ENTERTAINMENT

Kinoronahang Miss World Philippines 2022 si Gwendolyne Fourniol ng Negros Occidental.

Naganap ang kompetisyon sa Mall of Asia Arena kagabi kung saan 35 kandidato ang naglalaban-laban.

Maliban kay  Gwendolyne, itinanghal ding Miss Supranational Philippines 2022 si Alison Black ng Las Piñas City, Reina Hispano-Americana Filipinas 2022 si Maria Ingrid Santamaria ng Paranaque City at Miss Eco Philippines 2022 si Ashley Subijano Montenegro ng Makati City.

Magiging kinatawan din ng Pilipinas sa Miss World Philippines Tourism 2022 si Justine Beatrice Felizarta ng Marikina City, Miss Eco Teen Philippines 2022  si Beatriz Mclelland ng Aklan at Second Princess at Miss World Philippines Charity 2022 si Cassandra Chan ng San Juan City.

Maliban sa Miss World Philippines title, nakuha rin ni Gwendolyne ang special awards na Miss Silka, Miss Love Your Skin at Best in Evening Gown.

Winelcome na ng mag-asawang Iya Villania at Drew Arellano ang kanilang ikaapat na anak na si Astro Phoenix Arellano.

Sa Instagram post ni Drew ibinahagi ang masayang balita, kung saan makikita ang larawan ni Baby Astro na isinilang 4:39 ng hapon kahapon.

Bago ito, una nang nagpost si iya na may caption na “Could it be today?”

Sinundan pa ito ng isang clip makalipas ang ilang oras suot ang isang hospital gown at hawak ang kaniyang IV stand.

Marami naman ang natuwa sa pagiging kwela ng mag-asawa kasabay ng pagbuhos ng pagbati.

Ang iba pang anak nina Iya at Drew ay sina Primo, Leon, at Alana.

Nagsalita na ang singer na si Moira Dela Torre sa hiwalayan nila ng kaniyang mister na si Jason Hernandez.

Sa inilabas ng statement ni Moira sa kaniyang Official Facebook page, inilarawan nito ang hirap, sakit sa prosesong kaniyang pinagdaanan.

Pero kahit ganito, nilinaw ng singer na hindi siya nag-‘cheat’ at nagtaksil sa asawa.

Umapela naman ito sa lahat na i-respeto silang mag-asawa sa gitna ng kanilang pinagdaraanang pagsubok at huwag magpakalat ng mga maling impormasyon.

Noong Martes unang kinumpirma ni Jason ang pagtatapos ng tatlong taong pagsasama nila ni Moira sa pamamagitan din ng Facebook post.

Umamin din ito na naging unfaithful siya kay Moira sa panahon ng kanilang marriage.

Muling in-unfollow ng aktor na si Tom Rodriguez ang asawang si Carla Abellana matapos ang ilang buwang pahinga nito sa social media.

Nabatid na sa muling pagbabalik ni Tom sa kaniyang social media, kaniyang ginulat ang publiko matapos mag story ng isang larawan ng dalawang kamay na tila nakawala sa pagkakagapos sa isang kadena.

 Napansin din ng mga netizen na hindi umano naka-follow ang aktor sa kaniyang estranged wife habang si Carla naman ay nanatiling naka-follow sa aktor.

 January 25, 2022 nang pumutok ang hiwalayan nina Tom at Carla matapos mapansin ng netizens na parehong hindi na naka-follow sa isa’t-isa ang mag-asawa sa Instagram.

 Sa ngayon, inaayos na ni Carla ang annulment case para mapawalang bisa ang kanilang kasal ni Tom Rodriguez.

Super proud ang actor-model na si Matteo Guidecelli sa asawang si Popstar Royalty Sarah Geronimo matapos makagraduate sa culinary school.

 Sa Instagram post ni Matteo, kaniyang ibinahagi ang masayang larawan kasama ang kaniyang wife at nakababatang kapatid na si Paolo Guidecelli kung saan, hawak ni Sarah ang kaniyang diploma na nagpapatunay na isa na siyang ganap na “Chef.”

 Ipinagmalaki din ng aktor ang naging pagsusumikap ng kaniyang asawa para makamit ang kaniyang tagumpay sa buhay.

 Samantala, nagpaabot naman ng pagbati ang ilang mga kaibigan, kapwa artista, at mga tagasuporta ng “Ashmatt” sa na-achieve ng kanilang idolo na si Sarah Geronimo.