Patay ang isang 26 – taong gulang na babae matapos na mahimatay sa loob ng tren ng MRT – 3, umaga ng Lunes, Disyembre 4.
Ayon sa Department of Transportation o DOTr, hinimatay ang pasaherong si Marielle Ann Mar sa loob ng tren habang binabagtas ang bahagi ng Ortigas Station – Southbound, 9:48 ng umaga.
Agad naman itong inilabas sa tren ng mg security guard, at nilapatan ng first aid ng MRT – 3 staff.
Dinala naman si Mar sa Victor P. Potenciano Medical Center, kung saan idineklara itong wala nang buhay, 12:05 ng tanghali.
Hindi naman natukoy ang dahilan ng pagkamatay ng dalaga at hindi na din ipinasailalim ng pamilya ang katawan nito sa otopsiya.
Sinabi ng DOTr na nangyari ang insidente nang hindi peak hours.
Nagpaabot naman ang pamunuan ng DOTr at MRT – 3 ng kanilang pakikiramay sa pamilya ng biktima at tiniyak na sasagutin ang mga gastusin katulad ng medical at funeral expenses.
