METRO PATROL

Patay ang dalawang taong gulang na batang lalaki matapos mahulog at malunod sa ilog pasig na sakop ng Sta. Mesa, Maynila.

Kinilala ang biktimang si john lucas almero, na natutulog at aksidenteng nalusot sa butas ng kanilang barung-barong sa 2618 Sta. Maria St., Pandacan, Maynila.

Sa impormasyon ng mga tauhan ng sta. Mesa police station 8 (PS-8) ng Manila Police District (MPD), nakitang palutang-lutang ang biktima sa ilog ng isang Ciriaco Samuya, Utility Worker 1 ng Metro Manila Development Authority (MMDA), kaya’t agad itong ipinagbigay-alam sa mga otoridad.

Alas-7:10 ng umaga nang marekober ng mga tauhan ng Philippine Coast Guard (PCG) ang bangkay ng biktima sa pasig river, na sakop ng Barangay 636, Anonas St., Valencia Pumping Station, sa Sta. Mesa.

Dinala na ang bangkay ng biktima sa Cruz Funeral Parlor para sa kaukulang awtopsiya at safekeeping.  -sa panulat ni Angelica Doctolero

Pumalo na sa dalawang milyong indibidwal ang fully vaccinated sa lungsod ng Quezon laban sa COVID-19.

Batay sa ulat ng lokal na pamahalaan, kabuuan itong 2,337,126.

Sa bilang na ito, 2,237,324 ang nabakunahan ng unang dose, habang 283,239 ang nakatanggap ng booster shot.

Umabot naman sa kabuuang 5,379,889 bakuna ang naiturok sa lungsod. —sa panulat ni Abby Malanday

Kalaboso ang tatlong katao sa isinagawang buy bust operation ng mga pulis sa Tondo, Manila.

Kinilala ang mga suspek na sina Judy Ann Barrozo, alyas “Ning”, 24 anyos; Vannie Rabia; at Jennilyn Betito, kapwa 33 anyos.

Narekober ng mga otoridad sa mga suspek ang 29 na sachet ng shabu na tumitimbang ng humigit-kumulang 145 gramo na nagkakahalaga ng 986,000.

Nahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002. —sa panulat ni Kim Gomez

Patay ang isang armadong lalaki habang dalawa pang kasama nito ang pinaghahanap matapos holdapin ang isang bus driver sa Quezon City.

Kinilala ang biktima na si Antonio Corpuz, 60 anyos habang ang suspek na si Francis Morales, 21 ayos na nagtamo ng mga sugat matapos manlaban sa mga otoridad na agad nitong ikinasawi.

Narekober sa suspek ang pistol na may isang magazine, tatlong live ammunition, dalawang fired cartridge case, isang itim na sling bag na may mga identification card, apat na cellular phone, at 3,000 pesos cash.

Inaalam pa ng mga pulis ang pagkakakilanlan ng dalawa pang suspek na tumakas. —sa panulat ni Kim Gomez

Nasamsam ng mga otoridad sa pitong suspek ang nasa mahigit kalahating milyong pisong halaga ng shabu sa Old Housing, Brgy. Maharlika, Taguig City.

Kinilala ang mga biktima na sina, Rasul Gaylon, 18-anyos; Camilla Tabawan, 32-anyos; Dennis Ramir Bonifacio, 35-anyos; Samson Taha, 18-anyos; Litlie Laguialam, 23-anyos; Naora Saadudin, 38-anyos; at Theresa Reciproco, 41-anyos na mga residente sa nasabing lungsod.

Ayon kay SPD Director, Brig. General Jimili Macaraeg, may timbang na aabot sa 76.5 gramo ang naturang shabu na nagkakahalaga ng ₱520,200

Nakuha din sa mga suspek ang ilang pakete na naglalaman ng ‘shabu’, marked money, digital weighing scale at plastic bag.

Hawak na ngayon ng DDEU ang pitong suspek na nakatakdang sampahan ng paglabag sa RA 1965 o Comprehensive Dangerous Drugs Act of 2002 habang itinurn-over naman ang mga narekober na ilegal na droga sa SPD Forensic Unit para sa chemical analysis. —sa panulat ni Angelica Doctolero

Aabot sa mahigit 80,000 pisong halaga ng hinihinalang shabu ang nasabat mula sa dalawang drug suspects sa ikinasang buy-bust operation sa Brgy. Aguho, Pateros.

Kinilala ang mga suspek na sina Michelle Mendoza at Dave Calingo, kapwa nakatira sa nasabing bayan.

Maliban sa 500 pisong buy-bust money, nakumpiska rin mula sa mga ito ang nasa mahigit 81,000 pesos na halaga ng umano’y shabu at isang pouch.

Nakakulong na ngayon ang mga suspek at nakatakdang sampahan ng reklamong paglabag sa Comprehensive Dangerous Drugs Act. —sa ulat ni Gilbert Perdez (Patrol 13)

Patay ang isang rapper matapos pagbabarilin ng hindi pa nakikilalang mga suspek sa Alabang Viaduct, Muntinlupa City, kagabi.

Kinilala ang biktima na si Jomer Galicia o mas kilala bilang “Og Kaybee” at “Kalbong Brutal”, 32-anyos, at residente ng Malate, Maynila.

Agad namang nagsitakas ang mga armadong salarin sakay ng isang puting van.

Ayon sa ilang saksi, nakarinig sila ng sunod-sunod na putok ng baril at natagpuan na lamang nila si Galicia na duguang nakahandusay sa lugar.

Patuloy ang imbestigasyon ng mga otoridad sa naturang pamamaslang. – sa ulat ni Gilbert Perdez (Patrol 13)