Muling pinaalalahanan ng Bureau of Immigration (BI) ang mga opisyal nitong naka-destino sa mga international airport na sumunod sa direktiba hinggil sa pagbabawal na mag-post sa social media, partikular sa Tiktok na sumasayaw o kumakanta, lalo kung naka-inuporme.
Alinsunod sa memorandum sa lahat ng BI port personnel, inihayag ni Immigration Port Operations Chief, Atty. Carlos Capulong na kakasuhan ng insubordination at misconduct ang sinumang empleyado na lalabag.
Ayon kay Capulong, inutusan siya ni BI Commissioner Jaime Morente na imbestigahan ang report na ilang empleyado sa NAIA ang tuloy pa rin sa pagpopost sa Tiktok habang sila ay naka-duty at unipormado.
Pinaalalahanan din ng opisyal na mahigpit na ipinagbabawal ang paggamit ng cellular phones at iba pang electronic gadgets habang naka-duty.
Disyembre noong isang taon nang ipagbawal sa mga empleyado ang mag-post sa Tiktok lalo na kung unipormado dahil ‘unbecoming’ ito bilang isang government employee.—sa panulat ni Drew Nacino