Judith Estrada-Larino

Humihingi na ng ayuda ang DOTr para sa mga driver gayundin sa mga mananakay kasunod nang panibagong oil price hike.

Kasunod na rin ito ng panawagan ng mga tsuper na magkasa ng across the board na umento sa pamasahe.

Sinabi ni Transportation Secretary Arthur Tugade na dapat balansehin ang pangangailangan ng mga driver sa kakayanan ng mga pasahero sa gitna ng pandemya.

Ayon kay Tugade, tuloy-tuloy ang pakikipag ugnayan ng DOTr at LTFRB sa DOE para bumuo ng mga hakbanging makakatulong na maibsan ang epekto ng pagtaas ng presyo ng langis sa operasyon ng mga pampublikong sasakyan.

Bukod sa fuel subsidy, hinimok ni Tugade ang mga tsuper na sumali sa service contracting program kung saan babayaran sla ng gobyerno sa kada kilometrong itinakbo nila.

Nakapagtala ang DOH ng dagdag na 633 na mga bagong kaso ng Delta variant ng coronavirus.

Ito ayon kay Health Undersecretary Maria Rosario Vergeire ay mula sa na sequence na kabuuang 748 samples mula Setyembre hanggang nitong October 16.

Sinabi ni Vergeire na 6 na kaso mula sa nasabing bilang ng samples ang nag positibo sa Delta variant at 3 naman sa Alpha variant.

Pumapalo sa 1, 509 minors ang nabakunahan sa unang linggo nang paglalatag ng pediatric vaccination.

Ito ay matapos ihayag ni health Undersecretary Maria Rosario Vergeire na matagumpay ang pilot vaccination sa mga edad 15 hanggang 17 na mayroong comorbidity.

Samantala, ipinabatid ni Vergeire na kinu-kumpleto pa ng DOH ang assessment sa mga binakunahang unang batch ng mga kabataan taliwas sa mga report na ilan sa mga ito ang nakaranas ng side effects matapos maturukan ng bakuna kontra Covid-19.

Binuksan na ng San Juan City government ang online booking system nito para sa appointment sa pagbisita sa mga sementeryo.

Ayon kay San Juan City Mayor Francis Zamora ay bahagi ng paghahanda nila ngayong undas sa gitna na rin ng pandemya.

Ipinabatid ng San Juan City government na dalawang tao lamang ang papayagan kada booking Sa San Juan City Cemetery.

Tanging ang mga mayroong appointment ang papayagang makapasok ng mga sementeryo mula October 18 hanggang 28 at November 3 hanggang 7 kada dalawang oras mula alas-8 ng umaga.

Pumalo na sa 19,014 ang bilang ng mga lumalabag sa quarantine protocols sa Metro Manila nasa alert level 3 na ito.

Batay sa datos ng PNP nasa 10,807 na ang kabuuang bilang o katumbas ng 55% ang nabigyan lamang ng babala.

Nasa 6,750 o katumbas ng 36% naman rito ang pinagmulta habang mahigit 1,000 ang napatawan ng ibang parusa

Kabilang sa mga naitalang paglabag ay ang hindi pagsunod sa mga health protocol, paglabag sa curfew hours at ang paglabas ng mga hindi APOR o authorized person outside of residence.

Pinasinayaan ang bagong tayong Philippine Fleet Isolation Facility na nasa headquarters ng Philippine Fleet, Naval Bas Heracleo Alano sa Cavite City.

Ang nasabing isolation facility na binubuo ng 25, 20 footer container vans at itinayo sa 360 square meter compound na tila farmville sa halagang P13-M.

Ipinabatid ni Philippine Fleet Spokesperson Lt. Commander Ryan Luna na ang naturang isolation facility ay fully equipped at air conditioned container vans na makaka accommodate ng 46 na pasyente.

Humingi ng pasensya ang kampo ni Vice President Leni Robredo kaugnay sa huling spot para sa senatorial line up nito.

Kasunod na rin ito nang paglalantad ni Robredo ng 11 kandidatong isasabak sa pagka-senador.

Sinabi ni Atty. Barry Gutierrez, spokesman ni Robredo na sumasailalim pa sa proseso ang pagpili nila sa huling Senatorial candidate ng Robredo-Kiko team.

Gumuho ang bahay ng 17 pamilya gayundin ang barangay hall sa barangay Poblacion sa Bakun, Benguet dahil sa bagyong Maring.

Nadamay din sa landslide ang klinika kung saan tina-triage ang mga dumarating na bisita sa lugar kaya’t nagtayo muna ng pansamantalang klinika na pinalibutan ng tolda ang mga opisyal ng  barangay Poblacion.

Ang mga apektadong pamilya ay nakikitira muna sa kanilang mga kaanak at kapitbahay gayundin sa isolation area na ang 3 kaso ay inilipag muna sa ibang barangay.

Dinagsa ng tao ang mga mall sa pagsisimula nang pagsailalim sa mas maluwag na quarantine restrictions sa Metro Manila.

Sinimulan kahapon ang pagsailalim sa alert level 3 ng NCR at tatagal ito hanggang October 31.

Una na ring dinumog ng mga tao ang dolomite beach sa Manila Bay kahapon ng umaga gayundin ang mga simbahan sa kalakhang Maynila.

Sumampa na sa 23 ang patay dahil sa bagyong Maring.

Ayon sa NDRRMC , 40 ang sinasabing nasawi sa landslides at flash floods sa Northern Luzon  at Visayas subalit 17 rito ay vina-validate pa.

Ang mga nasawi ay mula sa Ilocos Sur, Pangasinan, La Union, Ilocos Norte, Cagayan, Palawan at Benguet.

Nasa mahigit P2 bilyon ang danyos ng bagyong Maring sa agrikultura samantalang ang nasirang imprastruktura ay nagkakahalaga ng P1.056 bilyon.

Naibalik na rin ang supply ng kuryente sa 117 mula sa 137 na lungsod at munisipalidad na nakaranas ng brownout dahil sa hagupit ng bagyong Maring.