ENTERTAINMENT

Matapos ang halos 6 na taon, isang big yes na ang sagot ng aktres na si Vilma Santos sa tanong kung babalik na ba ito sa mundo ng pelikula.

Sa instagram post ni Vilma, makikita ang larawan kasama ang direktor na si Erik Matti at Film Producer na si Dondon Monteverde.

Nakasulat pa sa caption ng post na excited na si Vilma sa dalawang film project na nakalinya para sa kaniya.

Tuwang-tuwa rin si Matti sa desisyon ng star for all season lalo’t ito ang unang proyekto na makakasama niya sa pelikula ang aktres.

Noong 2016 huling lumabas sa takilya si Vilma sa family drama film na ‘everything about her’ at hindi na naulit dahil pumasok ito sa mundo ng politika.

Iginiit ng showbiz columnist na si Cristy Fermin na wala silang kinumpirmang balita hinggil sa umano’y hiwalayan nina Heart Evangelista at Chiz Escudero.

Kasunod ito ng kumakalat na isyu na nagsampa umano ng kasong cyberlibel si Senator Chiz Escudero laban kay nanay Cristy at sa isa pang dj ng isang Fm radio station.

Nabatid na nakabase ang nasabing demanda sa “fake news” na ibinalita umano ng dalawa sa isang programa sa radyo hinggil sa relasyon ng senador at ng aktres.

Samantala, sa naging pahayag mismo ni Sen. Chiz, kaniyang sinabi na wala siyang planong kasuhan si Cristy at nais lamang nitong magkaroon ng leksiyon ang lahat ng mga tagapaghatid ng balita.

Dapat parin na kilatisin muna ang mga balita para malaman kung totoo o peke ito dahil maaring makasuhan ang mga nagpapakalat ng “fake news” o maling impormasyon.

Mariing itinanggi ng aktor na si Markus Paterson ang akusasyong kumakalat ngayon sa social media na pinagbubuhatan niya ng kamay ang nakarelasyong actress-singer na si Janella Salvador.

Kasunod din ito ng kumpirmasyon ng singer na siya ay hiwalay na kay Markus at proud na ibinahagi ang pagiging single mom sa anak na si baby Jude.

Sa twitter post ni Markus, kaniyang sinabi na kailanman ay hindi niya nagawang manakit ng isang babae dahil maayos siyang inalagaan at pinalaki ng kaniyang mga magulang.

Matatandaang sinabi ng aktor na kung may isa siyang natutunan sa relasyon, yun ay ang hindi dapat nakikipag-date sa mga taong nasa industriya.

Isinapubliko na ng P-Pop Sensation na SB19 ang petsa ng kanilang nalalapit na world tour.

May tema ang kanilang tour na SB19 WYAT (Where You At).

Sakop ng concert ang iba’t ibang lugar sa Pilipinas at sa buong mundo.

Sa September 17 magaganap ang concert ng SB19 sa Manila, October 1 sa Cebu, October 8 sa Clark at October 15 sa Davao.

Sa international venue naman, magko-concert ang SB19 sa Dubai sa October 29, November 5 sa New York, November 12 sa Los Angeles at November 27 sa Singapore.

Ang limang miyembro o ang bumubuo sa grupong SB19 ay sina, Pablo, Stell, Ken, Justin at Josh.

Kabilang sa recipients ng Outstanding Asian Star Prize sa 17th Seoul International Drama Awards ang aktres na si Belle Mariano.

Kinumpirma ito ng Rise Artists Studio, kung saan si Belle ang kauna-unahang Pinay na nagkamit ng naturang award.

Nabatid na kabilang sa Filipino Nominees sa nasabing kategorya ang screen partner ni Belle na si Donny Pangilinan, gayundin ang Star Magic Artists na sina Charlie Dizon, Dimples Romana, Jake Cuenca, Maris Racal, Kaila Estrada, at Zanjoe Marudo.

Idaraos ang Formal awarding sa Seoul, South Korea, na ipapalabas sa KBS 2TV sa September 22.

Una nang nakuha nina Alden Richards at Dingdong Dantes ang naturang award noong 2019 at 2020.

Nagpasalamat ang on-screen and off-screen couple na sina Kathryn Bernardo at Daniel Padilla o kilala sa kanilang ship-name na “Kathniel” sa kanilang mga tagasuporta na 11 taon nang nakasubaybay.

Makikita sa instagram post ni Bernardo ang larawan nila ni Padilla na hawak ang isang cake na may disenyo ng kanilang animated characters habang tumutugtog sa background ang bersyon ni Padilla ng kantang Grow Old With You.

Una nang nagkatambalan sina Bernardo at Padilla noong 2011 sa youth-oriented series na Growing Up, na nasundan ng Princess and I, Pangako Sa’ yo at La Luna Sanggre.

Kaugnay nito, nagdiwang naman ng ika-sampung anibersaryo ang mag-nobyo noong mayo sa Thailand. —sa panulat ni Hannah Oledan

Napili bilang hurado ng Miss Bahrain 2022 si Binibining Pilipinas International 2016 Kylie Verzosa.

Sa Intagram post ng Miss Universe Bahrain, si Kylie ay pinangalanan bilang Head of Empowerment para sa naturang kompetisyon ngayong taon.

Matatandaang noong Hulyo, kinumpirma rin ng Sexy actress ang kaniyang pagsabak sa Miss Universe pageant brand bilang isang Miss International Titleholder.

Ibinahagi ni Catriona Gray ang kanyang pananaw sa pagsali ng mga kasal at mayroon nang mga anak sa mga international pageant.

Ito ay hinggil sa anunsyo ng pageant websites ukol sa kanilang desisyon na pahintulutang sumali ang mga babaeng single mother, buntis, kasal, o diborsiyado na lumahok sa internasyonal na pageant.

Ayon kay Gray, ang pagpayag ng pageant companies ay isang malaking hakbang tungo sa inclusivity.

Sinabi pa niya na ang pagiging Miss Universe ay pagiging isang tagapagsalita at hindi dapat maging hadlang ang marital status ng babae para maabot nito ang kanyang pangarap.

Ngunit bagama’t sang-ayon si gray sa pagsali ng mga ito sa beauty pageants, aminado siya na hindi ito magiging madali lalo na sa young mothers na may mga batang anak na balansehin ang kanilang schedule dahil kaakibat ng pagiging beauty queen ang pagpunta sa iba’t ibang bahagi ng mundo.

Naniniwala rin si Gray na ang Miss Universe ay isang plataporma upang magrepresenta ng mga bagay-bagay.—sa panulat ni Hannah Oleda