METRO PATROL

Patay ang isang motorcycle rider matapos mahagip ng isang container truck sa Sumulong Highway, Antipolo City.

Sa impormasyon ng mga otoridad, binabaybay ng nasabing truck na may plakang NGS 4583 ang direksiyong patungong Marcos Highway sa Marikina nang mawalan ng kontrol ang truck.

Dito na bumangga sa mga poste at mga sasakyang nakaparada ang truck at nahagip ang rider kasama ang iba pang mga sasakyan.

Ayon sa mga otoridad, posibleng nawalan ng balanse ang truck dahil sa mabigat na karga nito habang pababa ng kalsada.

Iniimbestigahan pa ng mga otoridad ang naganap na aksidente. —sa panulat ni Angelica Doctolero

Tiklo ang 26-anyos na lalaki matapos makuhanan ng mahigit 16 gramo ng shabu sa sa Asilo Ville, Brgy., Pinagbuhatan, Pasig City.

Kinilala ang suspek na si Aladin Ismael y Manda, na nahuli sa ikinasang Anti-illegal drugs operation ng mga tauhan ng Pasig City Police Station.

Nakuha sa suspek ang apat na transparent plastic sachet ng shabu na nagkakahalaga ng P122, 200.00 kasama ng ilang drug paraphernalias at buy bust money.

Nakapiit na sa Detention Cell ng Pasig PNP ang suspek at nahaharap sa kasong paglabag sa RA 9165 o Comprehensive Dangerous Drugs Act of 2002. —sa panulat ni Angelica Doctolero

Pinayuhan ng Department of the Interior & Local Government (DILG) ang mga opisyal ng barangay kasabay ng pagdaraos ng kampanya sa darating na 2022 elections.

Ayon kay DILG  Barangay Affairs Undersecretary Martin Diño, dapat maging ‘apolitical’ ang mga ito o walang pinapanigang kandidato.

Ilang halimbawa rito ang hindi maaaring paggamit sa pasilidad ng barangay katulad ng barangay hall, covered court pati mga sasakyan.

Pero kung sakaling gagamitin ang covered court, dapat bayaran ng mga campaign rally organizers ang kuryente.

Hindi naman dapat gawing marshals ang mga barangay tanod sa panahon ng kampanya. —sa panulat ni Abby Malanday

Umabot sa ikalawang alarma matapos lamunin ng apoy ang nasa 25 bahay sa Purok 7B, Sitio Ilaya sa Alabang, Muntinlupa City.

Sumiklab ang sunog alas-7:30 kagabi kung saan, tumagal ng halos dalawang oras ang apoy bago tuluyang naapula ng mga bumbero.

Wala namang naiulat na nasawi o nasugatan matapos ang insidente pero patuloy pang inaalam ng mga otoridad kung ano ang dahilan at kung magkano ang danyos sa naganap na sunog. — sa panulat ni Angelica Doctolero

Nilamon ng apoy ang isang pabrika ng bulak sa Barangay San Bartolome, Quezon City, kagabi.

Dakong ala- 7:30 nang sumiklab ang sunog sa P. Dela Cruz St.

Ayon sa Bureau of Fire Protection, umabot sa unang alarma ng ang sunog hanggang tuluyang naapula ng makalipas ang isang oras.

Nagsimula sa ground floor ng gusali ang apoy hanggang madamay na ang ilang katabing kuwarto kabilang ang waste disposal area.

Ang naturang pabrika ang gumagawa ng sikat na brand ng bulak na “happy”.

Wala namang nasaktan sa insidente dahil agad ding pinalabas ang mga empleyado habang inaalam na ang sanhi ng pagkalat ng apoy at halaga ng mga natupok o napinsalang ari-arian.

Tiklo ang tatlong indibidwal kabilang na ang isang babae makaraang magkasa ng drug-buybust operation ang mga ope­ratiba ng Antipolo City Police Station at PDEA 4-A sa isang drug den sa Angeles Compound, San Lorenzo, Brgy. San Roque, Antipolo.

Kinilala ang mga nadakip na sina Lea Balle­teros alyas “Lea”; Arnold Antor alyas “Kulas” at Marvin Regalario alyas “Negro.”

Nakumpiska sa mga suspek ang shabu na nagkakahalaga ng mahigit P100-K, drug paraphernalias, P500 bill na ginamit bilang buy-bust money at isang unit ng cellphone.

Nahaharap sa kasong paglabag sa RA 9165 o Comprehensive Dangerous Drugs Act of 2002 ang tatlong drug suspects. —sa panulat ni Angelica Doctolero