap umano nito ang taong nambasag sa salamin ng kotse ng ina.

Hinabol ng mga otoridad ang suspek hanggang makarating sa bahay nito sa Caloocan at sinubukan umano itong padapain subalit nagpaputok pa ng kanyang Glock 45 kaya’t gumanti ng putok ang mga otoridad na ikinasawi ng suspek.

Nasawi ang SWAT member na si Police Corporal Noel Ugano matapos tamaan ng putok sa kasagsagan ng engkuwentro.

Nilimitahan ng lokal na pamahalaan, ang biyahe ng mga “QCity bus” sa ilang ruta sa Quezon City.

Pansamantalang limitado ang biyahe sa route 1 o ang biyahe mula sa City Hall hanggang Cubao; route 2 o ang biyahe mula City Hall hanggang Litex; at ang route 7 o biyahe mula City Hall hanggang C5 Ortigas Ave. Extension.

Hindi naman idinetalye ng Quezon City government ang dahilan kung bakit nilimitahan ang biyahe ng “QCity bus” sa mga nabanggit na lugar pero magiging regular naman ang operasyon sa ibang mga ruta.

Nasamsam ang hinihinalang high-grade marijuana o kush na nagkakahalaga ng 925,000 pesos, sa isang lalaking sa Parañaque City.

Ito’y matapos isagawa ang controlled delivery ng PDEA Central Luzon, Bureau of Customes Port of Clark, PDEA-NCR, at PNP sa brgy. Don Bosco kung saan nasabat ang ilegal na droga at naaresto ang 25-anyos na suspek.

Ayon sa PDEA, dumating ang package sa port of clark noong Oktubre 24 mula sa California.

Natuklasang may lamang ilegal na gamot ang package nang sumailalim sa X-ray at K9 inspeksyon.

Maliban sa nakumpiskang 588 gramo ng dami ng kush kasama rin sa package ang 45 vape catridge na may lamang marijuana.

Nahaharap ang mga suspek sa kasong paglabag sa section 4 ng Republic Act 9165 o importation of dangerous drugs.—mula sa panulat ni Maize Aliño-Dayundayon

Inaasahang lolobo pa sa 20,000 hanggang 30,000 katao ang bibisita sa Pasig City Cemetery ngayong araw.

Nagpaalala naman ang pamunuan ng sementeryo na bawal na ang pagdadala ng mga panglinis para sa mga puntod at ipinagbabawal rin ang matutulis na bagay at pagdala ng alak.

Maliban dito, hindi maaaring magtinda at mag-iwan ng mga basura sa loob ng naturang sementeryo.

Samantala, bukas naman ito mula ala-6 ng umaga hanggang alas-11 ng gabi bukas, November 2.

Bagama’t pinapayagang makapasok kahit unvaccinated ang mga indibidwal sa sementeryo, mahigpit ang panuntunan nila sa pagsusuot ng face mask habang nasa loob.

Inilabas na ng pamunuan ng lungsod ng Parañaque ang schedule para sa pagbisita sa mga pampubliko at pribadong sementeryo sa lungsod sa darating na Undas.

Bukas mula October 29 hanggang 30 ang palanyag at Catholic cemetery mula alas-6 ng umaga hanggang alas-6 ng gabi, ngunit sa October 31 hanggang November 1 ay bubuksan ito ng 24-oras.

Bukas din mula alas-6 ng umaga hanggang alas-6 ng gabi ang Manila Memorial Park sa Sucat sa October 31 hanggang November 1.

Nag-abiso naman ang lokal na pamahalaan sa mga motorista na isasara ang kahabaan ng A. Bonifacio at ng tramo mula October 29 hanggang November 1 para magbigay-daan sa mga papunta ng Palanyag at Catholic cemetery.

Isasara naman ang dalawang linya sa kahabaan ng dr. A Santos Ave. para bigyang-daan ang mga magtutungo sa Manila Memorial Park. —mula sa panulat ni Hannah Oledan