ENTERTAINMENT

Inamin ng isang showbiz talk show host na si Cristy Fermin na inaayos na ng aktres na si Carla Abellana ang mga dokumento para sa annulment nila ng asawang si Tom Rodriguez.

Ayon kay Cristy Fermin, gusto na umanong tuldukan ni Carla ang tatlong buwang marriage life kasama ang aktor.

Tahimik pa rin ang dalawa sa estado ng kanilang relasyon.

Sa ngayon, nananatili sa Amerika si Tom habang nagpapagawa ng bahay si Carla dito sa Pilipinas.

Matatandaang bagsak presyong ibinebenta ni Carla ang Condo Unit nila ni Tom.

Oktubre ikinasal ang dalawa tatlong buwan lamang nang umugong ang hiwalayan dahil sa umano’y pakikipag-one night stand ni Tom.

Wi-nelcome na ng mag-asawang Park Shin Hye at Choi Tae Joon ang kanilang unang Baby.

Ayon sa Salt Entertainment, isang healthy boy ang ipinanganak ng aktres sa ospital sa Seoul.

Naging maayos naman ang panganganak nito at nasa mabuting kalagayan ang Baby boy.

Labis din ang pasasalamat ng agency sa lahat ng bumati at nagdasal para sa mag-ina.

Noong Enero, ikinasal sina Shin Hye at Tae Joon ilang buwan matapos nilang ihayag ang pagbubuntis ng una.

Sa gitna ng mga espekulasyon at tsisimis kaugnay sa personal na buhay ng aktor na si James Reid, nilinaw nito na single pa rin siya.

Ayon sa actor-singer, hindi siya interasado ngayon sa pagkakaroon ng romantic relationship.

Aniya, marami siyang ginagawa ngayon gaya na lamang ng pagtatatag ng kanyang career sa u.s.

Matatandaang naging malaking isyu ang kumalat na video ni Reid sa kanyang birthday party kung saan hinalikan siya sa pisngi ng isang lalaki na si James Thomas.

Ngunit ayon sa fans club ng aktor ay business partner lamang ito ni Reid at present din umano sa nasabing party ang girlfriend ni James Thomas.

Itinanggi ng aktres na si Loisa Andalio na nagli-live in na sila ng dancer na si Ronnie Alonte.

Nilinaw ni Loisa na hindi sila nagpapaapekto sa kanilang mga basher kaugnay sa kumakalat na isyu sa Social media.

Ayon sa Aktres, matagal nang nababalita ang naturang isyu kung saan, nagkataon lang na magkalapit sila ng bahay ng kaniyang boyfriend at 15 minuto lang ang layo nito sa tinitirhan ni Ronnie.

Sinabi pa ni Loisa na totoo ang lahat ng litratong nakikita ng publiko sa social media na kasama nito si Ronnie pero hindi nila inakalang gagawan ito ng isyu ng mga tao.

Deadma naman si Ronnie sa intriga ng mga netizen at sinabing prayoridad nila na maikasal muna bago makipag live-in at magka-anak.

Iginiit pa ni Ronnie na masaya sila ni Loisa dahil wala silang ginagawang masama at inaapakang tao.

Umani ng ibat-ibang reaksiyon ang cryptic post ni Miss Universe Philippines 2020 Rabiya Mateo sa kaniyang Instagram account.

Nag-alala ang netizens sa naging post ng Beauty Queen kung saan, humihingi siya ng tawad sa kaniyang sarili dahil sa tagal ng kaniyang pagtitiis sa mga bagay na hindi niya deserve.

Naging emosyonal din si Rabiya sa kaniyang mga naging reply sa mga nagbigay ng komento sa kaniyang post dahilan para mapaisip ang ilan kung nagkakalabuan na ba ang relasyon nila ni Jeric Gonzales.

March 16, 2022 nang isapubliko nina Rabiya at Jeric ang kanilang relasyon matapos magbakasyon sa Bohol.

Sa ngayon, hindi pa malinaw kung problema ba sa love life o personal issue ang naging hugot ng Beauty Queen.

Isa na ring degree holder ang dating child star, aktres at video game streamer na si Sharlene San Pedro.

Sa kaniyang Instagram, proud na ibinahagi ni Sharlene ang kaniyang toga picture na may caption na “Sharlene S. San Pedro. Bachelor of Arts in Psychology”.

Natapos ng 23 taong gulang na aktres ang kaniyang Psychology Undergraduate degree sa AMA University and Colleges.

Inulan naman ng pagbati si Sharlene mula sa mga tagahanga at kaibigan sa showbiz gaya nina Myles Ocampo at Barbie Imperial.

Matatandaang nitong nakaraan din nang ipakita ni Sharlene ang ilang snaps sa kaniyang social media accounts na may funny caption na “Slide jump papuntang graduation,”

Ang naturang caption ay hango sa kaniyang favorite mobile game na Call of Duty: Mobile.