Mahigit P1-M halaga ng shabu sa ang nasabat sa buy-bust operation sa Caloocan City.
Naaresto naman ang suspek na si Jessie Zozobradon, alyas “Jess”, 32 anyos, residente ng Barangay 174.
Ayon kay Northern Police District (NPD) Director, Brig. Gen. Ponce Rogelio Peñones Junior, nakumpiska kay Zozobradon ang nasa 150 grams ng shabu.
Nahaharap sa kasong paglabag sa Republic Act 9165 o Comprehensive Dangerous Drugs Act of 2022 ang suspek. —sa panulat ni Jenn Patrolla
Arestado ang dalawang indibidwal na nagbebenta ng mga pekeng produkto sa magkahiwalay na operasyon ng Criminal Investigation and Detection Group (CIDG) sa lungsod ng Maynila at lalawigan ng Bulacan.
Nasabat mula sa suspek at cashier ng isang electric bike accessories shop na si Rhea Barrameda Nabus ang nasa 80,000 pesos na halaga ng 127 piraso ng pekeng voltmeter sa Baliuag, Bulacan.
Nasa 50,000 pesos naman na halaga ng pekeng statement shirt na highminds ang nakumpiska mula sa dealer na si Luiegi Balasbas sa Sta. Ana, Maynila.
Samantala, pinaalalahanan ni PNP-CIDG Director, Brig. Gen. Ronald Lee ang publiko na huwag tangkilikin ang mga pekeng produkto, lalo ngayong holiday season. – sa panulat ni Hannah Oledan
Nakatanggap ng pension at cash gift ang mga senior citizen mula sa Pasig City government ngayong taon.
Ayon sa lokal na pamahalaan, ang pamamahagi ng ayuda sa mga benepisyaryo ay tulong sa gitna ng nalalapit na kapaskuhan kung saan, idinaan ang halaga nito sa kanilang mga ATM cards.
Nabatid na ang naturang cash gift at local senior pension ay para sa mga buwan ng Agosto hanggang Disyembre 2022 na hindi pa nakakatanggap ng benepisyo kabilang na ang mga senior citizen na nawalan ng ATM holders, hindi pa naki-claim ang cash card, o nagkaproblema sa kanilang cash card.
Samantala, maaari pading makatanggap ng cash gift ang pamilya ng mga pumanaw na senior beneficiaries, ipakita lamang ang death certificate ng kanilang kaanak.
Binulabog ng isang malaking sawa ang mga residente ng Barangay Talipapa sa Quezon City.
Ayon sa barangay tanod na si Oton Ortiguerra, patulog na ang kanyang mag iina nang makarinig ng kaluskos sa kisame ang mga ito at laking gulat nang tumambad ang sawa na paggapang na sa kanilang higaan.
Kaagad namang rumesponde ang mga barangay tanod para mahuli ang burmese phython na halos 10 talampakan ang haba na kaagad inilagay sa sako at nai turn over na sa mga kinauukulan.
Sinabi naman ng isang opisyal ng barangay na ikatlong ahas na itong natagpuan sa kanilang lugar at posibleng nanggaling sa Tullahan River o sa bakanteng lote.
Isang drugstore sa Quezon City ang hinoldap ng mismong gwardiya nito ngayong Martes ng umaga.
Ayon kay Quezon City Police District Director, Brigadier General Nicolas Torre the Third, naganap ang insidente dakong alas-6:30 kaninang umaga, sa Mercury drugstore sa E. Rodriguez Avenue Corner, Banawe Street.
Nabatid na dalawang buwan pa lang nagtatrabaho ang guwardiya sa branch bago ang pangho-holdap.
Kwento ng mga otoridad, gumamit ng crowbar, martilyo, chisel at iba pang gamit ang gwardiya para sirain at mabuksan ang vault.
Wala pang P100 ang nakuha ng suspek na hindi naman nanakit.
Posibleng dahilan sa holdap ang pagsisi ng gwardiya sa kumpanyang pinagtatrabahuhan nito, dahil di kaagad pinauwi nang mamatay ang kanyang asawa noong nakaraang buwan.
Sa ngayon, patuloy ang manhunt operation ng PNP sa gwardiya.
Isa katao ang nasawi sa sunog sa Barangay Holy Spirit sa Quezon City.
