Naranasan kahapon ang pinakamataas na heat index sa Metro Manila.
Ayon sa PAGASA, pumalo sa 45°C ang heat index sa Ninoy Aquino International Airport (NAIA), 43°C sa Science Garden Monitoring Station sa Quezon City at 41°C naman sa Port Area sa Lungsod ng Maynila.
Nagbabala ang PAGASA sa heat index na 41°C hanggang 54°C na anito’y delikado at magdudulot ng heat cramps at pagkahapo.
Pinakamatindi naman ang heat index na naitala kahapon sa Aparri, Cagayan na nasa 45°C.
Mga artista, scientists, writers at iba pa.
Ang mga ito ang itatampok ng Philippines Postal Corporation (PHLPost) sa kanilang mga stamps bilang pagpupugay na rin sa ibinibigay na karangalan at pagpapamalas ng husay at talento sa iba’t ibang larangan.
Ayon kay Postmaster General Norman Fulgencio, pinoproseso na nila ang mga isasama sa bagong stamps at iaanunsyo nila sa mga susunod na buwan ang listahan ng mga nasabing Pinoy na magiging mukha ng bagong PHLPost stamps.
Sa mga nakalipas na taon, nabigyan ng sariling stamp na buhay na Pilipino ay mga pangulo ng bansa tuwing inauguration nila at pagkapanalo sa Miss Universe nina Pia Wurtzbach at Catriona Gray.
Binigyang diin ni Fulgencio na nais nilang ma-inspire ang mga Pilipino sa buhay ng kanilang mga iniidolo at mahimok pa ang mga kabataan na tangkilikin ang Philippine stamps.
Bakuna.
Ito ang pinakaimportanteng bagay na nakikita ni Dr. Michael Tee, fellow ng oCTA Research group, para hindi na tumaas ang kaso ng coronavirus disease 2019 (COVID-19) sa bansa.
Dahil dito, hinimok ni Tee ang publiko na magpabakuna na, bagamat iginagalang naman niya ang rational at emotional reasons nang pagtanggi ng maraming Pilipino na magpabakuna kontra COVID-19.
Inamin ni Tee na pinakamahirap labanan ang emotional reason kaya’t dapat ding maging sensitive dito ang mga otoridad.
Kailangan talaga nating magpabakuna lahat kasi ‘yung mga nagsasabi, ‘hindi, bumababa naman a ‘yung kaso, e. Hindi naman ako mahahawa, e.’ Naku, hindi po ‘yan totoo hanggat hindi po tayo nababakunahan, ay pa-seasaw-seasaw nalang ang ating mangyayaring pagdami ng kaso, magla-lockdown, bababa, tataas. Para matapos ito, magpabakuna na tayong lahat,” ani Tee. —sa panayam ng Balitang Todong Lakas
Hindi na lamang sa National Capital Region (NCR) nanggagaling ang mataas na mga bagong kaso ng coronavirus disease 2019 (COVID-19).
Ayon ito kay Dr. Michael Tee, fellow ng OCTA Research group, matapos sumirit sa mahigit 7,000 ang mga bagong kaso ng COVID-19 sa nakalipas na tatlong araw.
Sinabi sa DWIZ ni Tee na maging ang mga kaso ng COVID-19 sa Central Luzon, Western Visayas, BARMM at Region 4B (MIMAROPA) ay tumataas na rin kaya’t kailangan pa ang ibayong pag-iingat.
Nakikita natin tumataas na sa Central Luzon, Western Visayas, pati Mimaropa, BARMM, nakikita natin tumataas na rin ang dami ng kaso. Dapat talaga nating paigtingin pa lalo ngayon ang pag-iingat, hindi nalang ito sa National Capital Region na nagkaroon tayo ng focus two months ago. Ngayon kailangan nating gisingin din ang ating mga kababayan dito sa Central Luzon, sa CALABARZON, Cagayan Valley, Western Visayas, Davao, atyaka Central Visayas, dahil parang sa kanila na lumipat ‘yung dami ng kaso na hindi natin nakikita last time,” ani Tee. —sa panayam ng Balitang Todong Lakas
Pinag-aaralan ni vaccine czar Carlito Galvez, Jr. ang posibilidad na isang beses lamang maturukan ng coronavirus disease 2019 (COVID-19) vaccine ang mga Overseas Filipino Workers (OFWs), kabilang ang mga seafarers.
Ipinabatid ito ni Labor Secretary Silvestre Bello III dahil sa aniya’y pangangailangang makaalis ang mga OFW, batay na rin sa kanilang deployment schedule pa ibang bansa.
