Judith Estrada-Larino

Maaaring gawing mandatory o atasan ng Department Of Health (DOH) ang mga magulang na pabakunahan kontra COVID-19 ang kanilang mga anak.

Binigyang diin ito ni Senador Francis Tolentino sa gitna nang gumugulong nang pagbabakuna sa general population at sa mga menor de edad.

Ayon kay Tolentino, sa ilalim ng Republic Act  10152 o  “mandatory infants and children health immunization act” ang kalihim ng DOH ay pwedeng maglabas ng department circular upang masaklaw ng mandatory vaccine ang bakuna kontra COVID-19 bilang “vaccine-preventable diseases”

Sa ngayon aniya ang saklaw ng “mandatory basic immunization para sa mga sanggol at bata ay bakuna kontra  diphtheria, tetanus at pertussis, polio, tigdas, beke, hepatitis-b at influenza.

Sinabi ni Tolentino na malinaw na may sapat ng batas  upang bakunahan ang mga batang estudyante laban sa coronavirus disease. — ulat mula kay Cely Ortega-Bueno (Patrol 19)

Kakailanganin ng cemetery pass bago makabisita sa mga yumaong mahal sa buhay sa Navotas.

Ayon sa Navotas City government, kailangang i-text ang pangalan, address, age, sementeryo na nais puntahan, oras at petsa ng pagbisita sa text JRT number 09152601385 at 09088868578 at hintayin ang reply para sa cemetery pass.

Ang nasabing pass ay puwedeng gamitin ng tatlong miyembro kada pamilya at  dapat itong makuha tatlong araw bago magtungo ng mga sementeryo.

Kasado na ang paghahalo ng Sinovac at iba pang bakuna para sa mix and match trial ng COVID-19 vaccines.

Ipinabatid ni DOST Undersecretary Rowena Guevara na sisimulan ngayong linggo sa Muntinlupa at Davao ang dry run para sa paghahalo ng iba’t ibang uri ng bakuna kontra COVID-19.

Ang aktuwal aniyang mix and match ng mga bakuna ay gagawin ngayong linggo o unang linggo ng Nobyembre at tig 250 participants ang kada paghalo ng dalawang klase ng bakuna o halimbawa ay kumbinasyon ng Sinovac-Janssen o Sinovac-Moderna.

Sinabi ni guevara na nasa 3k hindi pa nababakuhan kontra COVID-19 ang maaaring makilahok sa mix and match trial na ang resulta ay posibleng ilabas sa Disyembere o Enero ng 2022.

Bumaba na sa .55 ang reproduction number ng COVID-19 sa Davao City na nananatiling nasa moderate risk.

Ayon ito kay Dr. Guido David, fellow ng OCTA research group matapos maitala sa 122 ang 7 day average ng mga bagong kaso ng COVID-19 o 31% na pagbaba mula sa nakalipas na linggo.

Ipinabatid ni David na moderate ring maikukunsider ang kasalukuyang  average daily attack rate (ADAR) ng Davao City na nasa 6.71 per day per 1,000.

Ikinatuwa ng Philippine Red Cross (PRC) ang findings ng RITM na nagsasabing accurate ang RT-PCR COVID-19 swab test nito.

Kasunod na rin ito nang paglatag ng false positive cases na nasuri ng PRC laboratory sa Subic, Zambales dahilan kaya’t mismong ang Pangulong Duterte ang nagsabing hindi makatuwiran ang mahal na singil ng PRC para sa hindi tiyak na pagsusuri.

Iginiit ng PRC na nalalagay sa posibleng impeksyon ang mga gumagawa ng test kaya’t hindi makatuwirang kuwestyon ang resulta ng swab test.

Iniimbestigahan na ng Makati City government ang balitang ibinibenta sa Siang Mall sa Saudi Arabia ang sapatos na ipinamimigay ng lungsod sa kanilang mga mag-aaral.

