METRO PATROL

Umabot na sa 350 pamilya ang nawalan ng tahanan matapos sumiklab ang sunog sa isang residential area sa Quezon City.

Ayon sa Quezon City Fire Department, nasa 200 kabahayan ang naabo ng sunog na matatagpuan sa Halamanan Street sa Barangay Commonwealth, na nagkakahalaga ng 250,000 pesos.

Tatlo ang nasugatan sa sunog na hindi pa pinapangalanan.

Nagsimula ang sunog sa isang dalawang-palapag na bahay dakong 6:41 ng umaga na umabot sa ikalawang alarma bago naapula dakong alas-9 ng umaga.

Patuloy naman ang imbestigasyon ng mga otoridad sa sanhi ng sunog. —sa panulat ni Abby Malanday

Maglulunsad ng Protection Center para sa kababaihan, kabataan at LGBTQ members ang pamahalaang lokal ng Mandaluyong.

Ito ay para bigyang tugon o matulungan at mabigyan ng kanlungan ang mga nasabing gender na nabiktima ng pang-aabuso at diskriminasyon.

Ayon kay Mandaluyong City Mayor Menchie Abalos, ang Mandaluyong City Protection Center for Women, Children & LGBTIQ ay itatayo sa Dr. Fabella Street sa barangay Mauway na pangungunahan ng Gender and Development Office ng Mandaluyong, City Engineering, City Planning Office, at ng National Center for Mental Health.

Layunin ng lungsod na maprotektahan ang kapakanan ng bawat kasarian at matiyak na ang mga kabataan ay nagagabayan nang maayos kasabay ng pagiging responsable ng mga magulang para sa kanilang mga anak. —sa panulat ni Angelica Doctolero

Halos 200,000 pisong halaga ng umano’y shabu ang nakumpiska ng mga awtoridad sa ikinasang operasyon sa General Luna St., Brgy. Tuktukan, Taguig City.

Kinilala ang mga suspek na sina Norbert Flores, Akbar Maing at Erick Leal, pawang mga residente ng lungsod.

Maliban sa 500 pisong buy-bust money, nakuha rin mula sa tatlo ang 170,000 pesos na halaga ng hinihinalang shabu, isang kalibre .38 baril at dalawang bala.

Nakatakdang sampahan ng kaukulang reklamo ang mga suspek. —sa ulat ni Gilbert Perdez (Patrol 13)

Nasabat ang 920,000 halaga ng iligal sa droga sa magkakahiwalay na operasyon sa Caloocan at Quezon City nitong Biyernes.

Unang naaresto si Muamar Abeden na nakuhanan ng 680,000 halaga ng shabu.

Habang 136,000 halaga ng shabu ang nakuha kina;  Randel Allid, Elizar Arojado, Jojit Mesa, Virgo Basco, at Rolando Sioco.

Samantala, sampung gramo naman ng shabu na nagkakahalaga ng 68 thousand pesos ang nakuha kina ronald gabion, romulo cariaso, at jefferson angeles sa barangay san isidro.

Kinasuhan na ng drug trafficking ang suspek. – sa panulat ni Abby Malanday

Dinakip ng National Bureua of Imbestigation (NBI) Anti-Human Traficking Division ang isang 16 anyos na babae matapos itong mahuli sa aktong binubugaw ang apat na kapwa niya menor de edad sa Pasay City.

Sa imbestigasiyon ng Pasay Police, inaalok ng suspek sa mga Chinese sa social media platforms ang mga kasama nito sa halagang 2,500 pesos.

Nabatid rin na mahigit dalawang taon na itong ginagawa ng naturang suspek.

Samantala, kakasuhan ang suspek ng human traficking, subalit dahil menor de edad ay ilalagay muna ito sa pangangalaga ng Department of Social Welfare and Development (DSWD). – sa panulat ni Mara Valle

Mahigit tatlong milyong pisong halaga ng hinihinalang shabu ang nasabat ng mga otoridad sa ikinasang buy-bust operation sa isang drug den sa Taguig City nitong Huwebes.

Nakuha ng pulisya mula sa anim na lalaki ang umano’y shabu na may timbang na halos kalahating kilo, na tinatayang mahigit tatlong milyong piso ang halaga.

Maliban dito, nakumpiska rin ang ilang drug paraphernalia, isang baril at mga bala.

Sasampahan ng kasong paglabag sa Comprehensive Dangerous Drugs Act at paglabag sa COMELEC Gun Ban ang mga suspek.

Inaresto ng mga tauhan ng Pasig City Police Station ang isang lalaki na itinuturing na high value target dahil sa iligal na droga.

Kinilala ang drug personality na si Thomas Christian Jimenez, 29-anyos na naaresto sa Road 1, Willaray Village sa Brgy. Pinagbuhatan.

Nakuha sa suspek ang dalawang sachet ng shabu na tumitimbang ng isang gramo at may street value na P6,800.

Nakuha din kay Jimenez ang dalawang sachet ng marijuana na nasa mahigit isang gramo at nagkakahalaga ng P156.00.

Nahaharap ngayon sa kasong paglabag sa RA 9165 o Comprehensive Dangerous Drugs Act of 2002 si Jimenez. - sa panulat ni Angelica Doctolero