Una nang inihayag ni Presidential Spokesman Harry Roque na ang mga OFW na lalabas ng bansa sa susunod na apat na buwan ay kabilang na sa top priority list ng COVID-19 vaccination program ng gobyerno.
Sinabi ni Bello na ang mga OFW ay pasok na sa A1 category mula sa A4 category sa prioritization list.
Binigyan na ng go signal ng Commission ong Higher Education (CHED) Region 12 ang 13 kolehiyo at unibersidad na mayroong health-related programs sa SOCCSKSARGEN para magsagawa ng limitadong face-to-face classes.
Kasunod na rin ito, ayon kay CHED Region 12 Director Nelia Alibin, ng serye ng evaluation sa kakayahan ng mga naturang kolehiyo at unibersidad na makapagsagawa ng limitadong face-to-face classes sa gitna nang umiiral na pandemya.
Kabilang sa mga pinayagang magsagawa ng limited face-to-face classes ang Notre Dame of Midsayap College, Cotabato Medical School Foundation Incorporated, North Valley College Foundation, University of Southern Mindanao-Kabacan Campus at Brokenshire College of Soccsksargen.
Tiwala ang Department of Tourism (DOT) na papayagan na ng Inter-Agency Task Force (IATF) ang mga turista sa Baguio City.
Kasunod na rin ito nang isinagawang inspeksyon ng DOT sa mga tourist attractions sa lungsod.
Ayon kay Tourism Secretary Bernadette Romulo-Puyat, nagdadasal silang bumaba pa ang kaso ng coronavirus disease 2019 (COVID-19) sa Baguio City at may go-signal na sila mula sa Department of Health (DPH) na maaari nang tumanggap ng bisita ang lungsod simula bukas, ika-1 ng Hunyo.
Samantala, inihayag ni Baguio City Mayor Benjamin Magalong na tatanggapin nila ang mga bisita kung susunod ang mga ito sa health and safety protocols.
Para makabisita sa Baguio City, ang mga turista ay dadaan sa checkpoint matapos ang Rosario, La Union Toll Plaza para makakuha ng pass through card at pagdating sa lungsod, didiretso ang mga turista sa triage area para isumite ang kanilang PCR test at QR codes mula sa Baguio Vista.
May pananagutang kriminal at administratibo ang sinumang local government official na mabibigong ipatupad ang COVID-19 health rules.
Ayon kay Justice Secretary Menardo Guevarra nakasaad sa joint guidelines ng DILG at DOJ na ang barangay officials ay inaatasang ipatupad ang health protocols sa kani-kanilang nasasakupan.
Sinabi ni Guevarra na unang kailangang gawin ay ipatupad ang regulasyon hinggil sa health protocols dahil ang barangay officials ang mayroong direktang kontak sa mga tao at nasa grass roots ang mga ito kaya’t sila ang dapat na unang nakakaalam sa mga nangyayari sa kanilang paligid.
Ang joint guidelines ay ipapalabas bukas, araw ng Lunes.
Muli na namang maituturing na World Champion si Nonito ‘the Filipino flash’ Donaire.
Ito ay matapos patumbahin ni Donaire si Nordine Oubaali sa fourth round para mapasakamay ang titulo sa WBC bantamweight championship sa Dignity Health Sports Park Stadium sa Carson, California.
Nagpakawala ng tatlong matinding suntok ang 38 anyos na si Donaire laban kay Oubaali – Dalawa sa third round at isa sa fourth round, dahilan para ipatigil na ng referee ang bakbakan.
Si Donaire ang pinakamatandang boksingero na nanalo ng isang bantamweight title.
Ang nasabing laban naman ang kauna-unahang nagpayuko sa French boxer sa kanyang professional career matapos manalo sa 17 iba pang professional matches.
Nadagdagan pa ang bilang ng mga residenteng ng positibo sa COVID-19 matapos dumalo sa inuman at reception ng isang kasal sa barangay Old Balara sa Quezon City.
Ayon kay Alan Franza, barangay chairman 12 pa ang nadagdag sa 31 nauna nang nagpositibo sa COVID-19 matapos isalang sa swab testing ang mahigit tatlong daang residente ng area 7 sa kahabaan ng luzon avenue.
Nananatiling naka-lockdown ang bahagi ng area 7 sa Luzon avenue kung saan idinaos ang inuman at reception na pinagmulan ng carrier ng COVID-19.
Kaagad dinala sa isang quarantine facility ang mga mayroong sintomas habang pinagku-quarantine lamang sa kanilang mga bahay ang mga walang sintomas.