Halos hindi na gumagalaw ang bagyong Ambo sa bahagi ng Luzon Strait.
Sa pinakahuling bulletin ng PAGASA, huling namataan ang sentro ng Tropical Depression Ambo sa layong 125 kilometro kanluran hilagang-kanluran ng Calayan, Cagayan.
Ito ay may taglay na hanging umaabot sa 45 kilometro kada oras malapit sa gitna at pagbugsong aabot sa 55 kilometro kada oras.
Posibleng maging isang Low Pressure Area (LPA) na lamang ang bagyong Ambo sa mga susunod na 12 hanggang 24 na oras. Inaasahan naman sa susunod na 24 oras ay kikilos ito pa hilaga hilagang-silangan sa Basco, Batanes.
Samantala, nakataas pa rin ang tropical cyclone wind signal number 1 sa Batanes at Babuyan Islands.
Ayon sa PAGASA, sa susunod na 24 oras asahan pa rin ang katamtaman hanggang sa malakas na buhos ng ulan sa Batanes at Babuyan Islands.
Pinapayuhan naman ang mga maliliit na bangka na mapangib ang paglalayag sa mga lugar na sakop na nasa ilalim ng signal no. 1.
