METRO PATROL

Inaresto sa Parañaque City ang isang Guinean man na umano’y sangkot sa tinatawag na ‘Black Money’ Scam.

Kinilala ito na si Aly Camara, 39-anyos mula sa Republic of Guinea na dinakip ng Criminal Investigation and Detection Group (CIDG) sa isang hotel sa San Isidro.

Ayon kay Police Colonel Randy Glenn Silvio, head ng CIDG-NCR, sanhi ang operasyon ng reklamo ng isang babae laban kay Camara at sa dalawa pang dayuhan na sina Alexander Laerund at alyas Hillary.

Hinimok kasi ang babae na bumili ng black na papel na magiging dolyar na salapi kapag nilagyan ng chemical solution.

Nagbigay ang babae ng 850,000 sa mga suspek bilang initial payment at 1.25 milyong piso bilang isa pang transaksyon.

Nahaharap na ngayon sa kasong Estafa si Camara. —sa panulat ni Abby Malanday

Dalawang hinihinalang mandurukot ang arestado matapos umanong burikiin ang pitaka ng isang lalaki sa gitna ng campaign motorcade sa Las Piñas City.

 Kinilala ng Southern Police District ang mga suspek na sina Janice Midoranda, 38 anyos at criselda aleonar, 42 anyos.

 Natimbog sina Midoranda at Aleonar sa tapat ng isang mall sa Alabang-Zapote Road, Barangay Talon Uno.

 Marso a–otso nang mawalan din ng mga gamit, tulad ng cellphone at wallet ang ilang supporter ng ilang kandidato sa isang campaign rally sa Bulacan.

Patay ang isang security guard ng isang condominium habang sugatan naman ang dalawa niyang kasamahan matapos pagbabarilin ng isang Chinese national sa Taguig City.

Kinilala ang suspek na si Tan Xing o Tan Zhennan, na nang-agaw pa umano ng kotse sa Barangay Ususan, sa nabanggit na lungsod.

 Base sa imbestigasyon, inabutan ng biktima na nag-aaway ang apat na indibidwal sa isang unit kung saan, pinababa ng tatlong security guards ang suspek pero agad itong bumunot ng baril at pinagbabaril ang tatlong sekyu.

 Dead on arrival ang isa sa mga security guard habang stable na ang condition ng dalawa pang guard sa ospital.

 Patuloy ang pinaghahanap ng mga otoridad na tumakas sakay ng isang grey Honda City na may plakang DR 2911 at posibleng maharap sa kasong murder at carnapping.

 Patuloy pang iniimbestigahan kung ano ang pinagmulan ng commotion sa condominium matapos marekober ang ilang piraso ng droga. – sa panulat ni Angelica Doctolero

Timbog ang isang 35 anyos na lalaki matapos makuhaan ng higit 200,000 pisong halaga hinihinalang shabu sa Lungsod ng Taguig.

Sa ikinasang buy-bust operation ng otoridad, nahuli ang suspek na kinilalang alyas ‘Jon-Jon’ na isang driver sa Barangay Santa Ana.

Ayon sa pulisya, kilala ang suspek bilang nagbebenta ng ilegal na droga sa mga tambay at kapwa tricycle driver sa kanilang lugar.

Kakasuhan ang suspek ng paglabag sa Comprehensive Dangerous Drugs Act of 2002. —sa panulat ni Abie Aliño-Angeles

Nasabat sa apat na indibidwal ang nasa higit kalahating milyong pisong halaga ng hinihinalang shabu sa lungsod ng Muntinlupa.

Ayon sa otoridad, nakuha sa mga suspek ang aabot sa 77 gramo ng shabu na tinatayang may halagang limangdaan at sampung libo piso (P510,000).

Hindi na pinangalanan pa ng pulisya ang mga suspek pero kilala raw bilang mga supplier ng ipinagbabawal na gamot sa iba’t ibang barangay sa nasabing lungsod.

Kasalukuyan nang nahaharap sa kasong may kinalaman sa ilegal na droga ang mga nahuling suspek. —sa panulat ni Abie Aliño-Angeles