Judith Estrada-Larino

Nasa low-risk classification sa COVID-19 na ang Pilipinas.

Ito ang inihayag ng Department of Health matapos ang pagbaba ng kaso ng COVID-19 sa bansa.

Sinabi ni Health Undersecretary Maria Rosario Vergeire, lahat ng rehiyon sa bansa ay nasa moderate risk o kaya naman ay low risk classification na lang.

Naitala na lamang sa negative 48% ang two-week growth ng COVID-19.

Batay sa datos ng DOH, 41.15% na lang ang bed utilization rate sa bansa, 37.65% sa mechanical ventilator utilization rate 53.15% sa ICU utilization rate.

Humirit ang Department of Energy sa mga oil industry player na magbigay ng diskwento o promo sa kanilang mga customer dahil sa sunod-sunod na pagtaas ng presyo ng gasolina.

Ayon kay Energy Secretary Alfonso Cusi, naki-usap na sila sa mga oil industry players para naman maibsan ang pasaning ito ng publiko.

Aniya, ilang industry players na ang pumayag sa piso hanggang tatlong pisong diskwento sa kada litro ng kanilang produkto.

Ipinabatid ng kalihim na simula pa January ngayong taon ay naglalaro na sa 50 dollars hanggang 96 dollars ang kada bariles ng langis.

Pinag-aaralan na ng pamahalaan ang pagbibigay ng 3rd dose o booster shot ng COVID-19 vaccine sa priority groups sa November o December.

Ayon kay Health Undersecretary Maria Rosario Vergeire, hinihintay na lamang ang Emergency Use Authority na magmumula sa Food and Drug Administration para sa pagtuturok ng 3rd dose.

Una rito, inaprubahan ni Health Secretary Francisco Duque III ang rekomendasyon ng health technology assessment council na pagbibigay ng dagdag na anti-virus shot sa mga health care worker at iba pang kabilang sa priority groups.

Nitong Oktubre 21, nasa mahigit 25 milyon na ang fully vaccinated sa bansa, 32.54% ito ng 77 million population na target ng gobyernong mabakunahan.—mula sa ulat ni Aya Yupanco (Patrol 5)

Humihirit ng karagdagang P40-B pondo ang Department of Agriculture.

Ayon kay Agriculture Secretary William Dar, ito ay para masuportahan ang muling pagbangon ng sektor ng agrikultura sa bansa bunsod ng epekto ng pandemya.

Aniya kailangan masolusyunan ang tumataas na presyo ng fertilizer at farm inputs dahil wala naman aniyang factory ng pataba dito sa Pilipinas.

Matatandaan na natapyasan din ang proposed 2022 budget ng DA sa P91-B na lamang.

Nakatakdang makipagkita si Labor Secretary Silvestre Bello III sa counterpart nito sa Saudi Arabia.

Ito’y kasunod ng banta ng total deployment ban ng mga Filipino migrant worker sa naturang bansa makaraang hindi payagan ng isang abusadong retired general ang tatlong Pinoy na manggagawa na makauwi ng Pilipinas.

Ayon kay Bello, pinag-aaralan din ang pagpapatupad ng total worker’s deployment ban sa mga bansa sa Middle East dahil sa hindi pa nababayaran ng mga employer sa Saudi Arabia ang mga sweldo at ang end of services pay ng mahigit 9K manggagawang Pinoy.

Ani Bello, maaaring nakarating sa Hari ang ginawa ng retiradong heneral at nagalit ito kaya pinauwi na ang tatlong Pilipinong manggagawa.

Magugunitang noong Mayo ay nagpatupad din ng deployment ban sa Saudi Arabia ang DOLE dahil sa pagre-require sa mga OFW na pasanin ang gastos sa pagsunod sa COVID-19 health at safety protocols.

Patay ang isang motorcycle rider matapos mabangga sa isang kotse sa Tondo, Maynila kaninang madaling araw.

Ayon kay kagawad Louie Dela Cruz ng barangay 215, makikita sa CCTV na mabilis ang takbo ng motorsiklo at hindi huminto nang mag-red light ang stoplight.

Mapapansin naman aniya na mabagal ang takbo ng kotse nang dumaan sa intersection, pero nagpang-abot pa rin sila ng motorsiklo at nagsalpukan.

Nabatid na TNVS ang driver at nag-aantay lang ng booking ng pasahero.

Nasabat ang mahigit P6-M halaga ng hinihinalang shabu sa isinagawang buy bust operation sa Batasan Hills, Quezon City.

Ayon sa awtoridad, isang suspek ang naaresto na kinilalang si Mohammad Mokuah.

Nakuha kay Mokuah ang isang kilo ng hinihinalang shabu at marked money na ginamit sa transaksyon.

Tumanggi naman magbigay ng pahayag ang suspek.

Pinatitiyak ng PNP sa Manila Police District (MPD) na hindi dapat maging super spreader event ng COVID-19 ang pagbubukas ng dolomite beach sa Manila Bay.

Ito’y ayon kay PNP chief police general Guillermo Eleazar ay matapos dagsain ng publiko ang dolomite beach nitong weekend kung kailan umabot sa 4,000 katao ang pumasyal dito.

Sinabi ni Eleazar na inatasan na niya si MPD director police brigadier general Leo Francisco na makipag-ugnayan sa lokal na pamahalaan at mga tagapangasiwa ng dolomite beach para solusyunan ang problema.

Sinabi naman ni Franciso na ginagawan na nila ng kaukulang solusyon kabilang ang pagpapalit nila ng mga daanan papasok at palabas ng dolomite beach  at iniklian na rin nila sa limang minuto sa halip na 15 minuto ang staying time para mapagbigyan ang lahat ng mga gustong mamasyal dito.—mula sa ulat ni Jaymark Dagala (Patrol 9)

Hindi isasara ng DENR ang dolomite beach sa Manila Bay kahit pa dinagsa ito nitong nakalipas na weekend.

Ayon kay Environment Undersecretary Benny Antiporda, hindi uubrang isa ang dolomite beach na ginastusan ng malaki ng gobyerno at nagsisilbing pantanggal na rin ng stress ng mga Pilipino sa gitna ng pandemic.

Hindi rin aniya sila papayag na maging super spreader event ng COVID-19 ang dolomite beach kaya’t nagpapatupad sila ng mga hakbangin para maging ligtas ang lahat na gustong bumisita rito.

Sinabi ni Antiporda na kahapon ay nagkumpulan ang mga tao dahil sa biglaang pagbuhos ng ulan ng umaga, subalit kaagad naman nila itong ini-report sa mga kinauukulan na inaksyunan naman din nila.