Ito ay matapos makipag-ugnayan ang Makati City government sa supplier at manufacturer na gumawa ng nasabing sapatos.

Inilabas ng Makati LGU sa facebook page nito ang litrato ng katulad na sapatos nilang Air Binay 3.0 rubber shoes na ibinibenta sa halagang 24 saudi rial o mahigit 300 pesos.

Binalaan ng makati LGU ang grupo o indibidwal na gagamit ng kanilang city seal.

Binatikos ni ang Probinsyano Partylist Representative Ronnie Ong ang mga opisyal ng Smart-PLDT dahil sa pagkuha ng mga dayuhan para maging endorser nito.

Binigyang-diin ni Ong na nakakadismaya ang aniya’y pagiging bias ni Telco Chairman Manuel Pangilinan at presidente nitong si Al Panlilio na kapwa walang respeto sa daan-daang Pinoy artists na gumagamit ng kanilang serbisyo, subalit hindi man lang bigyan ng pagkakataon para mag-endorso.

Ayon kay Ong, nagbayad ang naturang Telco ng $10-M sa BTS group ng South Korea para sa kanilang commercial noong isang taon bukod sa iba pang korean artists na kinuha rin para maging endorser.

Dahil dito, isinulong ni Ong, miyembro ng House Committee on Creative Industry and Performing Arts ang panukalang Filipino first policy para tulungan ang local industry na makabangon sa gitna ng pandemya.

Kasado na ang ika-8 sunod na linggo ng oil price hike.

Epektibo bukas ng alas-6 ng umaga, ipinabatid ng Pilipinas Shell at Seaoil Philippnes ang 1.80 na dagdag sa presyo ng gasolina kada litro, 1.50 sa diesel at 1.30 sa kerosene.

Ganito rin ang mga presyong ipatutupad ng Cleanfuel simula alas 4:01 ng hapon bukas, maliban sa kerosene na hindi kabilang sa mga produkto nito.

Ayon sa DOE nasa 17.85 na kada litro ang kabuuang taas presyo ng gasolina, 16. 50 naman sa diesel at 14.19 sa kerosene hanggang October 12.

Pag-aaralan ng Comelec En Banc ang panawagang palawigin ang registration period para sa mga pilipinong nasa ibang bansa na nais makaboto sa Eleksyon 2022.

Ayon kay Comelec Chairman Sherif Abbas, tatalakayin nila ang posibleng pagpapalawig sa overseas registration sa Miyerkules sa gitna na rin nang puspusang paghahanda nila para sa 2022 national elections.

Maaari aniyang ikunsider ang pagbubukas muli ng registration sa mga lugar lamang sa abroad na aniya ay “parang NCR “ kung saan marami pa ang gustong magparehistro.

Una nang ini-apela ni Senador Imee Marcos na ikunsider ang apela ng mga OFW at seafarer na hindi nakaabot sa deadline ng overseas registration nuong October 14 dahil nahirapan sa pagbyahe patungo sa mga konsulada at embahada bunsod ng pandemya.

Humihingi na ng ayuda ang DOTr para sa mga driver gayundin sa mga mananakay kasunod nang panibagong oil price hike.

Kasunod na rin ito ng panawagan ng mga tsuper na magkasa ng across the board na umento sa pamasahe.

Sinabi ni Transportation Secretary Arthur Tugade na dapat balansehin ang pangangailangan ng mga driver sa kakayanan ng mga pasahero sa gitna ng pandemya.

Ayon kay Tugade, tuloy-tuloy ang pakikipag ugnayan ng DOTr at LTFRB sa DOE para bumuo ng mga hakbanging makakatulong na maibsan ang epekto ng pagtaas ng presyo ng langis sa operasyon ng mga pampublikong sasakyan.

Bukod sa fuel subsidy, hinimok ni Tugade ang mga tsuper na sumali sa service contracting program kung saan babayaran sla ng gobyerno sa kada kilometrong itinakbo nila.