Isasailalim sa dalawang araw na hard lockdown enhanced community quarantine (ECQ) ang Barangay 847 Zone 2 sa Pandacan, Manila.
Alinsunod sa kautusan ni Manila City Mayor Isko Moreno, magsisimula ang hard lockdown 12:01 ng hating gabi ng June 1 at tatagal hanggang 11:59 p.m. ng June 2.
Kasabay ng lockdown, magsasagawa ang Manila City government ng COVID-19 surveillance, rapid risk assessment at testing operations sa Barangay 847 bilang hakbang laban sa bantang dulot ng COVID-19.
Kaugnay nito, inabisuhan ni Barangay 847 chairman Ruben Flores Jr. ang mga residente na manatili lamang sa kani-kanilang mga tahanan at makipagtulungan sa pamahalaan sa kasagsagan ng lockdown.
Sa pinakahuling tala, mayroon nang apat na kumpirmadong kaso ng COVID-19 sa Barangay 847 habang anim ang suspected case.
