METRO PATROL

Aabot sa 100,000 pesos ang reward na ibinigay ng lokal na Pamahalaan ng Muntinlupa sa lolang nagdiwang ng ika-100 kaarawan noong Agosto 11.

Personal na ipinaabot ni Muntinlupa Mayor Ruffy Biazon ang cash gift kay Aida Cruz Del Rosario, na kauna-unahan ding registered female architect sa bansa.

Nagtapos ito sa University of Santo Tomas sa panahong dominado ng mga lalaki ang nasabing larangan.

Si Lola Aida rin ang kauna-unahang centenarian na tumuntong sa edad na 100 sa Muntinlupa.

Ang cash award ay alinsunod sa Centenarians Act of 2016 o Republic Act 10868, na nag-uutos sa pamahalaan na parangalan ang mga mamamayang 100 taong gulang pataas upang kilalanin ang kanilang kontribusyon sa bansa.

Isang ten-wheeler truck na kargado ng 60 sako ng dumi ng manok ang nagdulot ng mabigat na daloy ng trapiko makaraang tumigild sa C-5 kalayaan sa Makati City.

Pumalya umano ang preno ng truck kaya’t nawalan na ng kontrol ang driver habang pumutok din ang isa sa mga gulong ng sasakyan.

Ayon sa MMDA, patungo sanang Baguio City mula sa San Jose, Batangas ang truck na magdedeliver ng mga dumi ng manok na gagamiting pataba.

Dahil sa bigat, natagalang alisin ang tumagilid na sasakyan at inabot ng anim na oras bago tuluyang naalis sa kalsada, dakong ala-7:00 ng umaga kahapon.

Nagsimula nang humupa ang baha sa Barangay Hulong Duhat, Malabon City.

Ito ay matapos ang ilang linggong pagbaha dahil sa pag-apaw ng tubig sa ilang kabahayan at bakuran.

Dahil sa nangyari, nagsimula nang maglinis sa kani-kanilang bakuran ang mga residente.

Sa ngayon, may ilang kalsada na lang ang may baha pero hindi na ito tataas pa sa gutter.

Idineklara nang special non-working holiday ngayong araw sa Pasig City.

Ayon sa Pasig City LGU, pinagtibay ng malakanyang ang direktiba bilang pakikiisa sa 449 na kaarawan ng Pasig.

Dahil dito, walang pasok sa lahat ng antas ng paaralan gayundin sa trabaho.

Pero kung papasok sa trabaho, makatatanggap sila ng karagdagang 30% sa kanilang arawang sweldo.

Iiral din ang ‘No Work No Pay’ Policy para naman sa mga manggagawang hindi papasok sa nabanggit na araw.

Tumaas nang bahagya ang bilang ng mga kaso ng COVID-19 sa Pateros.

Ayon kay Pateros Mayor Miguel “Ike” Ponce III, nag zero COVID-19 cases sila nuong mga nakalipas na araw subalit mayruong naitalang siyam na kaso ang lungsod sa kasalukuyan na pawang asymptomatic.

Ipinabatid ni ponce na dalawa sa mga COVID-19 patients ay nasa isolation facility na dahil sa takot na makahawa sa mga kasambahay samantalang ang pito naman ay naka home quarantine.

Kasabay nito, inihayag ni Ponce na tuluy tuloy ang pagturok nila ng COVID-19 booster doses sa kanilang lungsod.