Ayon kay Delmar Enerva, papaalis na nang nasusunog nilang bahay ang 70 anyos na amang si Delfin nang madulas ito at mabagok ang ulo sa semento.
Dead on arrival sa ospital ang matandang enerva na mayruon ding sakit sa puso.
Nabatid na nagsimula ang sunog sa bahay ng isang Nestor Bactismo na nakita ang umuusok na kuwarto ng kapatid na nasa second floor ng kanilang bahay.
Sinubukan nila aniyang apulahin subalit hindi na kinaya kaya’t inilabas na lamang niya ang kanyang mga anak.
Iniimbestigahan na ng mga otoridad ang dahilan ng nasabing sunog na tumupok sa 10 kabahayan na pawang gawa sa light materials.
Patay ang isang pulis na miyembro ng Special Weapons and Tactics (SWAT) nang aksidenteng maputukan ng baril habang naglilinis kasama ang kanyang mga kabaro sa San Pablo City Police Station sa Laguna.
Batay sa ulat ng Police Regional Office – CALABARZON kinilala ang biktima na si Police Corporal Fhrank Aldene Yasay Dela Cruz, 30 taong gulang.
Ayon sa kwento ng suspek na si Police Corporal Mervin Cañeta Duran, 31 taong gulang nililinis nila ng biktima at iba pang kasamahan nito ang kanilang baril para sa inspeksyon pasado alas-9:00 kaninang umaga.
At nang tanggalin niya ang magasin ng kanyang Taurus TS 99 mm service firearm at aalisin ang balang nakalagay ay bigla na lamang itong pumutok at tinamaan sa kanang dibdib ang biktima.
Agad namanag isinugod sa San Pablo Community General Hospital ang biktima ngunit idineklara itong dead on arrival. —sa ulat ni Tina Nolasco (Patrol 11)
Tinanghal si Quezon City Mayor Joy Belmonte bilang top performing local chief executive sa Metro Manila ng RP Nation and Development Foundation Incorporated.
Nakalikom si Belmonte ng overall job performance rating na 90%.
Nito lamang nakaraan ay tumanggap naman ang alkalde ng Seal of Good Local Governance mula sa Department of the Interior and Local Government.
Samantala, ang iba pang top performing mayors sa National Capital Region ay sina Along Malapitan ng Caloocan na nakakuha ng 78%, Jeannie Sandoval ng Malabon na may 74%, Vico Sotto ng Pasig City na may 72% at John Rey Tiangco ng Navotas na may 70%. —sa panulat ni Hannah Oledan
Handang patayuan ng Manila local government unit ng barangay hall ang mga barangay sa lungsod na wala pang punong tanggapan.
Inamin ni Manila City Mayor Honey Lacuna na isang malaking problema sa kanilang siyudad ang kawalan ng barangay hall sa ilang mga barangay sa Sta. Mesa, Manila.
Sa muling pakikipag ugnayan ni Lacuna at Vice Mayor John Marvin Nieto sa taumbayan, sinabi ng ilang punong barangay na hindi sila makapagtayo ng barangay hall sa mismong kalsada o dahil magiging sagabal ito para sa mga pedestrian.
Sinabi naman ni Lacuna na handa itong makipagtulungan sa mga punong barangay. Kailangan lamang ng mga ito na maghanap ng bakanteng lote at sila na ang sasagot sa mga gastusin. —sa panulat ni Hannah Oledan
Aabot sa P2.65-M na halaga ng cocaine at iba pang iligal na droga ang nasabat ng Bureau of Customs (BOC) mula sa isang bodega sa Taguig City.
Tumitimbang ng nasa kalahating kilo ang mga nasabat na cocaine at vape na naglalaman ng hinihinalang marijuana oil habang nasa 30 gramo ang nakumpiskang hinihinalang kush.
Nakatakdang i-turn over sa Philippine Drug Enforcement Agency (PDEA) laboratory service ang mga nadiskubreng droga.
Ang naturang raid may kaugnayan sa isinagawang operasyon ng PDEA sa isang shabu laboratory sa Ayala Alabang, Muntinlupa City kung saan mahigit P146-M na halaga ng shabu ang nadiskubre. —sa panulat ni Hannah Oledan